Read Patamona Colossians 1 Bible Online

Colossians 1 - Patamona bible

Colossians 1

¹Iulà, Paul molopai Timothy kùtonpa kon sàlà kaleta menukayan, iche tùwettok kasa Katù nanumùppù lùppù Iulà, Christ Jesus neunoko pe.

²Sàlà màlà kaleta Katù ponalok kon Colosse pon kon, ailon pe tùusetakkaik pùla tùwessan ina tonpa yamùk Christ yau piyak ina nùmenukappù. Tàwà Katù Kùkàipùnù kon elepatàu wakù pe we'nàtok tùwinàpaino ke molopai echitonpa pe we'nàtok ke.

³Tàwàlàlà tenki tawonnan ina Katù pàk, Kùyepulu kon Jesus Christ Kàipùnù pàk, àpona'nokon ina wàpùlema yau.

⁴Masapùla ailon tetok auya'nokon Christ Jesus pàk yekale yetasak ina uya man. Molopai tamù'nawolon kon Katù ponalok kon pùnùnmatok auya'nokon yekale yetasak ina uya.

⁵Ailon itekale, Wakù Itekale uyàssak apyakù'nokon wapiya kulu yau, enpen we'nàtok inekama metatantàu. Màlàpàk ailon tetok auya'nokon molopai pùnùnmantok auya'nokon nùsenpoika yai'nùk enpen ewettok kon pokon. Màlà àponalok kon pe ikupù nai'nùk epùn po. Wakù Itekale wakù pùlemantok Katù winàpaino nessan molopai miyaiwa nùtàyan tamù'nawàlà pata yawà àkklotau'nokon pena iwechippù kasa. Katù wettok wakù pe yetappù auya'nokon motapai molopai ituppù auya'nokon iwessek kasa kulu kasa.

⁷Sàlà ittuppù auya'nokon Epaphras ina tonpa, ina pùnùn kulu, ina we'wotokoma Christ ponaloppe tonpa winàpai, ailon pe kulu tùusetakkaik pùla tùwe'wotokomasen àpàkànsau'nokon.

⁸Wakù Akkwalù uya elepatok kon uchi'nùnmantok yekamappù ya nàlà màlà ina pàk.

⁹Màlàpàk tàwàlàlà ina tùwàpùlemasan àpona'nokon wapiya kulu eyekale kon yetappù ina uya motapai. Katù yekamapponnan ina ayanùkka tok kon pe ya teselu ittutok ke, tamù'nawolon pukkeppe we'nàtok molopai ittuntok Wakù Akkwalù nùtùlù ke.

¹⁰Màlàyau nen uchi Itepulu Katù wettok iche kasa tùwemassan pe ewechi kon màlà. Molopai yauchinpanài pe nai'nùk kupù auya'nokon. Ewemattok kon wechi nen uchi tepelu ke màlà, wakù ton yà'là yekkwa là wotoko kupù auya'nokon yau. Molopai Katù ittutok auya'nokon yau eusemokka kon.

¹¹Imeluntàlùttàsappe tamù'nawolon itapàikketù ke, wakù imeluntalù yawàlà yà'làlà yentaika kon pa molopai ipàlika kon pa molopai tùutauchinpaik ewechi kon pa.

¹²Molopai tenki tawonnan pe Kùkàipùnù kon pàk tùutachinpaik. mùkkàlà àku'nàippù'nokon tùnkupùppù tùponalok kon ponaloppe wakù akkwa pata yau ipùkkù pe ewechi kon pa.

¹³Masapùla kùpùikattàppù kon ya ewalupà meluntàlù winàpai molopai ne'nàsak kon ya itepulu pe tù'nùn Tùmu wettok yak pàk.

¹⁴Mùkkàlà uya mokkansak kon nai'nùk molopai kùmakuyi kon pàk usentupansak màlà.[1]

¹⁵Christ wechi màlà ànùk yekkwa pe Katù tùusensen pen wechi yenpoikanài pe. Iwentusak lùppù wapiyalok pe, tamù'nawolon kon ikonekasak kon yentaino mùkkàlà.

¹⁶Masapùla mùkkàlà winà Katù uya tamù'nawolon epùn pon molopai non pon konekappù màlà, tensan molopai tensan pen, akkwalù yamùk meluntàlù nàlà, itepulu yamùk, molopai apàikkek ton. Katù uya màlà tamù'nawolon konekappù iwinà molopai iponaloppe.

¹⁷Christ wechippù màlà molo tamù'nawolon yà'làlà wapiya. Molopai iwinà tamù'nawolon wechi màlà molo tùpatasek yau.

¹⁸Ailon tawonnan sochi tukaik tesassan ippai mùkkàlà, mùkyamlo wechi màlà ipùkkù pe. Tamù'nawolon màlà iwinàpaino. Wapiya kulu iwe'wuluukasak lùppù mùkkàlà weli'nàtok yapai. Màlàpàk Jesus wechi màlà tamù'nawolon yentai.

¹⁹Masapùla tamù'nawàlà tùmàlà pe Tùmu yau eppai Katù wechippù màlà.

²⁰Tùmu yai nen uchi, Katù uya tamù'nawolon yà'làlà nepù tùuya tùpyak pàk, echitonpa pe we'nàtok konekappù màlà Tùmu welikù pulusuk po winà. Molopai màlà kasa nen uchi tamù'nawolon yà'làlà nepùppù ya imùnù yai tùpyak, asakklàma non po molopai epùn po nàlà.

²¹Pena mei ewechippù kon màlà Katù winàpai. Molopai iteyaton pe ewechippù kon àli pe eusenumenkatok kon winà.

²²Tùse sàlà pe nen uchi, Tùmu yàkàpù winà, Katù uya tùwechi yakonnon pe àkussak kon man enettok kon pe tùuya esuken. Wakù pe itekale eyesek kon wettoppe.

²³Tùse ailon tetok auya'nokon wechi meluntà pe molopai i'nak kulu ikala iche we'nà man. Enpen ewettok kon ananùmùppù kon wakù itekale enetappù kon kan uchi kù'nonkatàu tà. Sàlà Wakù Itekale yekamappù màlà sàlà non pon kon tamù'nawolon kon kappon yamùk pàk. Molopai Iulà, Paul, wenappù màlà sàlà Wakù Itekale yapyoto pe.

²⁴Molopai sàlà pe utauchinpayaik wettalumattàsak àpàkànsau'nokon pàk. Sàlà yamùk wettalumattàtok yanùmù uya nai'nùk uyesak yau, Christ wettalumattà yenuka'nùpù pe sochi ponaloppe. Sochi mùkyamlo Christ pùkkù.

²⁵Sochi yapyoto pe Katù uya ukussak man. Sàlà wotoko ke ulepappù ya màlà tamù'nawàlà Wakù Itekale yekamatoppe uya àpàkù'nokon.

²⁶Tachinpe sàlà itekale wechippù màlà tùttusen pe pùla tamù'nawolon kon winàpai ikussak pe molopai yonansappe nàlà. Tùse yenpoikasak ya nen uchi sàlà Katù ponalok kon kappon yamùk yenu yak.

²⁷Katù uya sàlà kupùppù màlà masapùla Jew yamùk pen uya sàlà wakù kulu molopai tùttusen pen ittu iche tùwechi pàk. Molopai màlà tùttusen pen màlà Christ wemapù ayau'nokon molopai mùkkàlà, mùkkàlà enpen ewettok kon Katù yapulàtok pùkkù pe ewechi kon pàk.

²⁸Màlàpàk Christ yekamannan ina tamù'nawolon kon kappon yamùk pàk. Tamù'nawolon kon yekamaponnan ina molopai tok yenupannan, tamù'nawolon pukkek ke, tamù'nawolon kon nettoppe Katù yemloto pona wakù pe tamùnawàlà ipùkkù pe neken pùla Christ kasa kulu nen uchi.

²⁹Sàlà wekkuttoppe tùwe'wotokomasen Iulà sa'man pe, eke meluntà Christ nùtùlù yapulà pe, ne'wotokomayai'nùk uyau.