Read Patamona Colossians 2 Bible Online

Colossians 2 - Patamona bible

Colossians 2

¹Sa'man pe kulu sa' we'wotokoma àpùikattà kon pàk ittu auya'nokon iche wessaik. Molopai Laodicea pon kon pùikattà uya nàlà sàlà, molopai tamù'nawolon kon tùulon kon yà'là yattai là uyennàinan nùssan pen pùikattàiche wessaik.

²Sàlà ku'nài Iulà tok yewan wenatoppe meluntà peiwa. Echi'nùn pe tok wettoppe tamùkke, tamùnawàlà wakù ton yepotoppe tok uya ittu tùuya'nokon tamù'nawàlà ipùkkù pe neken pùla winà. Màlà kasa tok uya Katù nùkupù tùttusen pe pùla ittu màlà, mùkkàlà ichi Christ.

³Tamù'nawàlà wakù ton Katù ittutok molopai ipukketù tùttusen pe pùla inkupù wechi màlà Mùkkàlà yau.

⁴Màlàpàk uchi tekamayaik àpàkù'nokon. Ànù'là eyennakatàkù'nokon ailon pen pàk wesseippà'nàtok yau, wakù pe ikasa kasa lànen iwechi tùse.

⁵Masapùla apyau'nokon pùla lànen wechi tùse, uyakkwalù yau apyau'nokon wessaik. Utauchinpayaik mùkussatài'nùk wechi wakù pe pàk. Molopai ailon tetok auya'nokon Christ pàk wechi meluntà pe pàk.

⁶Christ Jesus yanùnsak auya'nokon eyepulu kon pe pàk emattàk kon iche iwettok yawàlà wei kaichalà ailon tetok auya'nokon yau.

⁷I'nak akalatatàk kon Christ yak. Ewemattok kon yapon pe nechii. Molopai meluntà pe lùiwa ewena kon pa ailon tetok auya'nokon yau, eyenupappù kon kasa. Molopai tenki tetok auya'nokon ke anùttàk kon.

⁸Elanneppeichi ettàk kon! Molopai ailon tetok auya'nokon kù'mattatak, kappon pukketù là yà'là pen molopai ennakantok tok uya penalok kon uya enupantok winà, molopai kawon kon akkwalù yamùk yeselu winàpaino là winà. Tùse Christ uya làkku enupantok yetatàk kon.

⁹Masapùla tamù'nawolon Katù yau nai'nùk wechi màlà Christ yau.

¹⁰Màlàpàk tamù'nawolon Christ winàpaino yesappe ewechi kon màlà, iponaloppe ewechi kon pàk. Eke kulu mùkkàlà itepulu akkwalù yamùk yentaino molopai apàikkeppe we'nàtok yepoino.

¹¹Christ ponaloppe ewechi kon yekama auya'nokon màlà ailon te auya'nokon ipàk winà. Eyesak kon yattà Ichu yamùk usattàtok yawàlà pùla. Tùse Christ uya attàntok winàpaino yentok ipàkàlà winà màlà àpùikattàsak kon àli ànkuppai àku'nài meluntàlù winàpai.

¹²Masapùla eusenpatauka kon yau, àwu'nattàppù kon màlà Christ pokonpe. Molopai usenpataukantok yau àwuluukappù kon nàlà màlà Christ pokonpe ailon tetok auya'nokon yai Katù yapàikketù yau. Iwuluukanàippù weli'nàtok yapai wema'nàtok yak yapàikettù yau.

¹³Ewelichak kon wechippù màlà masapùla tùmakuyi ke ewechi kon pàk, molopai Katù ponalok kon pe pùla ewechi kon pàk. Tùse Katù uya pàli'yau amasak kon màlà Christ pokonpe! Katù usentupasak màlà tamù'nawolon kùmakuyi kon pàk.

¹⁴Imenukasak lùppù winàkàik wannà “Ikasa pùla messaik”tawon, mokkappù ya màlà, molopai imattanùpùppù ya tamù'nawàlà kulu ipukapàtù tùuya pulusuk pona winà.

¹⁵Molopai màlà pulusuk po Christ uya itepulu ton àli akkwalù yamùk molopai apàikkek ton yentaikappù. Tok kupùppù ya tensan pe ayupo tok yentai tùwechi ke.

¹⁶Màlàpàk àli pe ànù'là kùsselupatak annapù kon wapùla eninchi kon pàk, wapùla Jew yamùk nùkupù tùnamasen kupù auya'nokon pùla iwechi pàk, uta'lettàntok yekkwa wapùla kapùi wepakkasak emennak pe yattai tùkussan, molopai tùnamasan Jew yamùk wàlàkkattok yattai nokon pàk.

¹⁷Tamù'nawolon sàlà yamùk màlà ewanawolok kon yakkwalùppù neken. Jesus Christ nen mùkkàlà ailon.

¹⁸Kappon yamùk là, wakù pe tukaik molopai àssà'mùla pe tukaik tùusennakasan molopai inchelù yamùk pàk tùwàpùlemasan tese'mu kon yok tùwenase eyennakatakù'nokon. Molopai alapumatakù'nokon e'mantok winàpai. We'neppà'nà walai yene tùuya'nokon pàk tùuselupasan mùkyamlo tùutapulà kon pe. Pùsamlo yekkwa ton ikasa pùla messatàik kùkkatak àpàkù'nokon. Ittutok ya pùnon mùkyamlo, pakko pe tùuselupasan masapùla kappon pe tok usenumenka pàk.

¹⁹Christ pùkkù pe tok wechi pen nen uchi màlà. Christ mùkkàlà esak ippai molopai esak meluntàlùttànài màlàpàk usese'muttàpà'nàtok, kala yamùk yapulànài tamùkke iku'nài pe Katù yapàikketù yau ichemokka tùse.

²⁰Ewelichak kon màlà Christ pokonpe màlàpàk àpùikattàsak kon màlà kawon kon akkwalù yamùk meluntàlù winàpai. Yà'là pe iwechi pàk sàlà yekkwa ton maimu yawolon kon amyamlo?

²¹“Sà pàk kettàu,” “Màlà kùsonpatàu,” molopai “Sà kùsappàttàu?” tawon.

²²Sàlà yamùk màlà tapulà ke tùupoippàtasan molopai tùumattasan, tapulàsen pe pùla nen uchi. Kappon nùkonekappù molopai enupantok tok uya ike neken nen màlà.

²³Sàlà yamùk maimu yawàlà we'nà usene ikasa kasa. Eke peiwa Katù pùnùnmatok auya'nokon pùikattà ya kasa iwechi molopai àsà pe pùla euchittu kon. Molopai àsà pe eyesak kon talumattà auya'nokon. Tùse eyesak wettok ànkuppai yapàikketùkkatok auya'nokon meluntàlù pùla iwechi màlà.