Read Patamona Colossians 3 Bible Online

Colossians 3 - Patamona bible

Colossians 3

¹Àwuluukasak kon man wema'nàtok yak Jesus Christ pokonpe. Eyewan kon uchi itùtàk kon màlà yamùk epùn po nai'nannùk pàk, Christ wettok chichiupe tapon po kamik pen Katù yemyatù winon namantok patassek winà.

²Eusenumenkatok kon ikuttàk kon màlà yamùk epùn po nainannùk pàk, sàlà motawon kon yà'làlà pàk pùla.

³Masapùla ewelichak kon man, molopai ewemattok kon yonansak man Christ pokonpe Katù yau.

⁴Christ mùkkàlà ewemattok kon kulu, molopai ichenpoika yau, amyamlo nàlà usenpoika màlà ipokonpe molopai yapulàtok yau ewechi kon màlà.

⁵Màlà yamùk àli ànkuppai we'nàtok ne'wotokomayai'nùk ayau'nokon inonkatàk kon. Àli imakuyippù kuttok esak ke, esuken pùla we'nàtok, ipàlika yentai àli ànkupai we'nàtok màlàwannà ke, tùuseka'nonkaik we'nàtok inonkatàk. (Masapùla tùuseka'nonkaik we'nàtok màlà tùulon katù yemlotopo wepeiman walai).

⁶Katù mùkkàlà tùwe'naikasen tùmaimu yawolon kon pen kappon yamùk pàk.[2]

⁷Molopai màlà kasa tùwemassan pe ewechippù kon màlà àli ton ànkuppai we'nàtok wechi ewemattok kon yau yau.

⁸Tùse sàlà pe sàlà yamùk inonkatàk kon: we'naikantok, tonpa yewan ma'làtok molopai àli pe we'nàtok, àsà wekkupù àtonpa winàkàik iche kettàu tùulon kon winàkàik. Kappon kù'mottùnpatàu, wapùla àli pe uselupantok kùsepakkatak anta kon yai.

⁹Echiwinàkàik kakaseitatàu, masapùla penalok eyeselu kon nonkappù auya'nokon màlà inkupù yamùk pokonpe.

¹⁰Molopai àmàlà pe emennak eyeselu yeposak auya'nokon nai'nùk. Pùsàlàichi mùkkàlà emennak kappon, Katù ikonekanàippù nùkonekayai'nùk tùkasa, enettok kon pe tùuya tùttutok kulu auya'nokon yak.

¹¹Màlàpàk, tùpatalà'ne we'nàtok Jew yamùk pen molopai Jew yamùk kùlottau pùla iwechi màlà, mùkyamlo Jew yattàtok yesak molopai ipùnon kùlottau, kaklan yamùk molopai àsà ton kappon yamùk kùlottau, apyoto ton molopai apyoto ton pen kùlottau. Tùse Christ mùkkàlà tamù'nawolon. Molopai Christ mùkkàlà tamù'nawolon yawon.[3] [4]

¹²Katù uya à'nùnma kon màlà molopai tùponalok kon pe kulu ayanùnsak kon ya. Màlàpàk esuken emattàk, tùusentuppaik, wakù pe, àssà'mùla, tenpe, molopai pàlikanài nan pe.

¹³Eyeselu kon tùpàlikaik ettàk, molopai ànù'là kappon pàk esentupatàk, ànù'là àkklottawon kon usàulàmasak tùulon kon winàkàik yau. Ànù'là pàk mesentupatàik Itepulu Jesus usentupasak àpàkù'nokon nai'nùk kasa làma.

¹⁴Molopai tamù'nawolon sàlà yamùk yentaino ke itonpattàtàk uchi'nùnmantok ke tamù'nawolon ku'nài tamùkke tewin.

¹⁵Tàwà echitonpa pe we'nàtok Christ nùtùlù eyewan kon yesappe nechii. Masapùla sàlà echitonpa pe we'nàtok yak Katù uya àkà'masak kon màlà tamùkke tewin itesak. Molopai tenki tawon pe ettàk kon.

¹⁶Tàwà Christ uya enupantok eyewan kon yau nechii tamù'nawàlà. Mepanamatàik molopai mepùikattàtàik tamù'nawolon ànùttu kon yawàlà. Tenki tetok itewan yau echii'ma meselenpatàik David yelemu pàk, Katù yapulànài elen mùkuttàk Wakù Akkwalù nùtùlùssan pàk meselenpatàik.

¹⁷Tamù'nawolon ànkupù kon wapùla euselupatok kon nekkupùik Itepulu Jesus yesek yau, tenki te auya'nokon pe mùkkàlà yai Katù Kùkàipùnù kon pàk.

¹⁸Tùtayappù kenan kon, atayappù kon yentai kekkuttàu, masapùla màlàichi màlà Christ ya'lon pe we'nà nùkupù.

¹⁹Tùnoppù kenan kon, ànoppù kon mù'nùnmatàik, molopai àsà pe tok pàk kettàu.

²⁰Mule yamùk, asan kon molopai àkàipùnù kon maimu yawàlà mettàik tamù'nawolon yau, masapùla sàlà màlà Itepulu yauchinpanài.

²¹Papai yamùk, àmunkà kon yamùk kùssakolopatàu, masapùla wakù kupùiche tok wechi pen nen uchi màlà.

²²Tepotolù kenan kon, eyepotolù kon maimu yawàlà mettàik tamù'nawolon yau, eyene neken tok uya pàk pùla, tok utauchinpatoppe neken àpàkù'nokon pùla, tùse ailon pe itewan ikuttàk Itepulu namatok auya'nokon ke.

²³Yà'làlà kupù auya'nokon yau, me'wotokomatàik tamù'nawàlà eyewan kon ke, Itepulu ponaloppe ewe'wotokoma kon kasa, kappon yamùk ponaloppe pùla.

²⁴“Itepulu uya ken uye'ma ko wakù ke lù,” mùkatàik; tùponalok kon ponaloppe inkupù yepolo auya'nokon màlà. Masapùla Christ kulu mùkkàla eyepulu kon iponaloppe me'wotokomayatài'nùk.

²⁵Molopai iwalai pen ku'nài, ànù'là, ye'ma màlà àli ton inkupù yepeppù pe; masapùla Katù mùkkàlà tamù'nawolon kon ku'nài ekkaichalà.