Read Patamona Colossians 4 Bible Online

Colossians 4 - Patamona bible

Colossians 4

¹Tapyoto kenan kon, ayapyoto kon mentàik, wakù pe ikasa inkupùppù yawàlà mùlepatàik. Amyamlo nàlà wechi epùn pon Itepulu ponaloppe tùttuse.

²Màpùlematàik tàwàlàlà. Enpen mettàik àwàpùlema kon yau, tenki teima Katù pàk.

³Màlà yattai nàlà ina pona màpùlematàik ina pùikattàtoppe ya. Molopai ina lepatoppe ya Tekale yekamatok ina uya yattai ke, Christ winàpaino Wakù Itekale pena ittusak lùppù pen yekamatoppe ina uya. Màlà pàkànsau sàlà patikichi tau wechi nai'nùk.

⁴Upùikatàtoppe ya màpùlematàik Katù wettok iche yawàlà kappon yamùk yelupatoppe uya wakù pe.

⁵Tùttuik melaikatàik mùkyamlo ailon tawonnan pen winàkàik tok kùlottau. Tamù'nawàlà eweyu kon yapulàtàk kon wakù pe.

⁶Tàwàlàlà euselupatok kon wakù pe nechii, àsà pe pùla enetapai we'nàtok pe. Molopai i'nai kasa là tamù'nawolon kon maimu yeitok ikasa tùttuik mettàik.

⁷Kùtonpa kon kulu Tychicus, tùusetakkasen pen apyoto molopai Itepulu Jesus wotokoyi yau we'wotokoman tonpa uya, tamù'nawolon uyekale yekama màlà àpàkù'nokon.

⁸Màlàpàk uchi yeunoko uya màlà apyakù'nokon, ayauchinpa tok kon pe ya atta là tamù'nawolon kon ina wemapù yekama tùuya ke.

⁹Ya'là Onesimus nùtàyan, wakù tùusetakkasen pen tonpa wannà kù'nùn molopai ailon, àtonpa kon. Tok uya tamù'nawolon talà nekussai'nùk yekama màlà àpàkù'nokon.

¹⁰Aristarchus, upokon pe patikichi tau nai'nùk, “Wakù pe na' messatàu?” nùkayan nàlà, Mark, Barnabas yesse. Yekamappù uya àpàkù'nokon. Iyàpù apyakù'nokon yau, manùntàik tùutauchinpaik.

¹¹Jesus, Justus tukaik tesassen, nàlà “Wakù pe na' messatàu?” nùkayan àpàkù'nokon. Pùsamlo neken mùkyamlo Jew yamùk tùwe'wotokomasan upokon pe Katù wettok itepulu pe ponaloppe. Molopai eke pe kulu uyewan ipippe tok wessak man.

¹²“Wakù pe na' messatàu?” nùkayan Epaphras àtonpa kon nàlà, molopai Jesus Christ yapyoto. Tùwàpùlemasen mùkkàlà tàwàlà eke pe àpona'nokon. Katù yekamapponài meluntà pe ewena kon pa tamù'nawàlà Katù yeselu yau tùwappùik molopai ittunài pe.

¹³Yekama uya iwe'wotokomasak sa'man pe àponalok kon pe yapulà uya sàlà, molopai kappon yamùk Laodicea pon kon molopai Hierapolis pon kon ponaloppe.

¹⁴E'nek ipittànài, u'nùn kulu Luke, molopai Demas tawonnan “Wakù pe na' messatàu?” nùkayan àpàkù'nokon.

¹⁵“Wakù pe na' messatàu?” tetok ina uya yekamatàk kon Laodicea pon kon Jesus pàk ailon tawonnan pàk, ulichan Nympha itesek molopai nàlà mùkyamlo tùwepilichan itùwùk tak pàk.

¹⁶Sàlà kaleta yene tùpo, Laodicea pon sochi uya yene mentàik. Molopai nàlà kaleta mentàik Laodicea neunokoppù apyakù'nokon.

¹⁷Molopai Archippus pàk sàlà mekamatàik: “Wotoko itùsak lùppù eyemyak Itepulu wotokoyi menuka'nùpùik kulu,” tukaik.

¹⁸Uyemyatù ke sàlà tùmenukayaik: Iulà Paul,“Wakù pe na' messatàu?” nùkayan. Patikichi tau uchi tàwà wechi mùttutàik. Wakù pe we'nàtok Katù winàpaino apyau'nokon nechii.