Read Patamona 1 Thessalonians 2 Bible Online

1 Thessalonians 2 - Patamona bible

1 Thessalonians 2

¹Amyamlo pe'nokon mùttuyatàik, utonpa yamùk, akakklanpatok kon ina uya wechippù iwoton pe pùla là pùla.

²Mùttuyatàik ina talumattàkapùppù molopai ina mottùnpapàtùppù Philippi po, ina uyàpù Thessalonica pona apyakù'nokon wapiya. Tùse ku Katù uya meluntà pe tùwettalipaik pùla uselupantok Wakù Itekale yekama pe yapàikkettù ke ina lepappù, eke pe lànen iwakkà'nài nan tùse.

³Màlàpàk apawanattàyatài'nùk ina Wakù Itekale yai wechi màlà ennakantok pokonpe là pùla, molopai àli pe là iteselu pùla, màlà tùse pùla ànù'là yennakaiche ina wechi pùla man.

⁴Tùse làkku ina uselupa nai'nùk Katù wettok iche kasa, masapùla ina yanùnsak ya nai'nùk molopai Wakù Itekale tùsak ya ina yemyak ina nekama pe. Kappon yamùk yauchinpaiche là ina wechi pen sàlà. Tùse Katù làkku anauchinpapai ina wechi, mùkkàlà ina yeselu ina yewan yau nai'nùk ittunài.

⁵Mùttuyatàik nàlà nen wakù ton nà mayin ke kappon yapulà pe tukaik là ina usennaka pùn Katù wechi màlà ina yekamanài pe molopai ina yennài pe tùuseka'nonkaik là ina wettok wapu woton pùla iwechi.

⁶Apulàntok kulu là iche ina wechi pùn ànù'là winàpai, ewinàpai’nokon nà wapùla tùulon kon nà winàpai.

⁷Màlà kasa lànen kan Christ neunokoppù lùssan pe ina uya ikupùppù eppaino sàlà tà. Tùse tenpe ina nettai apyau'nokon, wakù pe àsà pe pùla amai uya tùmunkà mainanpa kasa.

⁸Masapùla ina pùnùn pe kulu mettantàu màlàpàk nen uchi ina utauchinpasak nettai Wakù Itekale ke neken nà elepa kon pàk pùla. Tùse àkklottau’nokon nàlà emappai ina nettai à'nùnma kon ina uya pàk.

⁹Ewaik, mùttuyatàik, ina tonpa yamùk, sa'man pe ina we’wotokomappù. Ina we'wotokomappù wei kaichalà molopai ewalupàttawàlà, awanittàpa kon nà ina uya tukaik Wakù Itekale Katù winàpaino yekama tùuya’nokon yawàlà.

¹⁰Amyamlo mùkyamlo ina yennài nan nùssan molopai Katù nàlà mùkkàlà ina yennài, ina yeselu molopai ina welaikatok wechi wakù pe esuken molopai ikasa, amyamlo ailon tawonnan winàkàik molopai yà'là là iwalai pen woton pùla nettai.

¹¹Mùttuyatàik wakù pe ina wechippù tamù'nawàlà àpàkù'nokon papai wechi wakù pe tùmunkà yamùk pàk kasa.

¹²Eyelupatantàu ina emeluntàpa kon pe, eyewan kon ipik pe ina nettai molopai apawanattàtantàu ina, màlà Katù yauchinpanài pe wema'nàtok kasa ewemapù kon pa, Katù àkà'manàippù'nokon kon itepulu pe tùwettok molopai apulàntok tùuya ponaloppe ewechi kon pa.

¹³Molopai sàlà pàkànsau tàwàlàlà, tenki te màlà ina uya Katù pàk. Katù Maimu nessak ina uya apyakù'nokon yau, metatantàu molopai manùntantàu, kappon yamùk winàpaino pe là tùkusse pùla tùse Katù Maimu pe nen tùkusse itekale manùntantàu. Katù Maimu nen nai'nùk. Masapùla Katù we'wotokoma nai'nùk amyamlo ailon tawonnan tùpàk kùlottau.

¹⁴Utonpa yamùk, amyamlo winàkàik màlà lùppù nekuttai, Katù ponalok kon Judea pon kon, Christ Jesus ponalok kon winàkàik iwekkussak lùppù walai. Màlà lùppù talumattàntok Jew yamùk uya ailon tawonnan talumattàppù kasa mettalumattàtantàu apata yawon kon winà là kan.

¹⁵Mùkyamlo, Jew yamùk uya màlà Itepulu Jesus molopai Katù Maimu yenpoikannannùssan wànàppù molopai ina yenpakkappù tok uya. Katù yewanma pe màlà tok nùkupùppù wechi molopai tamù'nawolon kon pàk àsà pe Jew yamùk wechi.

¹⁶Tok wechippù nàlà ina yeleutanùpùiche Wakù Itekale yekama ina uya kappon yamùk Jew yamùk pen pàk tukaik, tok wepùikattà tukaik. Sàlà kasa màlà tamù'nawàlà eke pe tok makuyi wepilipù tok pona. Màlàpàk nen uchi Katù we'naikatok wepukakasak man tok pona.

¹⁷Utonpa yamùk, ina wepantakasak ewinàpai'nokon yau malalàichi, usenumenkantok nokon yau pùla tùse kappon pe echipyau we'nàtok yau, àli pe kulu apatappù kon wechippù ina pona molopai eyenpai'nokon ina tùse.

¹⁸Apyakù’nokon ennappo tu’ma pai ina wechippù Iulà, Paul, wechippù wennappo iche kulu tewin itekkwa neken nà pùla, tùse Settan uya ina utàtoppe ina kupù pùn.

¹⁹Amyamlo nen mùkyamlo, enpen ina wettok kon, ina utauchinpatok ipàkànsau, molopai ina utapulàtok ipàkàlà ina uselupatok yau, itepulu Jesus yemloto po iyàpù yattai.

²⁰Ewaik, ina utapulàtok kon amyamlo molopai ina yewan yapon ton amyamlo.