Read Patamona 1 Thessalonians 5 Bible Online

1 Thessalonians 5 - Patamona bible

1 Thessalonians 5

¹Utonpa yamùk, sàla yamùk wekkuttok yattai weyu pàk emenukatok kon uya ipàkànsau woton pùla man.

²Masapùla amyamlo pe mùttuyatàik Itepulu uyàpù Weyu uyàpù amak uyàpù ewalupàttau kasa.

³“Tamù'nawolon yà'là pe pùla là man, wakù pe, àsà pùla là” te kappon yamùk uya kùlottau, asse'ne mattantok uya tok yepolo màlà. Tok wepe pen. Nossan wechi'mosak tùwentu wapiya kasa.

⁴Tùse amyamlo, utonpa yamùk, mùttuyatàik, ewalupàttau pùla messatàik molopai màlà Wei uya eyepolo kon ittu auya'nokon pùla là amyamlo là tenumenkaik amak kasa là pen màlà.

⁵Tamù'nawolon kon amyamlo mùkyamlo kappon yamùk akkwa yawon kon, wei yakkwayi yawon kon. Ewalupà ponalok kon pen kùmyamlo.

⁶Màlàpàk uchi we'nùnnà'nokon kùsettak tùulon kon kasa, tùupakaik, nulà we'nà nechiik molopai tùttuik.

⁷Kappon yamùk tùwe'nùnsan ewalupàttau, molopai nàlà kappon yamùk tùwetùnsan ewalupàttau.

⁸Tùse weinai nokon nen kùmyamlo molopai tùttuik, ikasa usenumenkantok yesappe tùwessan yek kùmyamlo. Ailon tetok molopai uchi'nùnmantok yapulàpai'nokon uchi kùplopo kon wapu pe, molopai kùppai kon wapu pe wepùikattàntok pàk enpen we'nàtok kon itùpai'nokon.

⁹Masapùla Katù uya anùnnà'nokon wettalumattàntok kon pe tùwe'naikatok yau pùn, tùse anùnnàppà ya màlà wepùikattàntok yepotoppe Kùyepulu Jesus Christ yai,

¹⁰Iwelikchak lùppù mùkkàlà kùponalok kon pe wema'nà tok kon pe tamùkke ipokonpe, weli'nàsak yau wapùla pàli'yau we'nà yau iyàssak yattai

¹¹Sàlà kasa iwechipàk eyewan kon yau emeluntàtatàk kon molopai tùwepùikattàik ettàk kon sàlà pe memassatài'nùk kasa

¹²Ina apawanattàyatàu, ina tonpa yamùk, mùkyamlo àkklottau'nokon tùwe'wotokomasan nama kon pa, mùkyamlo Itepulu Katù nanùmùssan eyepotolù kon pe molopai eyenupannan yamùk pe nama kon pa.

¹³Tok inamatàk kon eke pe, molopai tok i'nùnmatàk tok wotokoyi pàkànsau. Echitonpa pe ettàk kon.

¹⁴Ina apawanattàyatàu ina tonpa yamùk,s tùwe'wotokomasan pen yekamappo kon pa, kuli'nau tùwessan meluntàtanùppù kon pa, attu'mùnon pùikattà kon pa, molopai tamù'nawolon kon kappon yamùk kùlottau ewemapù kon pa, tok pàk tùusetakkaik pùla.

¹⁵Ànù'là uya àli kussak ewinàkài'nokon yentak àli kupù auya'nokon tukaik ittu kon pa. Tùse tàwàlà wakù pe ettàk kon echiwinàkàik molopai tamù'nawolon kon pàk.

¹⁶Tùutauchinpaik mettàik tàwàlàlà.

¹⁷Tùwàpùlemaik mettàik tàwàlàlà.

¹⁸Tenki tukaik mettàik tamù'nawolon yau. Sàlà màlà Katù wettok ikupù auya'nokon iche, ewematok kon Christ Jesus ponaloppe ewemattok kon yau.

¹⁹Wakù Akkwalù kùssà’nùttàu

²⁰Katù nenpoikappù yekamatoppe pùla kù'nulunpatàu.

²¹Tamù'nawolon yà'làlà yau esenumenkatàk kon ittutok auya'nokon ike ke. Molopai tamùnawolon yà'làlà yau, ‘Sà ken àli pe naikko molopai sà wakù pe’ tetok auya'nokon ke wakù kupù kon pa.

²²Molopai miyà ettàk yà'là yekkwa là àli winàpai.

²³Tàwà Katù echitonpa pe we'nàtok ke lepanài àkonekai'nokon tamù'nawàlà tùponalok pe, esuken, wakù pe, tamù'nawàlà iwettùsak Katù piyak pe, tàwà ayakkwalù kon, eyesak kon, eyewan kon eusenumenkatok kon, nechii iwalai pen nà pùla, Kùyepulu kon Jesus Christ uyàttok yattai.

²⁴Katù, àkà'mayatài'nùk tùpyak uya ikupù màlà, masapùla ailon kulu mùkkàlà.

²⁵Ina pona nàlàichi, màpùlematàik, ina tonpa yamùk.

²⁶Itepulu yesek yau uchi tùutauchinpaik messepotàik euchi'nùnma kon yekama pe àtonpa kon ailon tawonnan pokonpe.

²⁷Apawanattàyatàu Iulà, Itepulu yapàikketù winà sàlà kaleta yekama kon pa tamù'nowolon kon kùtonpa yamùk, ailon tawonnan Jesus pàk pàk.

²⁸Tàwà wakù Kùyepulu Jesus Christ winàpaino nechii apyau'nokon.