Read Patamona 2 Thessalonians 2 Bible Online

2 Thessalonians 2 - Patamona bible

2 Thessalonians 2

¹Utonpa yamùk, Kùyepulu, Jesus Christ uyàttok molopai wepili'nàtok tamùkke ipyau we'nàtoppe pàk, apawanattàyatàu Iulà,

²asse'ne kulu là eusenumenkatok kon yau tùutaimelunpasan pe kettàu, wapùla, kettalipatàu Itepulu Weyu uyàssak man te pàk. Yattai pùla là Katù Yakkwalù nekamatai tawon pàk, wapùla yà'là yekkwa là panton pàk, wapùla ina nùmenukappù pe tukaik là ichekama pàk.

³Ànù'là eyennakatakù'nokon yà'là kasa là. Masa màlà Wei uyàpù pen màlà Katù yeyatonnon yesak usenpoika ponalà, mùkkàlà itùlù woton inmattatoppe.

⁴Yà'làlà, kappon yamùk wàpùlematok ipàk, iche pùla iwechi màlà. Molopai wepeiman nà inama pe wechi itewanma pe, tamù'nawolon màlà yamùk yentai iwekkupù màlà, molopai ità Katù yùwùk tak chichiu pe esse, eke pe ekkusse, molopai Katù pe tukaik iwekkupù màlà. ‘Iulà nen mùkkàlà Katù,’ te ya màlà.

⁵Ittu na' auya'nokon pùla nai? Tamù'nawàlà ku sàlà yamùk tekamatai àpàkù'nokon tà apyau'nokon wechi yau.

⁶Tùse sàlà pe iwekkuttoppe pùla mùkkàlà, Katu yeyaton non yesak molo man, molopai mùttuyatàik. Iwalai iweyu yattai ichenpoika màlà.

⁷Tùttusan pen Katù yeyaton non yesak yapàikketù tùwe'wotokoma pàk man, tùse tùwekkupù woton wekkupù pen màlà mùkkàlà iwakkà'nài yama ponalà.

⁸Màlàyau nen uchi ichenpoika màlà molopai Itepulu Jesus uya iwànà màlà tùwe'netukka ke, molopai nàlà tùuyàpù yau imattanùkkapù ya màlà tùusenpoika yakkwayi ke.

⁹Katù yeyaton non yesak uyàpù màlà Settan meluntàlù yau, molopai tamù'nawolon yà'là yekkwa ton nà tùkkussan yek pen kupù ya màlà, enumenkannan, molopai enalippan nan. Tùse, ennakantok pe iwotokoyi wechi màlà.

¹⁰Molopai yà'là yekkwa ton nà àli pe ennakantok tùuya yapulà ya màlà mùkyamlo tùumatta woton kon yennakatok tùuya ike pe. Tok umatta màlà masapùla tùwepùikattàtok kon iwinà pan ailon itekale yanùnsak tok uya pùla iwechi pàk molopai tù'nùn kon pe ikussak tok uya pùla iwechi pàk.

¹¹Sàlà kasaichi iwechi wenai Katù uya iwalai pen ennakantok meluntàlù yeunoko màlà tok yak, ailon pen pàk ailon tetoppe tok uya.

¹²Tamù'nawolon kon ailon tawonnan pen, ailon pàk tùse àli kupù pàk yauchin ton yepeppù pe màlà tok talumattà.

¹³Ina uya nen tenki te sàlà Katù pàk tàwàlà àpàkànsau'nokon, ina tonpa yamùk, amyamlo Itepulu nù'nùnma ton. Masapùla iwepyattà motapai Katù uya ayanùnsak kon màlà ewepùikattàtok kon yepolo kon pa, Wakù Akkwalù yapàikketù yai àkoneka tok kon pe, molopai ailon tetok auya'nokon ailon itekale pàk winà.

¹⁴Àkà'mappù kon ya màlà sàlà yak, Wakù Itekale ina nekamappù yai. Àkà'mappù kon ya màlà Kùyepulu Jesus Christ yapulàtok pùkkù wettoppe àponalok kon pe.

¹⁵Màlàpàk uchi ina tonpa yamùk ailon pe kulu ettàk kon, eyenupappù kon yawàlà, ina uya apanamappù kon tùnta kon yai, wapùla kaleta ina nùmenukappù yau là.

¹⁶Tàwà Kùyepulu kon Jesus Christ tùmàlà pe, molopai Katù Kùkàipùnù kon, kù'nùnmanàippù'nokon molopai wakù pe tùwettok yau kùlepanàippù'nokon tàwàlàlà meluntà ke molopai wakù enpen we'nàtok ke,

¹⁷eyewan kon meluntàpai, molopai emeluntàlùttài'nokon wakù kupù kon pa, molopai wakù pe ikasa euselupa kon pa.