Read Patamona 1 Timothy 1 Bible Online

1 Timothy 1 - Patamona bible

1 Timothy 1

¹Sàlà màlà kaleta Paul winàpaino. Katù Kùpùikattànài molopai Christ Jesus napyontàppù Iulà, Christ Jesus enpen we'nàtok ke lepanài neunoko pe.

²Timothy, ailon tetok yau umu kulu kasa tùwessen piyak unmenukappù. Katù Kùkàipùnù molopai Jesus Christ Kùyepulu uya elepatoppe wakù pe we'nàtok ke, usentupantok ke, molopai echitonpa pe we'nàtok ke wàpùlemayaik.

³Ephesus po ewechi iche wessaik, eyekamappoppù uya kasa Macedonia pona utà yau. Tùulon kon kappon yamùk ailon pen enupantok ke kappon yamùk yenupayan molo, molopai tok yeleutanùpù auya iche wessaik.

⁴Ailon pen panton yamùk molopai tukkan tùtamo kon yesek yamùk pàkànsau tùusàulàmatok kon nonkatoppe tok uya yekamakà, masapùla sàlà uya neken usàulàmantok nepù màlà. Katù wotokoyi ailon tetok yau tùkussen kupù yentai.

⁵Ailon uchi'nùnmantok pàk tok menupaik esukenan ewan yapai tùuyàsen, molopai tùwanmùla we'nàtok ewan yau yapai, molopai ailon tetok i'napailon kulu yapai.

⁶Tùulon kon welattàsak man sàlà yamùk winàpai molopai tok utassak man pakko pe uselupantok yak.

⁷Law pàk enupannan pe eppai tok man, tùse tùuselupatok kon ipàk ittu tok uya pùla man wapùla tùuselupatok kon ipàk wechi kulu là yà'là kasa ittu tok uya pùla ikupù tùuya'nokon kasa tok uchittu tùse.

⁸Ittu'nokon man Law wechi wakù pe, yapulàtok kasa yapulà yau.

⁹Sàlà ittutàk kon: Law wekkussak màlà wakù ton nà kappon yamùk ponaloppe pùla. Tùse Law yawolon kon pen ponaloppe, àli ku'nài nan, Katù yapulànnan pen, molopai àsà pe tùwessan ponaloppe, Katù pùnon, kappon yamùk tùkàipùnù kon wapùla tùsan kon wànnan ponaloppe, molopai kappon yamùk tùkkannan ponaloppe.

¹⁰Law menukappù nàlà màlà tùnoppù kon pen pokonpe tùwessan ponaloppe, kàyik pokonpe kàyik wechi ponaloppe, kappon yonanàinan pùlayatta yepotok kon pe tùuya'nokon ipàk pe ponaloppe, kasei pe tùwessan molopai ailon kasa tùukaseitasan kottù motau ponaloppe tùpatalà yà'làlà ku'nàinan ailon enupantok winàpai.

¹¹Màlàichi màlà enupantok yeposak itekale yau, uyemyak intùlùppù yekamatoppe uya, Wakù kulu Itekale Eke Katù winàpaino.

¹²Tenki ukayaik Christ Jesus Kùyepulu kon pàk, ulepanàippù meluntà ke uwotokoyi kuttoppe uya. Tenki ukayaik uyensak ya tùwe'wotokomasen yeppe pàk molopai uyanùnsak ya tùwotokoyi yak pàk,

¹³àli pe là nen uselupasak tùpàk tùse, tùtalumattà uya molopai tùmottùnpa uya tùse. Katù usentupappù màlà upàk, masapùla unkupù ittui'ma pùla welaika ikasa kasa pàk molopai ailon te uya pùla lùppù lànen tùse.

¹⁴Kùyepulu kon wessak wakù pe man upàk, upùlemasak ya man eke pe kulu ailon tetok molopai uchi'nùnmantok Christ Jesus yau nai'nùk ke.

¹⁵Sàlà màlà ailon wa tetok, tanùnsen pe kulu iwechi: Christ Jesus uyàpùppù sàlà wolù yak àliton pùikattàse. Iulà mùkkàlà tok yentai eke pe kulu àli ku'nàippù.

¹⁶Tùse ànù'là yentai àli pe kulu wechi pàk Katù usentuppappù màlà upàk tùwenukassen pen Christ Jesus wettok pàlikanài pe yentok ipàkàlà pe. Sàlà kupùppù ya màlà tùulon kon uya ailon tetoppe Christ pàk molopai tàwàlàlà wema'nàtok yepotoppe tok uya.

¹⁷Tàwàlàlà Kin pe tùwessen, tùumatta woton pen molopai yensak pen, tewinan Katù piyak, namantok molopai apulàntok tùlù màlà tàwàlà molopai tàwàlàlà! Emen.

¹⁸Umu Timothy, sàlà enupantok tùlù uya sàlà eyemyak. Katù Maimu uya Wakù Akkwalù yai yekamappù àpàk tùuselupa yau lùppù yawàlà iwechi màlà. Tàwà màlà mayin ewepanta'matok ike pe nechii, wakù ponaloppe ewepanta'ma yawà,

¹⁹ailon tetok auya eyewan yau nechii molopai tùwanmùla eyewan yau ewettok molo nechii. Tùulon kon wechippù ailon tetok tùuya'nokon maimu yawàlà pùla man molopai ailon tetok tùuya'nokon mattanùssak tok uya.

²⁰Tok kùlottau Hymenaeus man molopai Alexander, mùkyamlo untùlùssan Settan meluntàlù yemyak tok usenupatoppe, àli pe Katù pàk tùuselupa kon yeleutanùttoppe tok uya.