Read Patamona 1 Timothy 3 Bible Online

1 Timothy 3 - Patamona bible

1 Timothy 3

¹Sàlà màlà ailon mayin. Kàyik wechi sochi yesappe kulu eppai yau, iwalai wakù wotoko iche iwechi màlà.

²Sochi yesak wechi màlà àli pe ipantomù pùla, tewin neken inoppù, tùttuik tùwemassen pe, wakù pe itesek, wakù pe kakklan yamùk pàk tùwessen pe tùwùk tau, enupanài yeppe nàlà.

³Tùwetùnsen pe pùla, wapùla àsà pe tùwessen pe pùla, tùse yà'làlà pàlikanài pe molopai echitonpa pe, pùlayatta pùnùnmanài pe pùla.

⁴Tùwùk tawon kon yesappe molopai wakù pe tùmunkà yamùk ku'nài pe tùmaimu yawàlà, tùnamasen pe tùwettoppe.

⁵Masapùla ànù'là kàyik, tùmunkà molopai tùnoppù yesak pen molopai tok mainanpa tùuya ittunài pen wechi yau, yà'là kasa ken Katù sochiyi yesappe iwechi?

⁶Emennappe là Katù yemyak iwettùsak pe pùla , wakù pe tùwechi tùtonpa yentai pàk tùusenumenkasen pe iwechi tukaik, molopai tùtalumattùtok yepolo ya tukaik Makui, wechippù kasa.

⁷Tùnamasen pe iwechi màlà sochi tawon kon pen winà, iwekkuli'ma tukaik molopai iwekkawai'ma Makui uya tùppùlantok yak tukaik.

⁸Sochi tau pùikattànnan wechi màlà wakù pe iwemattok molopai ailon pe, tùusentaikaik eke pe kulu tùwuku inchinài pe pùla wapùla pùlayatta pàk tùuseka'nonkasen pe pùla.

⁹I'napailon ailon, Katù nekamappù lùppù kùpàk yawàlà tok nechii molopai iwalai kupùi tok tùwanmùla tùwettok kon pe.

¹⁰Tok ittu màlà wapiya molopai tùttutok yentakasak tok uya wakù pe yau, tok we'wotokoma màlà Katù wotokoyi yau.

¹¹Tok noppù wechi nàlà màlà wakù pe, àli pe tùuselupasen tùtonpa pàk pe pùla; wakù pe tùttuik tùwemassen pe, ailon pe tamù'nawolon yau tùwessen pe.

¹²Sochi tau pùikattànài wechi màlà tewin inoppù molopai tùnoppù, tùmunkà tawonnan yesappe molopai tok mainanpanài pe tùwessen pe wakù pe.

¹³Mùkyamlo wakù pe wotoko ku'nàinan wechi màlà wakù pe ipantomù, molopai ailon tetok ya Christ Jesus pàk yau tùnamasen pe iwechi.

¹⁴Sàlà menukai'ma, enpen wessaik uyàpù eyense pàk tachinpe kulu tùpo pùla.

¹⁵Tùse uko'mamù yau, sàlà kaleta uya atta we'nàtok Katù munkà yamùk pe yekama màlà, màlà nulànan Katù sochiyi tau, ailon wakapuli molopai itessek yekama uya.

¹⁶Ewaik lù'na'mà lù tetok pùn màlà ailon tetok kùuya'nokon eke kulu. Ichenpoikappù kappon pun yau, ailon pe iwechi yenpoikappù Wakù Akkwalù uya, molopai inchelù yamùk uya yeneppù. Kappon yamùk kùlottau Jesus yekale yekamappù màlà, tukkan kon kappon yamùk, wolù yawolon kon uya ailon teppù ipàk, molopai yanùmùppù epùn pona.