Read Patamona 1 Timothy 6 Bible Online

1 Timothy 6 - Patamona bible

1 Timothy 6

¹Tamù'nawolon kon tepotolù ke nai'nannùk tàwà tepotolù kon namai kulu, ànù'là uselupa àli pe Katù yesek molopai ina uya enupantok winàkàik tukaik.

²Ailon tawonnan pe tepotolù kon yamùk wechi yau tok poitolo ton i'nùmla tok kuttak, masapùla ailon tawonnan nàlà mùkyamlo. Wa tùse, tàwà tepotolù kon yapyoto pe tok nechii wakù peiwa, masapùla mùkyamlo nepùikattà yai'nannùk wechi ailon tawonnan pe molopai tù'nùn kon pe tok wechi pàk. Sàlà pàk kappon yamùk menupaik molopai sàlà yamùk mekamaik.

³Ànù'là uya tùpatalon, ailon pen enupantok yekama yau molopai ailon Kùyepulu Jesus Christ Maimu pàk molopai enupantok Katù winàpaino pàk ailon tawon pen.

⁴Mùkàlà wechi màlà tùtonpa yentai tùwekkussen pe molopai yà'làlà ittu ya pen màlà, àsàulàmapai molopai e'naikapai iwechi mayin yamùk pàk, molopai sàlà uya màlà kùlùmàlunnàtok nepù, tonpa yewan ma'làtok, ànù'là mottùnpatok, àli pe usenumenkantok.

⁵Molopai mùkyamlo usàulàma echipalà uya tok usenumenkatok mattanùssak màlà, molopai ailon pùnon mùkyamlo. Tukke mamin yesappe wenantok iwinà pe sàlà enupantok maimu yawàlà we'nà wechi pe yekama tok uya màlà.

⁶Ewaik, Katù ya'là we'nà màlà kappon manài eke pe, itesak pe we'nàtok pàk tenki tawon pe we'nà yau.

⁷Yà'là nepùppù ken kùuya'nokon wolù yak? Ipla! Yà'là yalà ken kùuya'nokon wolù yapai? Ipla!

⁸Màlàpàk, teipa ke molopai tùpon ke we'nà'nokon yau, màlà pàk tenki tawon pe we'nà màlà.

⁹Tùse mùkyamlo tukke mamin ichelok kon wena màlà tùttutok kon yak molopai tùpplantok kon yak molopai suwalai là àsà là ànkuppai we'nàtok, uya màlà kappon yamùk pàlàka mattantok kulu yak.

¹⁰Masapùla pùlayatta pàk ewan tùtok màlà tamù'nawàlà yà'là yekkwa àli uyàttok iwinà. Tùulon kon wechippù man enepopai kulu màlàyau tok utàppù miya ailon tetok winàpai molopai tok usewankono'mappù, màlà uya tok yewan ikkwàssaks.

¹¹Tùse àmàlà mùkkàlà, Katù ponalok kàyik, sàlà yekkwa ton winàpai ekkà. E'wotokomakà sàlà yamùk yepolo pa molopai ikasa, wakù pe, Katù yauchinpanài pe ewechi pa, ailon te toppe, àtonpa tù'nùnmaik, yà'làlà pàlika pa, molopai ten pe alomùla ewechi pa.

¹²Wakù pe epanta'makà ailon tetok auya yau meluntà pe ewechi pa, molopai tàwàlà wema'nàtok yepokà àponalok pe; masapùla sàlà wema'nàtok yak màlà Katù uya àkà'mappù “Ailon tawon Iulà ” tesak auya yau, tukkan kon yetannan yemloto po.

¹³Eyekamappo uya sàlà umaimu yawàlà ewechi pa Katù yemloto po, wema'nàtok tùnài tamù'nawolon yà'làlà yak yemloto po, molopai Christ Jesus, Pontius Pilate yemloto po wakù yekamanàippù yemloto po:

¹⁴Sàlà enupantok maimu yawàlà ekkà, molopai esuken ekkà molopai yà'làlà iwalai pen pùla, Kùyepulu Jesus Christ Weyu usenpoika ponalà.

¹⁵Wakù Katù mùkkàlà tewinan kulu Itepulu tamù'nawolon kon kin yamùk Kinù, molopai itepulu yamùk Yepulu.

¹⁶Mùkkàlà neken tewinan tàwàlàlà tùwemassen. Tùwemassen mùkkàlà akkwa ànù'là nepolo itenpatau pen. Ànù'là uya yensak pùla iwechi màlà, molopai ànù'là uya yene pen màlà. Tàwà mùkkàlà ponaloppe namantok molopai tàwàlàlà apàikkek pe we'nàtok nechii! Emen.

¹⁷Tukke itemamin nai'nannùk sàlà motau wema'nàtok yau yekamapokkà. Itekkwa pe tok kùsekkuttak molopai enpen tok kùsettak temamin kon sa'man pe pùla tùwe'lachimasen pe nai'nùk pàk, tùse Katù pàk làkku enpen tok nechii, mùkkàlà tùweleutàik pùla tamù'nawolon ke lepanyai'nùk tapulàsen pe nai'nùk ke.

¹⁸Wakù kuttoppe tok uya yekamakà, eke pe tùutauchinpaik tok wettoppe tùnkupù kon yau, alikyek pe tùwe'lepaik tok wettoppe ànù'là pokonpe.

¹⁹Sàlà kasa tok uya màlà temamin kon pilipù ewanawolok woton yapon pe molopai nen uchi tok uya wema'nàtok yepolo màlà ailon kulu wema'nàtok.

²⁰Timothy, màlà itùsak lùppù eyemyak ikukkà wakù pe. Katù pùnon uselupatok yà'là pen nà kùsetai, wakù kasa nùsetayai'nùk tùse iwalai pen enupantok.

²¹Masapùla tùulon kon kappon yamùk uya, ‘ittutok yesappe wessaik’, tesak man, ailon tetok tùuya'nokon ipàkàlà yenu'mappù tok uya màlà màlà pàkànsau. Wakù pe Katù wettok wechi tamù'nawàlà apyau'nokon màlà.