Read Patamona 2 Timothy 2 Bible Online

2 Timothy 2 - Patamona bible

2 Timothy 2

¹Àmàlà, umu, meluntà pe ekkà wakù lepantok yau kùponalok pe nai'nùk Christ Jesus yau.

²Enupan uya yawàlà uyetappù auya tukkan kon yemloto po. Sàlà lùssan uchi yekama auya iche wessaik ailon tawonnan pàk, mùkyamlo, tùulon kon yenupannan yek pàk.

³Ewettalumattàtok yanùnkà ina pokonpe, ailon Christ Jesus ponaloppe soicha kasa.

⁴Soicha yamùk mùkyamlo yà'là yekkwa là tùwotokoyi kon pen ku'nài pen tùse tepulu tanùnnàippù, anauchinpapaino kon kulu neken mùkyamlo.

⁵Aitun pe tùutàsen wenkalunnàtok yau uya tepeppù yepolo pen màlà, tùse aitun pe utàntok maimu yawàlà neken iwechi yau.

⁶Umà pànnài sa'man pe iwe'wotokomasak lùppù mùkkàlà tùnpàmàpù yepelu yeponài wapiya.

⁷Esenumenkakà wa ukayai'nùk pàk, masapùla Itepulu Jesus uya àkupù màlà tamù'nawolon sàlà yamùk ittu pa.

⁸Ittukà Jesus Christ iwe'wuluukasak lùppù weli'nàtok yapai wechi David pa pe. Sàlàichi màlà unekama wakù itekale.

⁹Molopai sàlà itekale yekama uya pàk wettalumattà nai'nùk, uyewattàsak nàlà kappon wànài yaulonsak kasa. Tùse Katù Maimu yewattàsak pùla man,

¹⁰sàlà wenai tamù'nawolon pàlika uya sàlà, Katù nanùmùssan kappon yamùk pàkànsau, tok uya nàlà wepùikattàntok Christ Jesus yau yepo toppe, tamùkke apulàntok tàwàlàlà pokonpe.

¹¹Sàlà màlà ailon kulu wa tetok: “Weli'nàsak kù'nokon ipokonpe yau, wema'nà'nokon nàlà màlà ipokonpe;

¹²yà'làlà pàlika pàk we'nà'nokon iponalok pe yau, itepulu pe nàlà we'nà'nokon màlà ipokonpe. ‘Ittunài pen Iulà,’ te'nokon yau, ‘Eyittunài pen Iulà,’ te ya nàlà màlà.

¹³Ailon pe pùla lànen we'nà'nokon ipàk tùse, ailon pe lùppù tùwessen mùkkàlà. Masapùla ailon pe pùla iwechi tùpàk pùla iwechi màlà,” tukaik.

¹⁴Àtonpa yamùk kappon yamùk yenu yapyontàkà sàlà pàk, molopai tùumayintaik tok yekamappokà Katù yemloto po tok wepanta'ma mayin yamùk pàkànsau tukaik. Wakù ku'nài pen màlà, tùse kappon yamùk yetannan mattanù'nài.

¹⁵Tamù'nawolon ànùttu ikukkà tamù'nawàlà auchinpantok Katù yenu yau yepolo pa, tùwe'wotokomasen tùwekuli'masen pen tùwotokoyi pàk kasa, mùkkàlà ailon Katù Maimu pàk enupanài ikasa kulu.

¹⁶Àli pe molopai pakko pe uselupantok winàpai ekkukkà, kappon yamùk yenpenài neken màlà mei lùiwa Katù winàpai.

¹⁷Màlà tok uya enupantok wechi màlà welei, pun yannài pe nai'nùk kasa. Asa'lon kon pùsamlo enupannan tok kùlottau: Hymenaeus molopai Philetus tawonnan.

¹⁸Tok utassak man ailon winàpai. Iwelichak kon we'wuluukakapùppù nen màlà pena nùkayan tok, molopai ailon tetok tùulon kon uya mattanùssan tok.

¹⁹Tùse meluntà sa'man wakapu Katù nùnonkappù tùutalo'ma woton pen màlà; molopai sàlà mayin we'menukasak màlà ipàk: “Itepulu mùkkàlà, tùponalok kon ittunài,” {Num16.5} molopai, “Ànù'là Itepulu yesek yesa'nài welattà màlà iwalai pen winàpai,” tukaik.

²⁰Eke tapùi tau molo pùsau yamùk tùwessen tùpatalo'nan: tùulon kon ikonekasak chilùpa molopai kolù yapai; tùulon kon ikonekasak yei molopai àinà yapai; tùulon kon wechi wakù ton pe yà'là yattai neken nà tapulàsen molopai tùulon kon echipalà tapulàsen pe.

²¹Ànù'là wekkupù wakù pe tamù'nawolon màlà yamùk àli ton winàpai yau, iwettùsak màlà molopai tapulàsen pe iwechi Tepulu ponaloppe, iwekonekasak wakù wotoko yau tapulà toppe.

²²Àli ànkuppai umoine wettok winàpai elattàkà molopai wakù pe we'nàtok pàk e'wotokomakà màlà yamùk yepolo pa, ailon tetok, uchi'nùnmantok, molopai echitonpa pe we'nàtok, mùkyamlo esuken itewan Itepulu kà'mayai'nùk tùpùikattà tok kon pe ya pokonpe.

²³Tùse pakko pe molopai ittunài pe pùla usàulàmantok winàpai ekkukà, mùttuyaik iwenukapù we'naikantok yau.

²⁴Itepulu yapyoto sakoloppe kùsettak. Tàwà wakù pe nechii tamù'nawolon kon pàk, enupanài yeppe molopai ese'mapai kùsettak

²⁵àsà pe tùwessan tùwinàik panamai àssà'mùla, Katù uya tok lepa tok upokoitatok ke yakan pe molopai ailon ittutok tok uya winàkàik tok welattà yakan pe.

²⁶Tok uyàpù màlà ikasa tùusenumenkatok kon yak molopai tok wepùikattà màlà Makui uya pùlannàtok molopai iche iwettok kuttok winàpai.