Read Patamona 2 Timothy 4 Bible Online

2 Timothy 4 - Patamona bible

2 Timothy 4

¹Tùumayintaik eyekamappoyan Iulà Katù yemloto po molopai Christ Jesus yemloto po, mùkkàlà tamù'nawolon kon kappon yamùk ittu woton, nulà nan kon molopai iwelichak kon: masapùla iyàttok molopai Itepulu pe iwettok woton pe iwechi pàk, eyekamappoyan Iulà

²Katù Maimu yekamakà, yekama pàk kulu ekkà, yekamatok yattai wechi ikasa tùse wapùla ikasa pùla tùse molopai tok imeluntàpakà, molopai tok makuyi yekamakà. Tùse nàlà tok yauchinpakà molopai tok panama auya yau kesemittàpai.

³Masapùla kappon yamùk wettok ailon enupantok enetapai pùla yattai uyàpù màlà, tùse yà'làlà ànkupai tùwetok kon kupù tok uya màlà, molopai tok uya tenupanài'nokon woton kon pilipù màlà tukke molopai tukke iwa enetapai tùpana kon uka'nàluntok yekama tok pe tok uya.

⁴Tok welattà màlà ailon yeta tùuya'nokon winàpai, molopai ailon pen panton winàkàik tùpana kon lattà tok uya màlà.

⁵Tùse tùuchittuik ekkà; ewettalumattàtok ipàlikakà, Wakù Itekale yekamanài wotokoyi ikukkà, molopai wakù pe àwotokoyi ikukkà tamù'nawolon yau.

⁶Iulà nen, utùtok yattai uyàssak man Katù ponaloppe, sàlà wema'nàtok nàntok uya yattai.

⁷Unùttu kussak uya man aitun pe utàntok yau, utàsak man tenuka'nùsse, ailon tetok uya kussak uya man.

⁸Sàlà nen uchi entaika'nàppà uya yepeppù uya umàmuku. Wakù pe we'nàtok yalùko, màlà Itepulu Katù ikasa ittunài uya ulepatok màlà Wei yattai. Molopai Iulà neken pen, tùse tamù'nawolon kon mùkyamlo ichenpoikatok màmussai'nannùk uchi'nùnmantok pokonpe.

⁹Ànùttu ikukkà àuyàpù pa upyak asse'ne.

¹⁰Màlà yamùk Katù winàpai lattànài nan kusan Demus tùwakùli pe molopai unonkappù ya man; ittàppù man Thessalonica pona. Crescens utàppù Galatia pona, molopai Titus utàppù Dalmatia pona.

¹¹Luke neken upyau man. Mark yepokà molopai inekkà aya'là, masapùla upùikattà ya màlà sàlà wotoko yau.

¹²Tychicus teunottai Ephesus pona.

¹³Àuyàpù yau, usakittiyi mùnepùik unnàmàppù Carpus piyau, Troas po; kaleta yamùk nàlà mùnepùik, màlà yamùk kulu imenukasak kon kamo pippà pàk.

¹⁴Alexander, ayan konekanài utalumattàtai kulu Itepulu Katù uya màlà inkupùpù yawàlà ye'ma.

¹⁵Elannek pe ekkà ipàk, masapùla àsà pe iwechi màlà kùnekama Wakù Itekale winàkàik.

¹⁶Ànù'là uya upùikattà pùn wapiyalok pe uselupa uponalok pe yau; tùse tamù'nawolon kon unonkatai. Tok winàkàik làkken ittu kùsettak te uya.

¹⁷Tùse Itepulu upyau nettai molopai ulepatai meluntà ke, tamù'nawàlà itekale yekama toppe uya kappon yamùk Jew yamùk pen uya yeta toppe; molopai Itepulu uya upùikattàppù “Palauya mùtapai.”

¹⁸Molopai Itepulu uya upùikattà màlà tamù'nawolon àli ton winàpai, molopai uyalà ya wakù pe itepulu pe tùwettok yak epùn pon yak. Apulàntok ipyau nechii tàwàlàlà molopai tàwàlàlà. Emen.

¹⁹“Wakù pe na' messatàu?” tetok uya teunossaik Priscilla molopai Aquila tawonnan piyak, molopai Onesiphorus yùwùk tawon kon piyak.

²⁰Erastus nà'nàntai Corinth po, molopai Trophimus tùnàntai Myletus po, masapùla e'neppe iwechi pàk.

²¹Ànùttu mùkupùik iko wapiya àuyàpù pa. Eubulus, Pudens, Linus, molopai Claudia tawonnan “Wakù pe na' messan?” tetok tùuya'nokon yeunossan, molopai tamù'nawolon kon tùulon kon ailon tawonnan Itepulu pàk, nàlà wa nùkayan.

²²Tàwà Itepulu nechii ayakkwalù piyau. Tàwà Katù wettok wakù pe nechii apyau.