Read Patamona Philemon 1 Bible Online

Philemon 1 - Patamona bible

Philemon 1

¹Sàlà màlà Paul nùmenukappù Philemon yemyak. Paul, yachisak pe nai'nùk Jesus pàkànsau, Timothy winàpaino nàlà sàlà. Kaleta menukasak ina uya sàlà ina wechi yakon molopai ina we'wotokoma tonpa kulu Philemon yemyak.

²Ailon tawonnan àyùwùk tak tùwepilichan piyak, kùpachi Apphia molopai kùtonpa soicha Archippus piyak.

³Tàwà Katù Kùkàipùnù kon molopai Itepulu Jesus Christ elepai'nokon wakù pe we'nàtok molopai echitonpa pe we'nàtok tùwinàpaino ke.

⁴Utonpa Philemon, wàpùlema yau tàwàlàlà, eyekamanài Iulà, molopai tenki tawon Katù pàk.

⁵Masapùla tamù'nawàlà kappon yamùk pùnùnma auya tukaik tetayaik, ailon tetok auya Itepulu Jesus pàk, yeta uya pàk.

⁶Wàpùlema sàlà wakù pe ailon tetok yai Christ ponaloppe ikupù nai'nùk usenpoikatoppe i'napailàiwa.

⁷Pùnùnmantok auya uya kulu eke pe uyauchinpasak man, utonpa, molopai umeluntàlùttàsak ya. Masapùla tamù'nawàlà Katù ponalok kon kappon yamùk yewan yenpakasak auya pàk.

⁸Sàlà winà tùwe'namaik pùlaiwa wechi eppaino, àtonpa pe Christ ponaloppe tùwekkusse, eyekamappo uya tùkussen kupù pa .

⁹Tùse làkku uchi'nùnmantok ukussan apawanattàtoppe uya. Sàlà tùkussaik amoko pe echi'ma Paul pe echii'ma, Christ Jesus ponaloppe tùuselupasen pe echii'ma molopai sàlà pe ipàkànsau yachichak pe echii'ma.

¹⁰Màlàpàk apawanattàyan Iulà Onesimus pàkànsau. Mùkkàlà umu Christ Jesus yau, masapùla patikichi tau echii'ma ikàipùnù pe wessak màlà Christ ittutoppe ya.

¹¹Pena yapulà auya yentai iwechippù màlà, tùse sàlà pe tapulàsen pe man asakklàma àmàlà molopai Iulà tukaik.

¹²Yeunottukka uya sàlà apyak, molopai ya'là uyewan nùtàyan.

¹³Patikichi tau wechi yawàlà upyau ànkupai wessaik Wakù Itekale yekama pàk, upùikattàtoppe ya apatassek yau.

¹⁴Eyeka'nonkapai pùla kan wessaik tà upùikattà pa, tùse eyiwalà làkku ikupù auya iche wessaik. Màlàpàk yà'làlà kupù uya pen sàlà, “Ewaik,” te auya ponalà.

¹⁵Yattai pùla Onesimus wechippù apyau pen sàlà malalà, tachinpe nen uchi tùwennapposak yau apyau tùwettoppe.

¹⁶Sàlà pe te'masen pe pùla tùwe'wotokomasen pe neken pùla man, tùse apyoto yentai: kùtonpa pe kulu man Christ yau. Màlà yentai man upona! Màlà yentai nen uchi àpona'nokon iwechi màlà Itepulu yau!

¹⁷Màlàpàk àtonpa pe ukupù auya yau, yanùnkà uyanùmù auya kasa.

¹⁸Yà'làlà iwalai pen kussak ya ewinàkàik yau, wapùla yà'làlà yanùnsak ya ewinàpai te'maik pùla yau, ye'matoppe uya ikukkà.

¹⁹Sàlà menuka uya sàlà uyemyatù ke: Iulà, Paul, uya eye'ma màlà. Uwomasak auya man àmàlà, ewemattok ke, màlà pàk là eyenu yappontà uya pen salà .

²⁰Màlàpàk, utonpa, sàlà tàwà ikukkà uponaloppe itepulu pàkàsau: uyewan yenpakakà utonpa Christ yesek yau!

²¹Sàlà menukai'ma unekamappoppù kupù auya pe kulu tùttuyaik molopai yekamappoppù uya yentai ikupù auya pe.

²²Màlà kupùi'ma, upatassek woton ikonekakà, masapùla Katù uya tùpawanattàtok auya'nokon yeiku pe tùttuyaik unnapo ya apyakù'nokon pe.

²³Epaphras patikichi tau nai'nùk upokon pe Christ Jesus pàkànsau, “Wakù pe na' messan?” nùkayan,

²⁴molopai nàlà we'wotokoma wechiyakon non Mark, Aristarchus, Demas, molopai Luke.

²⁵Tàwà Itepulu Jesus Christ winàpaino wakù pe we'nàtok nechii tamù'nawàlà apyau'nokon.