Read Patamona Hebrews 10 Bible Online

Hebrews 10 - Patamona bible

Hebrews 10

¹Law màlà wakù ton nùyàssai'nannùk yakkwalùppù neken, tùse ikasa kulu pùla iwechi. Masapùla ikasa kulu ànù'là Katù yapulàse tùuyàssan konekanài pen màlà. Màlà yamùk iwàsak kon molopai ipottàsak kon kamo yamùk wechippù màlà, màlà lùppù pe tàwàlàlà kilichimochi kaichalà.

²Sàlà yamùk wessak tùmeluntàlù ke kappon yamùk kuttoppe tùuya, wakù pe, imakuyi pùla yau, màlà yamùk weleutappù sàlà epaino molopai ikuttu'mappù pen. Molopai imakuyi ikolùkasak kon uchittuppù tu'ma àli pe lùppù pen epaino.

³Tùse làkku sàlà yamùk itùsak kon kilichimochi kaichalà wechippù kappon yamùk makuyi pàk tok yenu yapyontànài pe.

⁴Masapùla walawok paaka mùnù molopai kaapala mùnù uya àli kuttok winàpai pùikattàn yeselùkek pùla iwechippù.

⁵Màlàpàk, sàlà non pona tùuyàpù yau Christ uya Katù pàk, “Kamo yamùk tùwàse molopai tùpottàik eyemyak itùtok iche pùla messaik, tùse uyesak konekasak auya nai'nùk uponaloppe.

⁶Autauchinpasak pùla man kamo tùpottàse tùtùsen wapùla àli kussak pàkànsau tùtusen pàk.

⁷Màlàyau, ‘Talàichi wessaik, Katù, uyàssak man iche ewettok kuttoppe uya, Katù Maimu yau iwe'menukasak upàk kasa,” teppù uya.

⁸Wapiya wateppù ya, “Kamo yamùk wàtok tok pottàtoppe molopai itùtok eyemyak iche pùla messaik, wapùla kamo pottàsak tamù'nawàlà ipottàtok po àli kuttok pàkànsau tùtùsen pàk autauchinpasak pùla man.” Sàlà teppù ya màlà Law yawàlà lànen sàlà yamùk wechi tamù'nawàlà tùtùsan pe tùse.

⁹Màlàyau, “Talàichi wessaik Katù, uyàssak iche ewettok kutoppe uya,” teppù ya. Wapiyalok yamappù ya màlà ite'mappù pokon kuttoppe tùuya.

¹⁰Molopai Jesus Christ uya Katù wettok iche kussak pàk, esuken kùkussak kon màlà nai'nùk, tewin itekkwa tesak tùsak ya molopai itùtu'ma ya pen winà.

¹¹Paatele yamùk mùkyamlo satippe tùwessan màlà lùppù tùwotokoyi kon kupù pàk wei kaichalà, tùwàsan molopai tùpotàsan tùlù pàk tukke itekkwa. Tùse makui mokkaya pen.

¹²Tùse pùsàlà, Christ, uya tewin itekkwa neken tùwenukassen pen tùtùsen tùlùpù màlà makui winàpai pùikattànài pe. Màlàyau iweleutappù Katù laitanù yak.

¹³Màlà yau iwechi màlà Katù uya teyatonnon nonka tùtta yapon pe màmuku pàk.

¹⁴Tewinan uchi tùtùsen winà mùkyamlo kussak Christ uya man ikasa, esuken àli kuttok pùla tàwàlàlà.

¹⁵Masapùla Wakù Akkwalù uya nàlà yenpoikasak man kùpàkù'nokon ailon pe iwechi. Wapiya,

¹⁶“Sàlàichi màlà emennak ikupù pàk wekkuttok unkupù woton tok pokonpe, màlà wei yamùk ye'mappùtak, tawon Itepulu Katù. Law uwinàpaino tùlù uya màlà tok yewan yak, molopai imenuka uya màlà tok usenumenkatok pàk,” tawon Wakù Akkwalù.

¹⁷Màlàyau, “Tok makuyi molopai àli tok yeselu pàk usenumenka tu'ma pen màlà,” tawon mùkkàlà.

¹⁸Màlàpàk Katù usentuppasak àli kuttok pàk yattai, tùtùsan àli kuttok winàpai pùikattànài pe iche we'nàtukka pen nen uchi màlà.

¹⁹Màlàpàk, utonpa yamùk, utàn'nokon uchi màlà Katù wettok itau tak, Jesus mùnù winà.

²⁰Emennak molopai wema'nà ye'ma yakkokasak nai'nùk kùponalok kon pe, eke ichin pon pùkkùlùppù lùmà mùkkàlà Jesus yesak

²¹Eke kulu paatele Katù yùwuk yennài, yesappe we'nà'nokon man.

²²Màlàpàk uchi mei pùla Katù piyak uyà'nàpai'nokon, ailon pe itewan molopai ailon tettok Katù pàk yau ittui'ma kulu, àli winàpai ikukasappe kùyewan kon, molopai kùyesak kon ikukasappe esukenan tuna ke.

²³Enpen we'nàtok kùnekama kon pàk sa'man pe tùutachiik we'nàpai'nokon, masapùla ailon mùkkàlà Katù ikupù tùuya teppù tùuya lùppù kupù pàk.

²⁴Molopai uchi ittutàk kon iwalàwannà yà'là kasa là meluntàtantok kon pe, uchi'nùmantok molopai wakù kuttok winàkàik.

²⁵Wepili'nàtok tamùkke nonka'nokon kùsettak, tùulon kon nùkussai'nùk kasa. Tùse làkku, we'meluntàpanpai'nokon man eke peiwa, masapùla yene'nokon man Itepulu Weyu uyàpù mei pùla.

²⁶Ittui'ma wemakuiman pàk lùppù we'nà'nokon ailon itekale ittu tùpo yau, àli kuttok pàkànsau tu'ma itùlù woton wà'nànsak pùla iwechi màlà.

²⁷Tùse talipanài kulu neken wà'nànnsak màlà, talumattàntok pàk molopai apok Katù yeyatonnon pottàtok woton pàk.

²⁸Ànù'là, Law Moses winàpaino maimu yawàlà pùla iwessak lùppù welikùppù màlà usentuppan ipàk pùla, àli pe ittusak asa'lon kon wapùla àsolùwawon kon uselupatok winà yau.

²⁹Yà'là pe ken mùkkàlà wechi Katù Mumu yenpà'nài? Wakù pe esuken tùku'nài Jesus mùnù, Katù wekkuttok ikupù pàk ku'nài yà'làlà italumayippù kasa molopai Wakù Akkwalù, wakù ku'nài winàkàik àli pe tùuselupasen. Eke pe kulu tùtalumattàtok yepolo ya màlà!

³⁰Masapùla ittu'nokon man mùkkàlà, “E'manài Iulà, use'ma màlà,” tawon lùppù, molopai tu'ma, “Itepulu uya tùponalok kon kappon yamùk ittu màlà,” tawon.

³¹Àsà pe kulu màlà iwechi, tùwemassen Katù yemyak useimipon wechi!

³²Ittutàk kon pena ewechipù kon, Katù weyu utakkwakasak àpona'nokon tùpo, tukkan talumattàntok pàlikappù auya'nokon.

³³Ayupo àpàkù'nokon uselupa'nàppà àli pe molopai atalumattàppù kon molopai tùulon yattai sàlà kasa tùtalumattàsan tonpa pe ewechippù kon.

³⁴Patikichi tawon kon pàk eusentupappù kon molopai itesak pe ewettok kon mokkasak ewinàpai'nokon yau, ipàlikappù auya'nokon tùutauchinpaik. Masapùla tàwàlàlà tùuko'mansen wakù ton lùiwa yesappe ewechi kon ittu auya'nokon pàk.

³⁵Ailon tetok uchi auya'nokon ittutàk kon tàwàlàlà, masapùla eke kulu epeppù ne'nài màlà.

³⁶Pàlikannan pe ettàk kon, Katù yeselu kupù kon pa, molopai ikupù tùuya tetok ya yepolo auya'nokon màlà.

³⁷Masapùla Katù Maimu uya, “Mùkkàlà tùuyàssen uyàpù màlà, tachin pe iwechi pen kulu màlà.

³⁸Uponalok ikasa tùwessen wemapù màlà ailon tettok tùuya winà, tùse iwennapposak uwinàpai yau, utauchinpa pen màlà ipàk,” te kasa.

³⁹Mùkkyamlo iwennapposak kon molopai iimattasak kon walainon pen kùmyamlo. Tùse làkku ailon tawonnan kùmyamlo molopai iwepùikattàsak kon.