Read Patamona Hebrews 11 Bible Online

Hebrews 11 - Patamona bible

Hebrews 11

¹Ailon tetok màlà enpen we'nàtok kùnepolo kon pàk, ittutok kùuya'nokon ke lepanai yene pùla lànen tùse.

²Ailon tetok winà màlà penalok kon kappon yamùk pàk wakù pe Katù uselupappù.

³Ittu'nokon man ailon tetok winà tamù'nawolon wekonekappù Katù Maimu winà, molopai nùsenyai'nùk konekappù tùusensen pen yapai.

⁴Ailon tetok winà màlà Abel uya tùtùsen tùlùppù Katù yemyak wakù peiwa Cain nùtùlù yentai. Katù yauchinpappù ya màlà molopai intùlù lepantok ya ike uya, ikasa iwechi pe ittuppù Katù uya. Ailon tetok ya winà Abel uselupa lùppù màlà tùwelichak lànen tùse.

⁵Ailon tetok ya winà Enoch yanùmùppù màlà sàlà motau wema'nàtok yapai, weli'nàtok ittu ya tukaik. Iwessepoloppù pen màlà, masapùla Katù uya yanùnnsak pàk. Tanùmù wapiya Katù yauchinpanài pe iwechippù tesak màlà Katù Maimu uya.

⁶Ànù'là uya Katù yauchinpa ailon tetok pùla echii'ma pùla iwechi màlà. Masapùla ànù'là Katù piyak tùuyàssen wechi màlà ailon tawon pe molo iwechi pàk, molopai mùkyamlo tùwannnan ye'manài pe iwechi pàk.

⁷Ailon tetok winà iichene pùla tùse ewanawolok yau tùwekkuppù woton pàk tekamapposak yau Noah wechippù imaimu yawàlà. Kanau yamùppù ya molopai imàlà, itùwùk tawon kon tawonnan wepùikattàppù. Ailon tetok tùya winà wolù yawon kon wechi ikasa pùla yenpoikappù ya. Molopai Katù winàpai ikasa we'nàtok tùuyàssen yepoloppù ya.

⁸Ailon tetok winà Abraham wechippù màlà Katù Maimu yawàlà tùkà'masak ya yau, molopai iitàppù tùpata woton pe itùlù tùuya teppù Katù uya tùpàk yak. Tùpata nàmàppù ya i'nailà tùutà ittui'ma pùla.

⁹Ailon tetok winà iwemapùppù màlà kakklan kasa pata yau, itùlù tùuya teppù Katù uya lùppù yau. Tappulin yamùk tau iwemapùppù, Isaac molopai Jacob tawonnan wemapùppù kasa. Pùsamlo uya nàlà màlà ikupù tùuya teppù Katù uya lùppù yepoloppù.

¹⁰Masapùla pata yeneiche Abraham iwechippù màlà Katù nùttuppù molopai inkonekappù màmuku pàk, pata sa'man pata yamùtok ipo.

¹¹Ailon tetok Sarah uya yai, tùmeluntàlù yepoloppù ya tùumonotta toppe kokko pe lànen echii'ma. Katù pàk ailon teppù ya, ikupù tùuya teppù ya lùppù pàk.

¹²Abraham lànen amoko pe mei pùla weli'nàtok piyau tùse, pùsàlà tewinan kàyik winàpai tukke ipayan wechippù màlà chilùkà yamùk kak yawon kon kasa, molopai tukkan ittu yentaino palau yenapolon wàssàk kasa.

¹³Ailon tetok tùuya'nokon yau tamù'nawàlà pùsamlo kappon yamùk welikùppù màlà. Tok uya ikupù tùuya teppù Katù uya lùppù yepoloppù pen. Tok uya neken yeneppù meipai molopai tok utauchinpappù kulu ipàk. Tok uya kaklan yamùk pe molopai ipata pùnon pe tùwechi kon non po ittuppù nàlà màlà.

¹⁴Mùkyamlo sàlà kasa tùuselupasan mùkyamlo tùpata kon iwa tùuya'nokon yekamannan.

¹⁵Tùusenumenka kon màlà pata tùnnàmàppù kon pàk pe iwechi yau, tok wennappotok weyu wechippù sàlà eppaino màlà pata yak.

¹⁶Tùse làkku wakùiwa pata iche kulu tok wechippù sàlà non po pùla. Màlàpàk Katù wekkuli'ma pùla iwechi màlà tok Katùyi pe tesatù pàk, masapùla pata konekasak ya màlà tok ponaloppe.

¹⁷Ailon tetok winà Abraham uya, Katù uya tùttutok yau tùmu Isaac tùlùppù tùtùsen pe. Mùkkàlà Katù uya itùlù tùuya teppù lùppù yekamappù ipàk lùppù wechippù alikyek pe màlà tewinan neken tùmu tùlù pàk tùtùsen pe.

¹⁸Katù uya lànen, “Isaac yai apayan yepolo auya màlà,” tesak tùse.

¹⁹Abraham uya ailon teppù Katù wechi iwelichak wuluukanài pe pàk, weli'nàtok yapai Isaac mùnappo nulà Abraham uya kasa wechippù màlà.

²⁰Ailon tetok winà Isaac uya màlà Jacob molopai Esau tawonnan pùlemappù ewanawolok ponaloppe.

²¹Ailon tetok winà Jacob uya tùwelikù winàkàik tùwechi yau Joseph munkà yamùk pùlemappù molopai Katù namappù ya molopai yapulàppù ya tùtekessemu pona tùusessettàik.

²²Ailon tetok winà Joseph uselupappù tùwenukattok wechi mei pùla yau, Eygpt yapai Israel yamùk wepakkatok pàk. Molopai yà'là kasa tàppù lùppù kuttok yekamappù ya nàlà màlà tok pàk.

²³Ailon tetok winà iwentu tùpo Moses yan yamùk uya yonamùppù àsolùwau kapùi, masapùla wakù pe mule yene tùuya nokon pàk molopai kin maimu pàk tok usenalipappù pen.

²⁴Ailon tetok winà màlà Moses uya tùusemokkasak yau Pharaoh yenchi mule pe tesatù nulunpappù.

²⁵Katù ponalok kon kappon yamùk pokonpe làkku ettalumattàpai iwechippù, àli kuttok yau tùutauchinpa tachin pe kulu pùla yentai.

²⁶Iichenumenkappù màlà mottùnpantok pàlikatok Christ ponaloppe wechi tamù'nawolon Egypt pon mamin yentai kulu wakù pe pàk, masapùla ewanawolok e'mantok tùnepolo pàk tenu tùsak ya wechippù.

²⁷Ailon tetok winà Moses uya Egypt nàmàppù tùusenalippaik pùla kin we'naikatok pàk, masapùla tensen pen Katù yensak tùuya pàk sa'man pàlikappù ya.

²⁸Ailon tetok winà Entakantok kupùppù ya molopai mùn yappasa'mappù ya, weli'nàtok inchelùyi uya ànù'là wapiyalok Israel munkà wànà tukaik.

²⁹Ailon tetok winà Israel yamùk uya Ichuweyu Palau nukklà'nùpùppù a'mun non polo utàn kasa. Egypt pon kon wechi ikupùiche yau, tuna uya tok yeulankappù.

³⁰Ailon tetok winà màlà Jericho wekupili wekkawai'mappù, 7 pe kaichalà wei Israel yamùk utàpàtù iwoi tùpo.

³¹Ailon tetok winà màlà kàyik yamùk yemyak tùwechilanmasen Rahab wànàppù pen màlà Katù Maimu yawàlà iwessak kon pen pokonpe. Masapùla elaik yamùk yanùnsak ya pàk.

³²Molopai yà'là teuya màlà yentak sàlà? Gideon pàk uselupatok yattai pùla man, Barak pàk, Samson pàk, Jephthah pàk, David pàk, Samuel pàk molopai Katù Maimu yenpoikannan pàk.

³³Ailon tetok yai tok uya eke ton pata yamùk panta'mappù molopai yentaikappù tok uya. Ikasa nai'nùk kupùppù tok uya molopai ikupù tùuya teppù Katù uya yepoloppù tok uya. Palauya yamùk mùta yamùk yakkoloppù tok uya.

³⁴Àsà apok yà'nùppàtùppù tok uya màlà, molopai tok wepeppù kasupala walai ke tùwànà kon winàpai. Attu'mùla tok wechippù tùse meluntà pe tok wenappù. Meluntà pe nàlà tok wechippù màlà wepanta'mantok yau, molopai kaklan yamùk tùpanta'manài'nokon yentaikappù tok uya.

³⁵Nossan yamùk uya tùtonpa kon yamùk iwelichak kon nùssan wuluukatu'masak yepoloppù màlà. Tùulon kon welikuppù màlà àsà pe talumattàntok yo'no. Talumattàntok yapai mokkantok nulunpappù tok uya, wakùiwa wewuluukantok yepotoppe tùuya'nokon.

³⁶Tùulon kon mottùnpappù màlà molopai tok ippoppàtùppù. Molopai tùulon kon yaulonpàtùppù molopai tok tùlùppù patikichi tak.

³⁷Tok wànàppù màlà tàk ke, tok sala'mopàtùppù màlà asa'là, kasupala walai ke tok wànàppù. Tok usalàppù màlà kamo pippà yak tùwepontàse, kalinilu pippà wapùla kaapala pippà yau. Yà'là pùla tok wechippù, italumattàsak pe molopai imottùnpasak pe.

³⁸Sàlà non wechippù màlà wakù pe ma'le tok pona. Ipata pùnon kasa tok usalàppù wontaik yawà molopai wùk polo. Tok wemapùppù màlà tàk yeuta yau molopai non yeuta yau.

³⁹Pùsamlo ittuppù ailon tetok tok uya pàk. Tùse tamù'nawàlà ikupù tùuya teppù Katù uya yepoloppù tok uya pen màlà.

⁴⁰Katù uya wakùiwa epeppù kussak man kùponalok kon pe. Tamùkke nen uchi tok pokonpe ikasa kulu kùmatok kon pe.