Read Patamona Hebrews 13 Bible Online

Hebrews 13 - Patamona bible

Hebrews 13

¹Euchi'nùnmakon pàk lùppùichi ettàk kon echitonpa ton pe.

²Tùutauchinpaik kakklan yamùk yanùntok auya'nokon àwùk kon tak kùpputtàka'nùttàu. Màlà kasa tùwechi kon yau màlà tùulon kon uya inchelù yamùk yanùmùppù ittupe pùla.

³Patikichi tawon kon mùttutàik tok tonpa pe patikichi tau ewechi kon kasa tiuchittuik. Molopai mùkyamlo tùtalumattàsan, tok pokonpe ewettalumattà kon kasa.

⁴Tàwà tamù'nawolon kon wemali'mantok tùnamaik nechii. Molopai tàwàlàlà atayappù wapùla ànoppù kon winàkàik ailon pe ettàk. Masapùla Katù uya àli ku'nài nan tesak kon ke molopai tùnmali'mappù kon pen pokonpe tùwessan talumattà màlà.

⁵Pùlayatta à'nùn kon pe kulu kùkkuttàu, molopai tùutauchinpaik ettàk kon itesak pe ewettok kon pàk. Masapùla Katù uya, “Ànàmà kon uya pen màlà wapùla ànonka kon uya pen,” tesak màlà.

⁶Màlàpàk tùusenalipaik pùla, “Itepulu mùkkàlà upùikattànài, usenalippa pen màlà. Yà'là pe ken kappon uya ukupù?” tepai'nokon man.

⁷Ayanàinan ittutàk kon, mùkyamlo Katù Maimu yenpoikannan nùssan àpàkù'nokon. Yà'là kasa là tok wemapùppù ittutàk, molopai ailon tetok tok uya ipatakatàk kon.

⁸Jesus Christ mùkkàlà walai lùppù, ko'manyak, sàlà pe molopai tàwàlàlà.

⁹Tùpatalo'nan yà'là yekkwa ton nà enupantok kon ayatakù'nokon iwalai enupantok winàpai. Wakù pe iwechi màlà kùyewan kon wena meluntà pe Katù nùkupùppù wakù winà yau, kùyali tùnassen pe kappon nekama winà pùla. Masapùla mùkyamlo ina'nàinan nùssan pùikattànài pe pùla iwechi màlà.

¹⁰Tùtùsen tùlù yapon yesappe we'nà'nokon man. Tùse mùkyamlo paatele yamùk uya màlà ponùppù yanù yeselùkek pùla iwechi màlà.

¹¹Eke kulu paatele mùkkàlà kamo mùnù yanài Wakù Kulu Patassek yak itùse wemakuimansak ponaloppe, tùse imùnù imokkasak lùppù kamo yàkàpù pottà màlà pata yena po.

¹²Màlàpàk Jesus wettalumattàppù nàlà màlà pata yena po, esuken kappon yamùk konekatoppe tùuya tùmùnù yai.

¹³Màlàpàk uchi ipyak utànpai'nokon pata yena pona inpàlikappù wekkuli'mantok pàlikase.

¹⁴Masapùla tàwàlàlà tùuko'mansen pata pùla iwechi màlà sàlà non po, tùse ewanawolok yau tùuyàpù woton pata yeneiche we'nà'nokon sàlà.

¹⁵Jesus yai uchi Katù piyak apulàntok tùpai'nokon man, kùmaimu kon ke tenki tetok tùpai tàwàlàlà itesek pàk.

¹⁶Wakù kuttok uchi auya'nokon kùpputtàka'nùttàu molopai àtonpa kon pùikattàtok auya'nokon, masapùla sàlà yamùk yekkwa tùtùsan wechi màlà Katù yauchinpanài pe.

¹⁷Eyepotolù kon yamùk maimu yawàlà ettàk kon molopai tok uya enupantok ikuttàk. Eyene kon pàk tùwessan mùkyamlo, masapùla Katù pàk tùwotokoyi kon lùppù yekale yekama tok uya. Tok maimu yawàlà ewechi kon tok tewankono'maik pùla yau, tùwotokoyi kon kupù tok uya màlà tùutauchinpaik. Wapùla iwechi yau àpùikattàkon tok uya pen màlà.

¹⁸Ina pona àpùlematàk kon. Ina nùttuyan kulu wakù pe, tùwamùla we'nàtok yesappe ina wechi, molopai ikasa nai'nùk ànkupai tàwàlàlà.

¹⁹Màlàpàk apawanattàyatàu kulu Iulà àwàpùlema kon pa, uyeunottukka toppe apyakù'nokon asse'neiwa kulu.

²⁰Katù mùkkàlà lepanài echitonpa pe we'nàtok ke molopai Kùyepulu kon Jesus Christ wuluukanàippù weli'nàtok yapai. Jesus wechi nen uchi nai'nùk Eke Kalinilu yesak kasa, imùnù yapulàsak lùppù tàwàlàlà tùuko'mansen Katù wekkuttok ikupù pàk konekanài pe imunkà yamùk pàk.

²¹Tàwàichi Katù elepai'nokon tamù'nawolon wakù iche ewettok kon ke teselu kupù kon pa. Tàwà tauchinpanài kupùi kùyau'nokon Jesus Christ yai. Christ yapulàpai'nokon tàwàlàlà molopai tàwàlàlà. Emen.

²²Utonpa yamùk sàlà tokwennan kaleta menukasak uya man apyakù'nokon emeluntàpanài'nokon pe, màlàpàk tùusetakkaik pùla kulu metatàik.

²³Kùtonpa kon Timothy yenpakkasak patikichi tapai ittu auya'nokon iche wessaik. Asse'neiwa iyàssak yau, ipokonpe uyàpù màlà eyense'nokon.

²⁴“Wakù pe na' messatàu?” tetok ina uya itùtàk kon tamù'nawolon kon eyesak kon yamùk pàk molopai tamù'nawolon kon Katù ponalok kon kappon yamùk pàk. Ailon tawonnan nàlà Italy pon kon “Wakù pe na' mesatàu?” nùkayan.

²⁵Tàwà wakù Katù nùkupù tamù'nawolon kon amyamlo piyau nechii. Emen.