Read Patamona Hebrews 6 Bible Online

Hebrews 6 - Patamona bible

Hebrews 6

¹Wapiyalok kon enupantok Christ pàk nànpai'nokon man, molopai usemokkantok yak utànpai'nokon. Uselupan pàk lùppù we'nàpai pùla'nokon man, àli kùyeselu weli'nàtok ne'nài winàpài welattàntok molopai ailon tetok Katù pàk, pàk neken pùla.

²Molopai enupantok usenpataukantok pàk wapùla mùyak nonkatok kappon pona wapùla iwelichak we'wuluukatok, molopai Katù uya àli ton talumattàtok tàwàlàlà pàk neken pùla.

³Sàlà yamùk pàk uselupan yeleutanùppai'nokon. Usemokkanpai'nokon man. Ewaik, ikupù màlà. Katù uya ikuttoppe kùkupù yawàlà.

⁴Masapùla atta ken mùkyamlo àli kuttok yak iwennapposak kon wenappo tu'ma Katù winàkàik? Akkwa yene tùpo, Epùn poino lepantok yanùnnàinan nùssan pe echii'ma molopai Wakù Akkwalù pùkkù pe, yau tùwechi kon tùpo.

⁵Katù Maimu wechi wakù pe ittu tùpo molopai nùyàssai'nùk wema'nàtok meluntàlù nàlà ittu tùpo.

⁶Màlà tùpo tok welattàppù Katù winàpai àli kuttok yak. Yà'là là tok mùnappotok woton iwinà pùla iwechi màlà Katù winàkàik. Masapùla tùmàlà'nokon pe Katù Mumu pukapàttu'ma tok uya pulusuk pona pe iwechi màlà, iwelittu'ma toppe, molopai tok uya ikuli'ma tukkan kon kùlottau pe iwechi.

⁷Non, echipalà konok uta tùpona yu'nanài molopai kùyali yepetanù'nài tapulàsen pe, mùkyamlo imainanpannan ponaloppe. Katù uya non pùlemasak màlà.

⁸Tùse non, àmà'nà molopai àlitta yattanù'nài wechi màlà tapulàsen pe pùla molopai pa'nù'nàtok yau iwechi molopai iwenukapù pe iyatù màlà.

⁹Utonpa yamùk, sàlà kasa ina nùselupayan, wakù pe nai'nùk ken kuppù tok uya ko, màlà yamùk Katù nùpùikattàssan nùkupù te tùuya'nokon pàk.

¹⁰Katù mùkkàlà ikasa nai'nùk ku'nài. Àwotokoyi kon lùppù puttàka'nùpù ya pen màlà. I'nùnmatok auya'nokon enenpoikappù kon ipemonkono yamùk pùikattà pe molopai tok pùikattà pàk lùppù messatài'nùk.

¹¹Wakù kupù pàk ewettok kon ewemapù kon kaichalà iche kulu ina man iwenukappù ponalà, màlà enpen ewettok kon wechi ailon pe yenpoikanài pe.

¹²Emya'nek pe ewena kon iche pùla ina man, tùse mùkyamlo ailon tawonnan molopai pàlikannan, Katù uya ikupù tùuya teppù lùppù yeponnan kasa làkku mettàik.

¹³Abraham pàk màlà, ikupù uya tettok tùuya kupùppù Katù uya. Masapùla ànù'là eke, tentaino pùla iwechi pàk, tesek yau, “Ikupù uya màlà,” teppù ya tùmàlà pe.

¹⁴“Àpùlema uya màlà molopai elepa uya màlà tukke apayan ke,” teppù ya.

¹⁵Abraham wechippù màlà imàmuku pàk tùsetakkaik pùla, màlàpàk ikupù tùuya tetok Katù uya yepoloppù ya.

¹⁶Màlàpàk kappon mùkkàlà meluntà pe tùuselupa yau, ànù'là eke tentaino yesek yapulànài. Molopai walà usàulàmantok yeleutanùppù màlà, màlà mayin uya kappon yamùk kùlottau.

¹⁷Masapùla ikupù pàk tùwekkuttok wechi tùwemyakanmasen pe pùla enekamapai Katù wechippù màlà wakù pe. Mùkyamlo wakù ton tùwinàpaino yepolo woton kon pàk wateppù ya. ‘Ikupù uya teppù tùuya kupùppù ya màlà.’

¹⁸Màlàpàk sàlà yamùk asa'lon molo man, tùwemyakanmasan pen, Katù ukaseitatok ipàk pen. Wapiyalok ikupù tùuya tetok ya Abraham pàk molopai yakon pe meluntà pe wa teppù ya. Màlàpàk uchi kùmyamlo iwepesak kon pe nai'nannùk Katù piyak, epùikattàse umeluntàtasak man, utachinsak nokon enpen we'nàtok kùyemloto kon pona itùsak nai'nùk pàk.

¹⁹Sàlà enpen we'nàtok yesappe we'nà'nokon man kùyakkwalù kon yesseppe, wakù molopai meluntà kulu, kanau yessek walai. Iwewomù màlà wakù kulu patassek, kuyalikku solinkasak yentawinon yak.

²⁰Jesus wewomùppù màlà màlà motak kùpàkànsau'nokon. eke kulu paatele pe iwenappù màlà tàwàlàlà, Melchizedek yekkwa pe.