Read Patamona Hebrews 7 Bible Online

Hebrews 7 - Patamona bible

Hebrews 7

¹Pùsàlà Melchizedek wechippù màlà Salem kinù pe molopai Katù, paateleyi. Abraham wennappo kin yamùk tùkka tùpo yepoloppù ya màlà, màlàyau ipùlemappù ya.

²Abraham uya ilepappù màlà tamù'nawolon itesappe tùwettok tonpa ke, tewin'ne 10 pa'nan yapai. Wapiya Melchizedek yesek uya “Ikasa we'nàtok Kinù,” te màlà. Molopai nàlà Salem kinù pe iwechi pàk, itesek uya “Echitonpa pe we'nà Kinù,” te màlà.

³Melchizedek kàipùnù wapùla ichan yekale pùla iwechi màlà, wapùla itamokolù yamùk là. Iwentuppù yekale là pùla iwechi màlà wapùla iwelikùppù là yekale pùla. Katù Mumu kasa iwechi màlà. paatele pe iwechi tàwàlàlà.

⁴Menyatàik uchi eke pe iwechippù! Abraham, kùtamo kon uya ilepappù màlà, tewin 10 pa'nan tamù'nawolon yapai, wepanta'mantok yau tùnepoloppù ke.

⁵Mùkyamlo Levi payan, paatele pe iwenasak kon yekamappoppù màlà, tewin'ne 10 pa'nan yapai yà'làlà yepotoppe tok uya tùtonpa yamùk winàpai Law yawàlà. Abraham pa pe nàlà lànen tùwechi kon tùse.

⁶Melchizedek wechippù màlà Levi pa pe pùla, tùse, tewin'ne 10 pa'nan yapai yà'làlà yepoloppù ya màlà Abraham winàpai molopai Abraham pùlemappù ya, mùkkàlà ikupù tùuya teppù Katù uya lùppù yeponài.

⁷Ailon kulu màlà, pùlemantok tùnài wechi màlà eke peiwa pùlemantok yeponài yentai.

⁸paatele yamùk mùkyamlo tewin'ne 10 pa'nan yapai yà'làlà yeponnan tùse tùwelichan, tùse Melchizedek uya màlà yepoloppù molopai Katù Maimu uya màlà pàli'yau iwechi yekamasak.

⁹Molopai Abraham uya tewin'ne 10 pa'nan yapai yà'làlà itesappe tùwettok tùlù yau yekamappù kasa. Levi uya nàlà màlà itùlùppù Abraham yai.

¹⁰Masapùla Levi wentusak pùla lùppù iwechippù màlà, tùse molo iwechippù tùkàipùnù yesak yau, Melchizedek uya Abraham wakkàtù yattai.

¹¹Masapùla Levi yamùk yo'no Law yanùmùppù màlà Israel pon kon uya. Molopai ikasa kulu Levi wettok paatele pe wotokoyi wessak yau, tùpatalon paatele usenpoika iche we'nàppà pen sàlà eppaino. Pùsàlà mùkkàlà Melchizedek wettok walai paatele Aaron payan yai pùla.

¹²Masapùla paatele pe we'nàtok wemyakanmasak yau, Law wemyakanma kulu nàlà màlà.

¹³Ipàk uselupan'nokon nai'nùk mùkkàlà Kùyepulu kon. Levi pa pen mùkkàlà. Itamo yamùk wechippù là paatele pe pen màlà.

¹⁴Ittu man, Judah pa pe iyàpùppù. Molopai Moses uya Judah payan yesatùppù pen màlà paatele yamùk pàk tùuselupa yau.

¹⁵Sàlà nenayan tùttuseiwa, tùpatalon paatele usenpoikasak pàk, Melchizedek yekkwa.

¹⁶Mùkkàlà yanùmùppù pen màlà Law yawàlà itamo pàkànsau. Tùse paatele pe iwenappù màlà ànù'là nùmattanùppù pen làkku wema'nàtok meluntàlù yai.

¹⁷Masapùla Katù Maimu uya, “Àmàlà mùkkàlà paatele tàwàlàlà Melchizedek yekkwa,” te sak.

¹⁸Penalok usenupantok nonkappù màlà, masapùla attu'mùla molopai tapulàsen pe pùla iwechi pàk.

¹⁹Masapùla Law uya yà'làlà konekasak ikasa kulu pùla iwechi màlà. Molopai sàlà pe wakùiwa enpen we'nàtok ke kùlepasakù'nokon man, màlà yai nen uchi tùuyàssan kùmyamlo mei pùla Katù piyak.

²⁰Katù uya tùmàlà pe, ikupù uya tetok tùuya kupùppù màlà pùsàlà yanùmù patele yamùk pe yau. Tùse màlà kasa pùla tùulon kon masak màlà paatele pe. Tùse Jesus wenappù paatele pe, Katù uya ipàk, “Itepulu uya, suwa ikupù uya màlà tesak man molopai tùusenumenkatok mùyakanma ya pen màlà, ‘Paatele pe ewechi màlà tàwàlàlà,’ ” teppù.

²²Wa iwechi pàk Jesus kussak màlà wakù peiwa, “Ikupù tùuya tetok Katù uya,” yentok ipàkàlà pe, wapiyalok lùppù kasa pùla.

²³Màlà neken pen, tùse, pena paatele yamùk wechippù màlà tukke, masapùla tok welippàtùppù tàwàlàlà tùwotokoyi kon kupù tok uya pùla.

²⁴Tùse Jesus mùkkàlà tùwemassen tàwàlàlà, molopai iwotokoyi paatele pe iwettok màlà tùulon yemyak tùtùsen pen.

²⁵Màlàpàk mùkyamlo Katù piyak tùuyàssan tùwinà pùikattànài kulu mùkkàlà tamù'nawàlà. Masapùla tàwàlàlà tùwemassen mùkkàlà Katù pawanattàtoppe tùuya tok pàkànsau.

²⁶Jesus mùkkàlà eke kulu paatele iche kulu we'nàtok. Wakù, iwalai pen nà pùn, esukenan molopai yamasak mùkkàlà tùmakuyi kenan kon winàpai, molopai yanùnsak lùppù epùn yepoi.

²⁷Tùulon kon eketon kulu paatele yamùk walai pen mùkkàlà, iwotokoyi pen màlà kamo wànà wei kaichalà, wapiya tùmakuyi ponaloppe molopai kappon yamùk makuyi ponaloppe. Pùsàlà wettùlùppù màlà tewin itekkwa tamù'nawolon kon ponaloppe.

²⁸Law màlà, tattu'mùnù kenan kon kappon yamùk yanùnnài eke patele pe tok wettoppe. Tùse Katù uselupatok meluntà pe uyàpùppù màlà Law ye'mappùtak, Tùmu yanùmùppù ya màlà tùwùk yesappe iwettoppe. Ikasa iwekonekasak tàwàlàlà.