Read Patamona Hebrews 8 Bible Online

Hebrews 8 - Patamona bible

Hebrews 8

¹Sàlàichi màlà ina wettok yekama iche. Pùsàlà, eke kulu paatele, yesappe we'nà'nokon man. Mùkkàlà chichiu pe tùwessen kamik pen winà Katù eke pe tùwessen yapon piyau epùn po.

²Tùwe'wotokomasen mùkkàlà Katù yùwùk tau, Tappulin Katù ponalok kulu tau. Sàlàichi màlà tapùi Itepulu namùppù, kappon namùppù pen.

³Tamù'nawolon kon eketon kulu paatele yamùk pe tùwessan mùkyamlo yanùnsak kon, lepantok tùnnan pe, molopai kamo yamùk tùnnan pe Katù yemyak, màlàpàk uchi pùsàlà nàlà wechippù màlà yà'làlà yesappe tùntùlù woton.

⁴Non po iwessak yau, Katù yùwùk yesappe iwechippù pen sàlà epaino, masapùla paatele yamùk wechi molo pàk lepantok tùnài nan Law yawàlà.

⁵Màlà tok we'wotokomatok itau, Katù yùwùk yesappe, wechi màlà epùn yau nai'nùk patakatok pe wapùla yakkwalùppù pe neken, wa iwechi pàk Moses yekamappoppù màlà iwekoneka tappulin kali'maya tùse, “Tamù'nawolon uchi mùkonekaik wùk po yenpoikasak lùppù àpàk kasa,” tukaik.

⁶Tùse Jesus wotokoyi wechi màlà non pon kon Eke paatele yamùk wotokoyi yentai. Màlà kasa emennak wakù ikupù tùuya teppù Katù uya yenpoikanài pe iwechi màlà ipoippà yentai. Katù molopai kappon yamùk yakkletau Jesus wechi màlà.

⁷Wapiyalok ikupù pàk wekku'nàtok Katù molopai kappon yamùk yakkletau wessak wakù pe kulu yau, tùulon ikupù pàk wekku'nàtok iche we'nàppà pen sàlà epaino.

⁸Tùse Katù utauchinpasak pùla iwechippù màlà tùponalok kon kappon yamùk pàk, “Wei nùyàssan, emennak ikupù pàk wekkuttok kuttok uya yattai Israel pon kon pokonpe, molopai Judah kok pokonpe,” te tùuya yau.

⁹“Ikupù pàk wekkupùppù tok tamo yamùk pokonpe, Egypt yapai tok yemyatù pàk tok yalà uya yattaino kasa pùla iwechi màlà. Ikupù pàk wekkupùppù tùpokonpe'nokon yawàlà ailon pe tok wechippù pen, màlàpàk tok winàpai welattàppù màlà,” te.

¹⁰“Sàlàichi màlà ikupù pàk wekkutok, kappon yamùk Israel pon kon pokonpe màlà yamùk wei tùpo. Law tùlù uya màlà tok usenumenkatok yak, molopai imenuka uya màlà tok yewan pàk. Tok Katùyi pe wechi màlà, molopai uponaloppe tok wechi,” te.

¹¹“Ànù'là uya takontalù wapùla tùtonpa yenupa pen màlà, ‘Itepulu Katù ittutàk kon,’ tukaik, masapùla tamù'nawàlà tok uya uyittu màlà, i'nai yekkwa pe là echii'ma, italumayippù motapai eke ponalà.”

¹²“Tok uya àli kuttok pàk usentuppa màlà. Molopai tok makuyi pàk usenumenka tu'ma pen màlà,” teppù ya.

¹³Emennak pe ikupù pàk tùwekkuttok pàk tùuselupa winà, Katù uya wapiyalok kussak penalok pe màlà. Molopai yà'làlà nùpoippàtayai'nùk wapùla tapulàsen pe pùla nai'nùk waliwomù màlà.