Read Patamona James 2 Bible Online

James 2 - Patamona bible

James 2

¹Utonpa yamùk! Atta ken ewemapù kon ailon tawonnan pe Christ Jesus, tùnamasen Itepulu yau, temamin kenan kon yanùmù auya'nokon molopai entuppa'no, yà'là pùn nulunpa auya'nokon yau?

²Kappon uyàpù wepili'nàtok itak tak tùwepontàse epekkek pon yau, molopai epekkek kolù lin itemyatù pàk, molopai màlà yattai làma tùulon kappon uyàpù yà'là pùn iwepontàsak ichàpùttùmùnkasak sa'ne pon yau,

³wakù pe ewechi kon inama pe mùkkàlà wakù pe iwepontàsak pàk molopai, “Sàlà wakù aponnok pona eleutakà sàlà motau,” te auya'nokon ipàk, tùse entuppa'no, yà'là pùn pàk, “Satippe ekkà wapùla chichiu pe ekkà non po utta piyau,” te auya'nokon,

⁴sàlà kupù auya'nokon yau uchi tùpatalà'ne we'nàtok mùkussatàik àkklottau'nokon molopai àli pe eusenumenkatok kon winà messatàik.

⁵Yetatàk kon, utonpa yamùk! Katù uya entuppa'nokon, yà'là pùnon kappon yamùk sàlà wolù yawon kon yanùnsak màlà eke pe ailon tetok yesappe tùwessan pe molopai Katù wettok itepulu pe yesappe tok wettoppe itùlù tùuya tù'nùnmannan yemyak teppù ya lùppù.

⁶Tùse entuppa'nokon nulunpannan amyamlo! Ànùk ken atalumattànnan molopai ayanàinan ittunài yemloto pona? Temamin kenan kon uchi!

⁷Pùsamloichi mùkyamlo tùuselupasan àli pe wakù eyesek Katù uya elepatok kon winàkàik.

⁸Iwalai kupù auya'nokon pe iwechi màlà enupantok Katù nùtùlùppù itepulu pe iwettok kon itepoi yemyak maimu yawàlà ewechi kon yau, Katù Maimu yau iwesseposak lùppù, “Kappon i'nùnmatàk kon euchi'nùnma kon kasa,” tawon.

⁹Tùse tùmenkaik neken awakùli pe kappon yamùk kupù auya'nokon yau, ewemakuima kon màlà molopai Law maimu yawàlà pùla ewechi kon ikkwà'nài auya'nokon.

¹⁰Masapùla kappon wechi tamù'nawolon Law maimu yawàlà, tùse tewinan itonpa ikkwàtù ya, màlàyau tamù'nawàlà kulu ikkwàssak ya màlà.

¹¹Masapùla mùkkàlà lùppù, “Anmali'mappù kon pen pokonpe kettàu,” tawon uya, “Kappon wànài pe kettàu,” tesak nàlà màlà. Anmali'mappù pen pokonpe pùla lànen ewechi tùse, Law ikkwà'nài pe ewenasak màlà kappon wànài pe ewechi yau.

¹²Eselupatàk kon molopai elaikatàk kon kappon yamùk pe tùttusan woton kon pe Law maimu winà kappon yamùk nonkanài molopai tok mokkanài winà.

¹³Masapùla Katù uya usentuppantok yenpoika pen màlà kappon ichentuppasak lùppù pen pàk “Àli pe messaik wapùla wakù pe messaik” te tùuya yau; tùse usentupantok màlà “àli pe messaik wapùla wakù pe messaik,” tawon yentaikanài.

¹⁴Utonpa yamùk! Yà'là ken wakù molo nai kappon uya, “Ailon tetok yesak Iulà,” te yau, iwelaikatok uya yekama pùla iwechi yau? Màlà ken na' ailon tetok uya ipùikattà?

¹⁵Ànù'là kàyik wapùla nossan wechi ipon pùla molopai iteipa pùla yau,

¹⁶molopai, “Tàwà Katù wakù kupùi àponaloppe! Kàkàmittai molopai mata'letàtàik wakù pe kapàkkattàu!” te auya'nokon tok pàk. Yà'là yekkwa ken wakù molo nai tok lepai'ma pùla pon ke molopai kùyali ke iwettok yau?

¹⁷Sàlà kasa ichi ailon tetok wechi màlà: tewincha iwechi yau, yà'làlà tùkusse pùla molopai iwelaikatok pùla iwechi yau iwelikkassak màlà.

¹⁸Tùse tùulon uya, “Ailon tetok yesappe messaik, molopai welaikantok yesappe wessaik,” te wakù lùkkwà là kupùi'ma pùla. Yeitok uya màlà, “Yekamakà upàk yà'là kasa ailon tetok yesappe ewechi iwelaikatok pùla; yekama uya kulu àpàk ailon tetok uya wechi iwelaikatok pokonpe,” tukaik.

¹⁹Ailon tawonnan amyamlo tewinan neken Katù wechi molo pàk. Wakù pe man! Àli yakkwalù yamùk nàlà mùkyamlo ailon tawonnan, molopai ippla tùkùtùkù pe tùwettalippasan tùplànài'nùnsan.

²⁰Pakko kappon! Yekama na' àpàk iche messan ailon tetok wechi iwelaikatok pùla là tapulàsen pe pùla?

²¹Atta ken kùtamo kon Abraham yanùnsak wechippù ikasa Katù pokonpe? Iwelaikatok pàkàlà iwechippù màlà, tùmu Isaac tùlùppù ya Katù ponaloppe tùpottàsen patassek pona yau.

²²Yene na' auya'nokon pùla nai? Ailon tetok ya molopai iwelaikatok we'wotokoma tamùkke asakklàma, ailon tetok ya wekonekappù màlà wakù pe kulu iwelaikatok pàkàlà.

²³Molopai iwekkupùppù Katù Maimu uya wa teppù kasa, “Abraham uya ailon teppù Katù pàk, ailon tetok ya pàkànsau Katù uya yanùmùppù wakù pe iwechi pàk,” tukaik. Molopai Katù uya yesatùppù, “Uwechi yakon Abraham,” tukaik.

²⁴Màlàpàk uchi menyatàik kappon yanùmù ikasa Katù pokonpe inkupù pàkànsau molopai ailon tetok ya pàkànsau neken pùla.

²⁵Màlà kasa nàlà àli nossan Rahab itesek wechippù màlà. Ikasa Katù pokonpe iwelaikatok pàkànsau ikasa yanùmùppù, Israel yamùk, elaik pe tùwessan, mayin yekamannan yanùmùppù ya tùutauchinpaik molopai tok pùikattàppù ya tùulon asanta tawà tok wennappo toppe winà.

²⁶Màlàpàk kappon, yakkwalù pùn, wechi ekek pe, kasa làma nàlà ailon tetok wechi màlà nulù pùla, iwelaikatok pùla iwechi yau.