Read Patamona James 3 Bible Online

James 3 - Patamona bible

James 3

¹Utonpa yamùk! Elanneppe ettàk kon tukke kulu là enupannan pe eppai kettàu, masapùla mùttuyatàik ina enupannan ittutok wechi màlà àsà pe lùiwa tùulon kon yentai.

²Tamù'nawolon kon kùmyamlo echipalà'ne ikasa pùla tùwessan. Kappon ikasa pùla tùwessen pen tùuselupatok winà mùkkàlà wakù kulu, molopai ikasa neken tùwessen kappon, molopai tamù'nawàlà tesak yepulu pe tùwessen.

³Kawale mùta yaulonnàinan kùmyamlo, kùmaimu yawàlà tok wettoppe, molopai tok utàtoppe iku'nàinan iche we'nàtok kon yak.

⁴Wapùla kanau yentàk kon: eke pe lànen iwechi tùse, molopai meluntà assetun winà tùutàsen, elekkwà kanau yukkla winà kanau yanài mùkkàlà yanà ittàtoppe iche tùwettok yak.

⁵Sàlà yekkwaichi màlà ani: elekkwà pe lànen echii'ma, tùutapulàsen eke pe kulu. Yentàk kon eke pe apok uyatù elekkwà apok yalàn ke iyassak.

⁶Molopai ani màlà apok walai, iwanùssak àli ke molopai maippanài tamù'nawàlà pùnaimanài awàlà molopai tamù'nawolon wema'nàtok pottànài apok tùusà'nùssen pen apok patassek yapai iyàssak tùpona ke.

⁷Kappon mùkkàlà elannek ton yesepankanài elanmùla molopai kamo yamùk, tolon yamùk, àkài yamùk, molopai tuna kawon kon kussak ya man elanmùla.

⁸Tùse ànù'là kappon uya ani yesepanka elanmùla yeselùkek pùla iwechi màlà. Àli màlà, itepulu pe ànù'là wechi yentaino molopai maikpanài weli'nàtok pe ke iwanùssak màlà!

⁹Yapulànnan kùmyamlo tenki tetok Kùyepulu kon pàk pe molopai Kùkàipùnù pàk ike pe, molopai kùtonpa kon pa'nùttok nàlà ike pe, mùkyamlo ikonekasak kon Katù kasa.

¹⁰Tenki tetok molopai pa'nù'nàtok màlà tùwepakkasen màlà lùppù mùta yai. Utonpa yamùk! Sàlà kasa kùsettak`u'nokon!

¹¹Wakù tuna yeuta yai maik là tuna wepakkasak pùla iwechi màlà?

¹²Utonpa yamùk, fig yek ken na' tùwepetasen Olive pe? Wapùla chi'nak ken na' tùwepetasen fig pe? Kane ku! Màlà tùse pùla ine'nek tuna, molopai ine'nek pen tuna tùuyàssen pen màlà lùppù tuna yen yapai.

¹³Pukkek molopai ittunài na' kappon molo nai àkklottau'nokon? Tàwàichi yekamakà wakù pe ewelaikatok molopai eyeselu winà wakù eyeselu ikonekasak, àsà pe pùla pukkeppe we'nàtok pokonpe.

¹⁴Tùse eyewan kon wechi kùlùmàppe àsà pe, molopai amleppe yau, katapulàtàu molopai ailon winàkàik kasei pe kettàu.

¹⁵Sàlà yekkwa pukkek màlà epùn poino pen; wolù yawon yeselu màlà, iwekkuppù màlà àli eyeselu kon winàpai, Makui, winàpaino pe iwechi.

¹⁶Masapùla kùlùmà molopai amleppe we'nàtok wechi molo yau, utaimelunpantok molopai tamù'nawolon àliton wechi nàlà màlà molo.

¹⁷Tùse pukkeppe we'nàtok màlà epùn poino, wapiyalok kulu wakù esukenan; ewan wàlàkattok, tenpe àsà pe pùla we'nàtok tùwanmùla, alomùla, molopai echitonpa pe ku'nài; usentupantok ke iwanùssak màlà, molopai wakù eselu ne'nài; tamù'nawolon kon namatok e'kkaichalà yenpoikanài molopai ennakanài pùn.

¹⁸Molopai wakù pe we'nàtok màlà ipànsak wàlàka'nàtok yau mùkyamlo echitonpa pe we'nàtok konekannan winà.