Read Patamona James 4 Bible Online

James 4 - Patamona bible

James 4

¹I'nai yailà pai ken tamù'nawolon wepanta'mantok molopai usàulàmantok àkklotau'nokon tùuyàssen? Àli ànkupai ewettok kon winàpai tùuyàsan, eyesak kon yau tùwepanta'ma pàk echipalà nai'nùk.

²Yà'làlà iche ewechi kon tùse yepolo auya'nokon pùla ewechi, màlàpàk e'wàpai tùwessan amyamlo; yà'làlà tùulon kon yemamin iche tùwessan amyamlo, tùse yepolo auya'nokon pùla iwechi, màlàpàk àusàulàma kon molopai ewepanta'ma kon. Iche ewettok kon yesappe ewechi kon pùla iwechi màlà masapùla Katù pàk yenna auya'nokon pùla iwechi pàk.

³Molopai yenna auya'nokon yau, yeponài nan pen amyamlo masapùla eyeselu kon wechi àli pe pàk; yà'làlà yenna auya'nokon yapulà kon pa àli ànkupai ewettok kon pona suwa là tùusenumenkaik pùla.

⁴Ailon ton pen kappon yamùk! Ittuichi auya'nokon pùla nai wolù yawon kon àli ku'nài nan wechiyakon pe we'nà wechi Katù yeyaton pe? Ànù'là wolù yeselu ku'nàinan kappon yamùk wechiyakon pe eppaino wekkupù màlà Katù yeyaton pe.

⁵Katù Maimu uya yà'là tesappe pùla mùttuyatàu, “Katù uya Akkwalù ke lepansakù'nokon màlà molopai Katù ponaloppe neken kulu wema'nà iche iwechi màlà,” tesak ya yau.

⁶Tùse wakù pe we'nàtok Katù winàpaino màlà meluntà kulu. Masapùla Katù Maimu uya, “Katù mùkkàlà tùtonpa yentai pe tukaik tùwekkussen iteyaton, tùse wakù pe we'nàtok tùwinàpaino tùnài àssà'mùnon àsà ton pen piyak,” te pàk.

⁷Katù yemyak uchi ettùtàk kon. Makui, inulunpatàk kon, molopai iwepe màlà ewinàpai'nokon.

⁸Àitàk kon Katù piyak mei pùla molopai iyàpù màlà mei pùla apyakù'nokon. Wakù pe eyemyatà kon ikuttàk kon, asa'lon ichenumenkatok kon kappon yamùk! Eyewan kon ikukatàk kon tùusennakasan!

⁹Esewankono'matàk kon, àpokoitatàk molopai akalantàk kon; tàwà àwàkklàtok kon nelattài akalantok kon pe, molopai tàwà autauchinpatok nelattài pokoitantok pe.

¹⁰Àsà'mùla, àsà pe pùla, enatàk kon Itepulu yemloto po molopai ayanùmù kon ya màlà.

¹¹Àtonpa kon kùttalumattàtàu, utonpa yamùk. Ànù'là tùtonpa talumattatànài wapùla “Suwa messaik” tawon, uselupa màlà Law Katù winàpaino winàkàik molopai italumattà ya. Law Katù winàpaino talumattà auya'nokon yau, imaimu yawolon pe ewechi kon pen màlà, tùse imottùnpanài pe ewechi kon.

¹²Katù neken mùkkàlà Law ke lepanài molopai ittunài. Mùkkàlà neken mùkkàlà pùikattànài, molopai ittunài. Ànùk pe ken mechittuyatàu àtonpa kon pàk “Suwa messaik ”te kon pa?

¹³Imasaichi kùyetatàk kon amyamlo, “Sàlà pe wapùla ewanawà utàn nokon màlà tùulon pata yak, molo tachinpe ko'mannà tewin kilichimochi, yà'làlà ye'ma màlà wapùla yà'làlà chilanma, molopai pùlayatta yepolo eke pe,” tawonnan.

¹⁴Ittu auya'nokon pùla iwechi màlà yà'là yekkwa ewemattok kon ewanawà! Masapùla ichin pen katuppluk kasa ewechi kon pàk, tensen pe malalà molopai ippla tùwenassen pe.

¹⁵Sàlàichi màlà wa tetok auya'nokon: “Itepulu yeselu pe iwechi yau, wema'nà màlà molopai sàlà wapùla màlà kupù'nokon màlà,” tawon.

¹⁶Tùse sàlà pe eke pe tukaik tùwekussan amyamlo; molopai tùutapulàsan tamù'nawolon màlà yekkwa màlà àli iwalai pen.

¹⁷Màlàpàk kappon wakù tùnùttu ku'nài pen uya àli kupù màlà.