Read Patamona 1 Peter 1 Bible Online

1 Peter 1 - Patamona bible

1 Peter 1

¹Peter, yeunossak lùppù Jesus Christ winàpaino sàlà kaleta, Katù nanùmùssan kappon yamùk tùwemassan kaklan pe tùwetta'nùse pata yamùk: Pontus, Galatia, Cappadocia, Asia, molopai Bithynia yawolon kon piyak immenukappù sàlà.

²Ayanùnsak kon màlà Katù yeselu yawàlà, Katù ponaloppe àkonekatok kon pe Wakù Akkwalù winà, molopai Jesus Christ maimu yawàlà ewechi kon pa molopai esuken ewena kon pa Jesus Christ mùnù winà. Tàwà wakù pe we'nàtok molopai echitonpa pe we'nàtok Katù winàpaino àponalok kon pe nenai eke pe.

³Katù yapulàpai'nokon man Kùyepulu Jesus Christ Kàipùnù! Eke pe tùusentupatok yawàlà, kùlepappù kon ya wentutukkantoppe Jesus Christ wuluuka tùuya winà. Sàlà uya kùlepa kon màlà wema'nàtok pàk eke pe enpen we'nàtok ke.

⁴Màlàpàk enpen we'nà'nokon sàlà wakù yepolo pàk Katù nùkupù tùponalok kon ponaloppe. Iku'nài mùkkàlà àponalok kon pe epùn po, iwemyakanma pùla iwettok wapùla inmata pùla iwettok yau wapùla iwaliwomù pen màlà molo.

⁵Ailon tetok Katù pàk yesak ton amyamlo, mùkkàlà meluntàlà màlà inotau ewettok kon pata weyu wenukapù ponalà. Katù uya tamù'nawolon kon kappon yamùk ittu yattai. Màlà yattai nen uchi àpùikattà kon ya màlà ikupù tùuya teppù tùuya kasa.

⁶Atauchinpatàk kon sàlà pàk, malalà eusewankono'ma kon pe iwechi sàlà pe tùse, yattai pùla là tukkan ittuntok yau ewettalumattài'ma'nokon kon.

⁷Sàlà màlà meluntà pe ailon tetok auya'nokon wechi ittunài. Kolù, tùumattasen pe lànen nai'nùk màlà ittusak lùppù apok ke; màlàpàk uchi ailon tetok auya'nokon, wakù kolù yentai nai'nùk, ittu nàlà màlà meluntà pe iwettoppe. Màlàyau apulàntok wakù pe itekale we'nàtok molopai namantok yepolo auya'nokon màlà màlà Wei yattai Jesus Christ usenpoikasak yau.

⁸À'nùn pe iku'nài nan amyamlo, yensak auya'nokon pùla lànen iwechi tùse; ailon tawonnan amyamlo ipàk yene auya'nokon pùla lànen tùse sàlà pe; màlàpàk eke pe autauchinpa kon màlà yekama yentai wakù utauchinpantok ke,

⁹masapùla ailon tetok auya'nokon yepeppù pe, ayakkwalù kon wepùikattàtok yepolo auya'nokon màlà.

¹⁰Sàlà wepùikattàntok uchi màlà Katù Maimu yenpoikannan usenupappù ipàk eke pe molopai tok nùwappù tok nekamappopàtùppù. Tok uya yekamapppù màlà lepantok Katù uya elepatokù'nokon ike.

¹¹Tok wechippù yà'là yattai iweyu wechi ittuiche molopai atta iyàpù ittuiche. Masapùla Wakù Akkwalù Christ winàpaino wechi tok yau uya sàlà yekamappù, wettalumattàntok Christ nùpàlika woton yekama tùuya'nokon yau, molopai yapulàtok ite'mappù pàk tùuyàssen.

¹²Katù uya yenpoikappù màlà pùsamlo pàk tok wotokoyi wechi tok ponaloppe pùla, tùse àponalok kon pe, tok uselupappù ailon pàk màlà enetappù kon kasa. Wakù Itekale yekamannan ichelupasak kon Wakù Akkwalù meluntàlù yeunossak lùppù epùn poi winà uya, sàlà yamùk ailon ton yekamappù àpàkù'nokon. Sàlà yamùk uchi màlà inchelù yamùk lànen wettok ànùttupai.

¹³Màlàpàk uchi eusenumenkatok kon tùwekonekaik nechiik. Elanneppe kulu ettàk kon, molopai enpen ewettok kon ittùtàk kon tamù'nawàlà wakù Katù winàpaino pàk elepatok ike woton Jesus Christ usenpoikasak yau.

¹⁴Mule yamùk mayin yawolon kon kasa ettàk kon, molopai kennappotàu pena ewechippù kon yak ittu auya'nokon pùla ewechi kon yau ànkuppù kon lùppù yak.

¹⁵Tùse làkku emattàk kon tamù'nawolon ànkupù kon yau, Katù àkà'manàippù'nokon wechi wakù pe esuken kasa làma wakù pe.

¹⁶Masapùla iwe'menukasak màlà, “Esuken ettàk kon, masapùla esukenan Iulà,” tukaik pàk. {Lev 11.44, 45; Lev 19.2; Lev 20.7}

¹⁷“Ina Kàipùnù” tawonnan pe ewechi kon, tamù'nawolon kon kappon yamùk pàk, “suwa messaik” tawon, tok nùkupùppù yawàlà ekkaichalà pàk; uchi emattàk kon talà sàlà non po inamatok molopai yapulàtok auya'nokon yau.

¹⁸Masapùla mùttuyatàik àpùikattàppù kon, italumayippù là ke pùla àli iteselu pe we'nàtok ananùmùppù kon atamo kon winàpai yapai. Yà'làlà tùumattasen chilùpa wapùla kolù kasa pùla iwechippù màlà;

¹⁹àpùikattàppù kon kulu màlà Christ uya epekkek tùmùnù ikkwansak àponalok kon pe yau, imattakù pùn kalinilu mule wechippù kasa.

²⁰Katù nanùmùppù mùkkàlà wolù wekoneka wapiya, molopai ichenpoikappù sàlà yamùk iwenukattok weyu yattai àpàkànsau'nokon.

²¹Mùkkàlà yai ailon tawonnan amyamlo Katù pàk, iwuluukanàippù weli'nàtok yapai, molopai ilepanàippù apulàntok ke; màlàpàk ailon tetok auya'nokon molopai enpen ewettok kon wettoppe Katù pàk.

²²Masapùlaichi esuken ewenasak kon màlà ailon yawàlà ewechi kon winà, ailon uchi'nùnmantok yesappe ewechi kon tùulon kon ailon tawonan pàk pàk, echi'nùnmatàk kon eke pe tamù'nawàlà eyewan kon ke.

²³Masapùla nulànan molopai tàwàlàlà tùwemassen Katù Maimu yai ewentu tu'masak kon màlà, tàwàlàlà tùwemassen tùwelichen pen munkà yamùk pe.

²⁴Masapùla, “Tamù'nawolon kon kappon yamùk mùkyamlo wanak walainon, molopai tamù'nawolon tok yapulàtok màlà wanak yùpùlù walainon; wanak tùwelichen molopai itùpùlù tùwessolokasen,

²⁵tùse Katù Maimu tùwemassen tàwàlàlà,” tesak kasa. {sa 40.6-8} Molopai sàlàichi màlà mayin àpàkù'nokon yekamasak lùppù.