Read Patamona 1 Peter 2 Bible Online

1 Peter 2 - Patamona bible

1 Peter 2

¹Màlàpàk uchi tamù'nawolon àli ton inonkatàk kon: kasei pe kettàu, tùulon kon kùsennakattàu, kùlùmàppe kettàu, wapùla mottùnpan pe uselupantok kùsapulàtàu!

²Entusan mule yamùk, manak iche tùwe'nakklipasan tàwàlà, màlà kasa wakù esukenan manak kappon winàpaino pen iche ettàk kon tàwàlà meluntà pe ewena kon pa iwinà molopai ewepùikattà kon pa.

³“Itepulu Katù wettok wakù pe ittusak auya'nokon pàk,”

⁴Jesus Christ piyak àitàk kon, nulànan tàk mùkkàlà inulunpasak lùppù kappon yamùk winà italumayippù pe, tùse yanùnsak lùppù Katù winà epekkeppe.

⁵Àitàk kon nulànan tàk kasa, molopai tapulàsan pe ettàk Katù yùwùk kappon namùppù pen tensen pen yamù yau, màlà motau wakù pe tùwe'wotokomasan pe ewechi kon pa, wakù ton Katù lepatok iche iwettok tùlù pàk Jesus Christ yai .

⁶Masapùla Katù Maimu yau: “Epekkek tàk, yanùnsak uya man, màlà tùtù yai'nùk ipana'mu yawon wakapu pe pata Zion yau; molopai ànù'là ailon tawon ipàk usenkuttà pen màlà,”tawon. {Isa 28.16}

⁷Sàlà màlà wakù kulu tàk amyamlo ailon tawonnan Katù pàk pona; tùse mùkyamlo ailon tawonnan pen pona: “Màlà tàk wechippù tapùi yamùnnan nenpàttùppù pe, màlà lùppù wenasak man iche kulu we'nàtok pe tùulon kon tàk yentai,” teppù nàlà. {Psa 118.22}

⁸Molopai, “Sàlà màlà tàk kappon yamùk wettatai'matok iwinà woton, tàk tok kawai'ma woton,” teppù. {Isa 8. 14} Tok wettatai'ma màlà masapùla ailon tesak tok uya Katù Maimu pàk pùla iwechi pàk, màlàichi Katù yeselu tok ponalok.

⁹Tùse amyamlo mùkyamlo yanùnsak kon, tùusensen pen paatele yamùk pe, kin ponalok kon, wakù ton kappon yamùk Katù ponalok kon, yanùnsak kon Katù yeselu wakù ton kulu yekama kon pa. Mùkkàlà àkà'manàippù'nokon ewalupàttapai wakù kulu takkwayi yak.

¹⁰Pena Katù ponalok kon pe pùla ewechippù kon, tùse sàlà pe nen uchi iponalok kon pe messatàik; pena Katù usentuppatok ittu auya'nokon pùla iwechippù, tùse sàlà pe ichentuppatok yanùnsak auya'nokon man.

¹¹Apawanattàyatàu Iulà, utonpa yamùk, kakklan yamùk echii'ma sàlà non po, àli ànkuppai we'nàtok yemyak kettùtàu, màlà tùwepanta'ma pàk nai'nùk tàwàlà ayakkwalù kon winàkàik.

¹²Eyeselu kon wakù pe nechii Katù ittunnan pen kùlottau, àmottùnpa kon tok uya yau, àli kussan tok te tok uya yau, wakù eyeselu kon yentoppe tok uya, molopai nen uchi Katù yapulàtoppe tok uya iiyàpù Weyu yattai.

¹³Itepulu ponaloppe tamù'nawolon kon potolù yamùk wettok itepulu pe yo'no ettàk kon: kin yo'no, mùkkàlà wechi màlà yo'no kulu we'nàtoppe molopai imaimu yawàlà we'nàtoppe,

¹⁴molopai kopùna yamùk, inanùmùssan àli ku'nài nan talumattànnan pe molopai mùkyamlo wakù ku'nài nan yapulànnan pe.

¹⁵Masapùla sàlà màlà Katù yeselu: pakko ton kappon yamùk uselupatok ittunài uselupatok kasa pùla yeppaka'nùpù auya'nokon iche iwechi màlà, wakù ton kupù auya'nokon winà.

¹⁶Yachinài pùn kasa emattàk kon, molopai imokkasak pe ewettok kùsapulàtàu yà'làlà àli waputàtok auya'nokon ike pe, tùse Katù yapyoto ton pe emattàk kon.

¹⁷Tamù'nawolon kon kappon yamùk inamatàk kon, ànù'là kappon ailon tawonnan i'nùnmatàk kon, nalik pe ettàk Katù pàk, molopai eke kulu itepulu inamatàk kon.

¹⁸Apyoto ton, eyepulu kon yemyau ettàk kon molopai tùwe'namaik kulu tamù'nawolon yau ettàk, mùkyamlo tùusentupaik nai'nannàk molopai tùusenumenkaik nai'nannàk pàk neken pùla, tùse mùkyamlo àsà pe nai'nannàk pàk nàlà.

¹⁹Katù uya wakù uyàttok iwinà kupù màlà àponalok kon pe sàlà pàkànsau, wettalumattàntok yà'là wenai pùla pàlika auya'nokon yau, masapùla teselu ittu auya'nokon pàk.

²⁰Masapùla yà'là yekkwa ken e'mantok molo nai wettalumattàntok iwalai pen ànkupùppù kon pàkàlà ànpàlika kon yau? Tùse wettalumattàntok pàlika auya'nokon yau wakù kussak lànen auya'nokon tùse yau, Katù uya wakù kupù màlà àponalok kon pe màlà pàkàlà.

²¹Sàlà màlà Katù uya àkà'mappù kon yak; masapùla Christ wettalumattàppù àponalok kon pe pàk iwettalumattàtok winà eusenupa kon pa molopai itta ye'mappù yawàlà àutà kon pa.

²²“ Àli kussak ya pùla iwechi màlà, ànù'là uya kasei wepakka intapai yetappù pen.” {Isa 53.9}

²³Tùmottùnpa yau, mottùnpan pe yeikuppù ya pen, tùwettalumattà yau, “Atalumattà kon uya,” te ya pùn, tùse enpen tùwettok tùlùppù ya Katù ikasa Ittunài winàkàik.

²⁴Jesus Christ uya kùmakuyi kon yalàppù tùmàlà pe pulusuk pona, weli'nà tok kon pe àli kuttok pàk wema'nà tok kon pe wakù pe we'nàtok ponaloppe. Ippoppàtù winà euchipittàsak kon màlà.

²⁵Masapùla kalinilu yamùk utatù kasa ewechippù kon; tùse sàlà pe ewennnaposak kon man Kalinilu Yesak walai molopai ayakkwalù kon Mainanpanài wenaima kon pa.