Read Patamona 1 Peter 3 Bible Online

1 Peter 3 - Patamona bible

1 Peter 3

¹Màlà kasa làma ichi amyamlo ulichamichi, tùtayappù kenan kon atayappù kon yentai kettàu, ailon te tok uya pùla iwechi Katù Maimu pàk yau, ailon tetoppe tok uya wakù eyeselu kon pàkàlà, euselupa pàkàlà kulu pùla,

²masapùla tok uya wakù pe molopai namanài pe ewechi kon wechi yene màlà.

³Polopon yà'làlà kùsapulàtàu ema'non pe àku'nài'nokon pe, appai kon yayankatok auya'nokon yau, wapùla yà'là yekwalà ikonekasak kolù yapai wapùla yà'làlà epekkek tàk yapai ikonekasak yau ewechi kon yau, wapùla teselu kenan pon yau ewettok kon.

⁴Tùse tàwà ema'non pe ewettok kon nùyàpùi eyewan kon yapai tùumattasen pen màlà àsà'mùla we'nàtok, àsà pe pùla molopai eppana tùwessen pe we'nà màlà wakù kulu Katù yenu yau.

⁵Masapùla sàlà kasa penalok kon wakù ton ulichamichi, enpen tùwessan Katù pàk, wechippù ema'non pe; tùtayappù kon maimu yawàlà.

⁶Sarah wechippù màlà kasa: Abraham maimu yawàlà iwechippù molopai yesatùppù ya “Uyepulu,” tukaik. Amyamlo ichi mùkyamlo imunkà yamùk wakù kupù auya'nokon yau molopai yà'làlà pàk eusenalippa pùla ewechi kon yau.

⁷Amyamlo nàlà tùnoppù kenan kon walawotichi yamùk, ànoppù kon piyau ewemapù kon yau, mùttutàik tok wechi attu'mùnon peiwa, màlàpàk tok kùttalumattàtàu namantok yenpoikatàk kon tok pàk; masapùla tok uya nàlà tamùkke àpokonpe'nokon, Katù uya lepantok wema'nàtok ke yanùmù màlà. Sàlàichi ikuttàk kon àwàpùlematok kon wakàttù yà'làlà uya tukaik.

⁸Màlàyau sàlà yekama uya àpàkù'nokon: tamù'nawàlà tewin usenumenkantok yesappe mettàik molopai ekkaichalà usentupantok tùulon kon pàk; ànù'là kappon i'nùnmatàk kon àtonpa kon kulu pùnùnma auya'nokon kàsa, molopai tùusentuppasen pe ettàk kon molopai àsà'mùla, àsà pe pùla ànù'là kappon pokonpe.

⁹Àli kùsentakanmatàu àli ke, wapùla pa'nù'nàtok pa'nù'nàtok ke; tùse wakù ke làkku yentakanmatàk kon, masapùla wakù pe we'nàtok màlà Katù uya elepa kon tùuya tetok lùppù àkà'masak kon tùuya yau.

¹⁰Masapùla “Ànù'là tùutauchinpaik wema'nàtok molopai wakù pe tùwemattok weyu iche tùwessen, kùsselupatak àli pe, molopai kasei pe kùsettak.

¹¹Tàwà nelattài àli winàpai molopai wakù kupùi, tàwà echitonpa pe we'nàtok iwai molopai nùwenaimai yepose.

¹²Masapùla Itepulu Katù mùkkàlà wakù ton yennài molopai tok yetanài tàwàlàlà tok wàpùlema yau; tùse àli ku'nài nan winàpai tenpata lattànài mùkkàlà,” {Psa 34.12-6}

¹³Ànùk uya ken ewettalumattàtoppe àkupù kon wakù ànkupai kulu ewechi kon yau?

¹⁴Tùse ewettalumattà kon iwalai kupù lànen auya'nokon yau, atauchinpatàk kon! Kappon yamùk pàk kesenalippatàu, molopai kataimelunpatàu.

¹⁵Tùse Christ namatok auya'nokon yesappe ettàk kon eyewan kon yau molopai Eyepulu kon pe ikuttàk. Tùwekonekaik ettàk i'nai yattai là enpen we'nàtok ayau'nokon nai'nùk wenai ewettok kon yekama kon pa eyekamappo kon ànù'là uya yau.

¹⁶Tùse àsà'mùla àsà pe pùla mùkuttàik molopai namantok yesappe. Wakù pe, tùwanmùla eusenumenkatok kon ikuttàk kon, àmottùnpasak kon yau, mùkyamlo àli pe tùuselupasan wakù eyeselu kon Christ ya'lon kon yeselu walai pàk wekuli'matoppe tùuselupatok kon winà.

¹⁷Masapùla wakù peiwa wettalumattàn wakù kupù pàkànsau wechi màlà, Katù yeselu pe iwechi yau, àli kupù yentai lùiwa.

¹⁸Masapùla Christ welikùppù màlà tewin itekkwa; iwelikùppù màlà tamù'nawolon kon wettok àli pe pàkànsau, wakù kàyik welikuppù àli ton kappon yamùk ponaloppe, Katù piyak ayatok kon pe tùuya. Iwàtoppe ikupùppù màlà kappon welikù kasa molopai iwuluukappù màlà kappon pe pùla yakkwalù itesak pe;

¹⁹molopai takkwalù yau iitàppù molopai yachisak kon akkwalùppà yamùk pàk itekale yekamappù ya.

²⁰Pùsamloichi wechippù màlà akkwalùppà yamùk lùssan pe Katù Maimu yawàlà iwessak kon pen pe, tùusetakkaik pùla inmàmukussan Noah uya kanau koneka weyu yamùk yattai yau pe. Tukkan kon pen kappon yamùk wechippù kanau yau, 8 pan kon neken. Mùkyamlo wepùikattàppù màlà tuna winà.

²¹Sàlàichi màlà tuna ke usenpataukantok walai, àpùikattàyatài'nùk, esak kuka winà pùla, tùse “Katù piyak welattà sàlà”tei'ma wakù pe tùwanmùla usenumenkantok pokonpe Jesus Christ we'wuluukatok yai.

²²Itàppù nai'nùk epùn pona, molopai namantok pata yau Katù yemyatù kamik pen winà nai'nùk. Tamù'nawolon kon inchelù yamùk yepulu mùkkàlà, tamù'nawolon kon apàikkek ton molopai tamù'nawolon kon meluntà ton yepulu.