Read Patamona 1 Peter 5 Bible Online

1 Peter 5 - Patamona bible

1 Peter 5

¹Sochi yennàinan àkklottau'nokon nai'nannùk tùpawanattàyaik, Iulà nàlà mùkkàlà sochi yennài. Christ wettalumattàtok lùppù yekamanài, molopai itakkwayi tùusenpoika woton pùkkù nàlà. Apawanattàyatàu Iulà:

²Kalinilu yesan kasa ettàk kon, mùkyamlo Katù uya elepatok kon ike mainanpa kon pa, molopai tok imainanpatàk kon alikyek pe, Katù wettok ikupù auya'nokon iche kasa. Àwotokoyi kon ikuttàk kon e'mantoppe neken pùla, tùse pùikak pe eppai we'nàtok yapai.

³Mùkyamlo anmainanpa kon pe itùsak kon yepulu pe tukaik kettàu, tùse tok uya yentok ipàkàlà pe ettàk kon.

⁴Molopai Eke Kalinilu Yesak usenpoika yau, enkek alok, tàwàlàlà enkek pe molopai akkwa pe tùwessen yanùmù auya'nokon màlà.

⁵Màlà kasa làma, amyamlo masalok kon umoine ton esenupatàk kon kàyik yamùk lùiwa winàpai. Molopai tamù'nawolon kon àsà pe pùla ettàk kon, ànù'là kappon pùikattà kon pa; masapùla, “Katù mùkkàlà ànù'là kappon yentai pe tukaik tùwekkussen itewanma, tùse wakù pe we'nàtok tùwinàpaino tùnài àsà'mùnon piyak,” {Pro3.34}

⁶Màlàpàk uchi àsà'mùla àsà pe pùla enatàk kon, Katù yemyatù meluntàlù yo'no, ayanùntokkonpe ya màlà wakù tùweyu yattai.

⁷Tamù'nawàlà ayaimelunpa yatài'nùk inonkatàk kon ipona,masapùla amainanpa kon ya màlà.

⁸Tùttuik ettàk kon enpen ettàk! Masapùla eyeyaton kon, Makui, tùusalà pàk man, tùtàwùsen palauya kasa, ànù'là iwa pàk tùneuno'ma woton.

⁹Ailon tetok auya'nokon yau meluntà pe ettàk kon molopai Makui, inulunpatàk kon, masapùla mùttuyatàik àtonpa kon yamùk ailon tawonnan sàlà non po wettalumattà sàlà yekkwa yau akasa'nokon.

¹⁰Katù tamù'nawolon wakù pe we'nàtok yesak, mùkkàlà uya àkà'masak kon màlà tàwàlàlà takkwayi pùkkù pe ewechi kon pa Jesus Christ yau. Ewettalumattàsak kon malalà tùpo, mùkkàlà uya àkoneka kon màlà ikasa, meluntà pe kulu, molopai àtùlù kon màlà wakù pata tùutamasen pen pona.

¹¹Tamù'nawolon apàikkek màlà ipyawon tàwàlàlà. Emen.

¹²Sàlà tokwenan kaleta menuka uya sàlà Silas uya upùikattà winà, ailon kulu utonpa pe unkupù. Emeluntàpapai'nokon wessaik molopai uselupatok tùlù uya sàlà ailon wakù pe we'nàtok Katù winàpaino pàk. Yau ettàk kon.

¹³Ailon tawonnan Babylon pon kon, Katù nanùmùssan nàlà, “Wakù pe na' messatàu?” tetok tùuya'nokon yeunossan, molopai nàlà umle kasa nai'nùk Mark, itesek.

¹⁴Itepulu yesek yau uchi tùutauchinpaik ewessepolokon yau mettàik euchi'nùnma kon yekama pe Christ yai. Tàwà echitonpa pe we'nàtok apyau'nokon nechiik amyamlo tamù'nawolon kon Christ ponalok kon.