Read Patamona 2 Peter 3 Bible Online

2 Peter 3 - Patamona bible

2 Peter 3

¹Utonpa yamùk! Sàlàichi màlà kaleta yakon itekkwa pe unmenukappù apyakù'nokon. Asakklàma ukaletayi yau eyenpenatanùpùiche wessak man eusenumenkatok kon yau sàlà yamùk pàk.

²Pena yekamasak kon wakù ton Katù Maimu yenpoikannannùssan winà ittu auya'nokon iche wessaik, molopai Itepulu Jesus Pùikattànài wettok ikupù iche yeunossak kon nekamappù àpàkù'nokon.

³Tamù'nawolon wapiya, mùttutàik iwenukapù pe tùulon kon kappon yamùk usenpoika iwemattok kon àli ànkupai tùwettok itepulu ton. Tok uya àmottùnpa kon màlà

⁴molopai: “Tùuyàpù teppù ya lùk ku, ewaik na'? I'nailà ken uchi nai? Kùtamo kon yamùk welikkapùppù man, tùse tamù'nawolon wa lùppù man iwechippù kasa wolù wekonekappù motapai!” te tok uya màlà.

⁵Sàlà yenpàtùppù tok uya ittui'ma: pena Katù uselupappù, molopai kak molopai non wekonekappù imaimu winà. Non wekonekappù màlà tuna yapai, molopai tuna winà,

⁶molopai tuna winà nàlà, tuna'ma ke, penalok non molopai non pon kon kappon yamùk umattappù.

⁷Tùse kak molopai non sàlà pe nemassai'nùk kussak màlà, màlà lùppù Katù Maimu winà, inmattatoppe apok ke. Màlà yamùk kupù màlà, àli ton kappon yamùk ittutok yattai ponalà, molopai tok mattanùpù màlà.

⁸Tùse sàlà tewinan nà kùputtàka'nùttàu, utonpa yamùk! Tewinan wei màlà 1000 pan kilichimochi yekkwa Itepulu Katù yenu yau; sàlà yamùk wechi màlà ekkaichalà ipona.

⁹Itepulu mùkkàlà ikupù tùuya teppù tùuya lùppù ko'mankanài tachinpe pen, tùulon kon usenumenka ipàk kasa. Tùse làkku àpàlikanài'nokon mùkkàlà molopai tùusetakkasen pen àpàkù'nokon masapùla ànù'là wettalumattà iche pùla tùwechi pàk, tùse tamù'nawolon kon welattà makui winàpai iche tùwechi pàk.

¹⁰Tùse Itepulu Katù Weyu uyàpù màlà amak uyàpù kasa. Màlà wei yattai kak waliwomù màlà wala'napi wettoikkwa kasa, kak yawon kon uyatù màlà, molopai màlà yamùk umatta màlà, molopai non waliwomù màlà tamù'nawolon tawon kon pokonpe.

¹¹Tamù'nawolon sàlà yamùk umatta sàlà kasa pe iwechi pàk, yà'là yekkwa ton ken kappon yamùk pe ewechi kon? Tàwà ewelaikatok kon wakù pe esuken nechii tamù'nawàlà iwettùsak pe Katù piyak,

¹²Katù Weyu màmukui'ma'nokon, molopai ànùttu kon ikuttàk kon iyàttoppe yemittàpa pe. Màlà Wei kak uyattok molopai inmattatok yattai, molopai màlà yamùk kawon kon umatta màlà a'nek ke.

¹³Tùse Katù uya emennak kak molopai emennak non tùlù tùuya teppù, wakù pe we'nàtok wechi yau màlà, molopai sàlà yamùk màmuku pàk we'nà'nokon man.

¹⁴Màlàpàk uchi, utonpa yamùk, màlà wei màmukui'ma'nokon, ànùttu kon ikuttàk kon esuken molopai àli pe pùla ewechi kon pa Katù yenu yau, molopai echitonpa pe ewechi kon pa ipokonpe.

¹⁵Kùyepulu kon Jesus uya pàlikantok yentàk kon ewepùikattàtok kon yattai pe, kùtonpa kon Paul uya imenukappù apyakù'nokon kasa, pukkek Katù uya tùlepatok yapulài'ma.

¹⁶Walai mùkkàlà tamù'nawolon tùkaletayi yamùk yau sàlà yamùk pàk kaleta menuka tùuya yau. Sa'man ton molo man ikaletayi yamùk yau. Sàlà yamùk ichenupasak kon pen molopai ittunnanpetukaik tùusennakasan, asa'lon ichemenumenkatok kon nùlattùppù molopai tok yekamannan ailon pe pùla, tùulon kon Katù Maimu kupù tùuya'nokon kasa. Màlà kasa tok uya tùumattatatok kon nepù màlà.

¹⁷Tùse amyamlo, utonpa yamùk kulu uya sàlà ittukassak màlà. Elanneppeichi ettàk kon, tùpanama kon yawolon kon pen kappon yamùk utattok winà ayalà kon tukaik, molopai ewesselekkwa kon wakù apatassek kon yapai tukaik.

¹⁸Tùse wakù pe we'nàtok molopai ittunài pe we'nàtok Kùyepulu molopai Kùpùikattànài Jesus Christ winàpaino yau Jesus kasa enatàk kon tamù'nawàlà. Tàwà apulàntok ipyau nechii, sàlà pe molopai tàwàlàlà! Emen.