Read Patamona 1 John 2 Bible Online

1 John 2 - Patamona bible

1 John 2

¹Umunkà yamùk, sàlà tùmenukayaik apyakù'nokon, ewemakuima kon tukaik. Tùse ànù'là wemakuimasak yau, Jesus Christ molo man ikasa tùwemassen. Katù pawanattà pàk tùwessen kùponalok kon pe ichentuppatoppe.

²Masapùla Christ wettùlùppù tùwelittok yak pàkànsau nen nai'nùk kùmakuyi kon pàk usentuppansak. Molopai kùmakuyi kon neken nà pàk pùla, tùse tamù'nawolon kon kappon yamùk makuyi pàk nàlà.

³Katù uya suwa ekkà tetok maimu yawàlà we'nà yau, Katù ittu kulu kùuya'nokon ittu màlà sàlà winà.

⁴“Katù ittunài Iulà,” tawon, tùse suwa ekkà tetok ya maimu yawàlà pùla echii'ma wechi màlà, kasei pe, molopai ailon pùla yau iwechi.

⁵Tùse mùkkàlà imaimu yawàlà tùwessen uya Katù pùnùnmatok uya màlà, wakù pe kulu imasak. Sàlà kasa màlà Kàtu yau wema'nà ittu'nokon:

⁶“Katù yau wemassaik” te kùuya'nokon yau, Jesus wemapùppù kasa tùwemassan pe we'nà'nokon màlà.

⁷Utonpa yamùk tàwà, sàlà suwa ekkà tetok tùmenukayai'nùk apyakù'nokon sàlà emennak pen; penalok, itesak pe ewettok kon iwepyattàppù motapai. Màlà penalok enupantok lùppù.

⁸Walà tùse sàlà emennak suwa ekkà tetok tùmenukayai'nùk apyakù'nokon, molopai ailon pe iwettok usene màlà Christ yau molopai ayau'nokon nàlà. Masapùla ewalupà nùtàyan, molopai ailon kulu Akkwa ulenpansak man.

⁹Mùkkàlà “Akkwa yau tùwemassen Iulà, ” tawon tùse tùtonpa yeya'nomanài wechi màlà ewalupàttau sàlà tepose.

¹⁰Mùkkàlà tùtonpa ku'nài tù'nùn pe wemapù màlà Akkwa yau tàwàlà, molopai yà'làlà pùla iwechi màlà yau ànù'là uya àli kuttoppe iku'nài.

¹¹Màkkàlà tùtonpa yeya'nomanài wechi màlà ewalupàttau molopai ewalupàttau ichalà. I'nai yailà là tùutà ittu ya pen masapùla ewalupà uya enpùla ikussak pàk.

¹²Emenuka kon uya sàlà, umunkà yamùk, masapùla amakuyi kon pàk usentupantok yeposak auya'nokon Christ yesek pàkànsau pàk.

¹³Emenuka kon uya sàlà papai yamùk, masapùla ittusak auya'nokon pàk Mùkkàlà iwepyattà motapai iwessak lùppù. Emenuka kon uya sàlà, umoine ton, masapùla Ene Makui, yentaikasak auya'nokon pàk.

¹⁴Emenuka kon uya sàlà, umunkà yamùk lùkkwà, masapùla Kùkàipùnù kon ittusak auya'nokon pàk. Emenuka kon uya sàlà, papai yamùk, masapùla Mùkkàlà iwepyattà motapai iwessak lùppù ittusak auya'nokon pàk. Emenuka kon uya sàlà, umoine ton, masapùlà meluntà pe ewechi kon pàk; Katù Maimu wechi ayau'nokon pàk molopai Ene Makui yentaikasak auya'nokon man.

¹⁵Wolù yeselu kichi'nùnmatàu wapùla yà'làlà wolù yau nai'nùk, masapùla wolù yeselu kupù auya'nokon à'nùn kon pe yau, Kùkàipùnù kon pùnùnmatok auya'nokon pùla ewechi màlà ayau'nokon.

¹⁶Masapùla tamù'nawolon wolù yau tùwessan àli ànkuppai kappon wettok, inene molopai yà'làlà iche iwettok. Molopai tamù'nawolon sàlà wolù yau nai'nùk yà'làlà iche we'nàtok, itekkwa pe tukaik wekku'nàtok, wechi màlà Kùkàipùnù kon winàpaino pe pùla, wolù yapaino pe.

¹⁷Wolù molopai tamù'nawolon yawon kon kappon wettok iche màlà tùutàsen molopai ipla tùwenasen; tùse mùkkàlà Katù wettok iche ku'nài wemapù màlà tàwàlàlà.

¹⁸Umunkà yamùk kulu tàwà, pata weyu wenukattok mei pùla man; àpàkù'nokon Mùkkàlà Christ Yeyaton uyàttok woton yekamappù màlà. Sàlà pe tukke Christ yeyaton non usenpoikakassak man, màlàpàk ittu'nokon man pata weyu wenukattok wechi mei pùla.

¹⁹Pùsamlo kappon yamùk wechippù kùkklottawon kon pe kulu pùla màlà, màlàpàk màlà tok uya kùnàmàppù kon. Kùkklotawon kon pe tok wessak yau, tok wechippù kùpyau'nokon eppaino sàlà. Tùse tok uya kùnàmàppù kon tok wechi kùkklottawon kon pe kulu pùla ittutoppe.

²⁰Tùse Wakù Akkwalù tùsak wechippù àpona'nokon màlà Christ winà, màlàpàk tamù'nawolon kon amyamlo uya ailon ittu màlà.

²¹Emenuka kon Uyaichi sàlà, ailon ittu auya'nokon pùla iwechi pàk pùla; tùse làkku, ittu auya'nokon pàk, molopai nàlà kasei uyàpù ailon yapai pùla ittu auya'nokon pàk.

²²Ànùk ken uchi mùkkàlà kasei? Mùkyamlo, Jesus mùkkàlà Christ pen, tawonnan. Mùkkàlà wechi màlà Christ yeyaton pe. Asakklàma Kùkàipùnù molopai Imu tawonnan nulunpannan mùkyamlo.

²³Masapùla tamù'nawàlà Imu nulunpannan uya nàlà Kùkàipùnù nulunpa màlà; mùkyamlo Imu yanùnnài nan uya nàlà Kùkàipùnù yanùmù màlà.

²⁴Itekale enetappù kon iweppyattà motapai mùkuttàik eyewan kon yau. Molo eyewan kon yau iwechi yau, ewemapù kon màlà tàwàlà Kùkàipùnù molopai Imu pokonpe.

²⁵Molopai sàlàichi màlà Christ uya itùlù tùuya kùpyakù'nokon teppù lùppù, tàwàlàlà wema'nàtok.

²⁶Sàlà yamùk pàk emenuka kon uya sàlà mùkyamlo eyennakaiche'nokon nai'nannùk pàk.

²⁷Tùse amyamlo, Christ uya Takkwalù ikkwansak màlà àpona'nokon. Yakkwalù wemapù ayau'nokon kaichalà, ànù'là eyenupa kon woton iche ewechi kon pen màlà. Masapùla Yakkwalù uya eyenupa kon tamù'nawolon pàk pàk, molopai màlà enupantok ya ike màlà ailon, kasei pen. Yakkwalù uyaichi enupantok yawàlà ettàk kon, molopai Christ yau ettàk.

²⁸Ewaik, umunkà yamùk, yau ettàk kon, meluntà pe ewechi kon pa ichenpoika yau molopai àuso'namù kon wekuli'mantok yau iwinàpai iyàttok Weyu yattai tukaik.

²⁹Mùttuyatàik ku Christ wechi iwalai pe wakù pe tùwessen pe; ittuichi auya'nokon pàk, tamù'nawolon kon iwalai ku'nài nan wechi Katù munkà yamùk pe.