Read Patamona 1 John 3 Bible Online

1 John 3 - Patamona bible

1 John 3

¹Yentàk kon eke pe Kùkàipùnù kon uya kù'nùnmappù kon! Pùnùnmantok ya wechi màlà eke pe kulu màlàpàk kùyesatù kon Katù munkà yamùk tukaik. Màlàpàk imunkà yamùk kùmyamlo. Sàlà kasa iwechi pàk wolù uya kùyittu kon pùla iwechi màlà, Katù ittusak ya pùla iwechi màlà.

²Utonpa yamùk, Katù munkà yamùk kùmyamlo sàlà pe, tùse i'nai kasa kulu wenan ittu kùuya'nokon pùla man. Tùse ittu'nokon man: Christ usenpoika yau, ikasa wenan nokon màlà, masapùla yene'nokon màlà mùkkàlà pe kulu.

³Tamù'nawolon kon sàlà màmu'nàinan Christ yau tùwekkussan esuken, Christ wechi esuken kasa.

⁴Ànù'là tùwemakuimasen wechi màlà Law Katù winàpaino yawà pùla, masapùla wemakuiman wechi màlà Katù Maimu ikkwàtù pe.

⁵Mùttuyatàik Christ uyàpùppù kappon yamùk makuyi mokkatoppe tùuya, molopai makui pùla iwechi màlà yau.

⁶Màlàpàk tamù'nawolon kon Christ yau tùwemassan mùkyamlo makui yau lùppù tùwemassan pen; tùse ànù'là makui yau lùppù tùwemassen uya màlà Christ yensak pùla iwechi, molopai ittusak ya yà'là yattai là pùla iwechi.

⁷Umunkà yamùk, ànù'là eyennakatakù'nokon, ànù'là ikasa, nai'nùk ku'nài wechi màlà ikasa, Christ wechi ikasa kasa.

⁸Ànù'là tùmakuyi yau nai'nùk wechi màlà Makui ponaloppe, masapùla Makui wemakuimasak màlà iwepyattà motapai. Katù Mumu uyàpùppù màlà sàlà pàkànsau, Makui wotokoyi mattanùsse.

⁹Katù munkà yamùk pe nai'nannùk mùkyamlo tùwemakuima pàk lùppù tùwessan pen, masapùla, Katù yeselu wechi tok yau pàk, molopai Katù wechi tok kàipùnù pe pàk, tok wemakuima yentai màlà iwechi.

¹⁰Sàlà màlà tùpatalà kulu Katù munkà yamùk molopai Makui munkà yamùk wechi yekamanài: ikasa pùla tùwessan wapùla tùtonpa pùnùnman nan pen wechi màlà Katù munkà pe pùla.

¹¹Masapùla sàlà màlà itekale enetappù kon iwepyattà motapai: “Tùuchi'nùnmaik mettàik,” tawon.

¹²Cain kasa we'nà kùsettak. Ene Makui winàpaino mùkkàlà, molopai takon wànàppù ya màlà. Yà'là pe ichi iwechi pàk Cain uya takon wànàppù? Masapùla yà'làlà inkupùppù wechippù àli pe, tùse yakon nùkupùppù wechippù ikasa màlàpàk iwànàppù ya.

¹³Màlàpàk kesenumenkatàu, utonpa yamùk, kappon yamùk wolù yawon kon uya teyaton kon pe àkupù kon yau.

¹⁴Ittu'nokon man weli'nàtok nànsak kùuya'nokon molopai uyà'nàsakù'nokon wema'nàtok yak, masapùla kùtonpa kon pùnùnma'nokon pàk. Mùkyamlo tùtonpa kon pùnùnmatok ya pùnon wechi lùppù màlà weli'nàtok yau.

¹⁵Ànù'là tùtonpa ku'nài teyaton pe wechi màlà kappon wànài pe; molopai mùttuyatàik mùkkalà yekkwa yau tàwàlàlà wema'nàtok pùla iwechi.

¹⁶Sàlà kasaichi màlà uchi'nùnmantok ittu: Christ uya tùwemattok tùlùppù kùponalok kon pe. Màlà kasa nàlà wema'nàtokù'nokon tùlù màlà tonpa wannà yamùk ponaloppe!

¹⁷Tukke temamin ke we'nà molopai tonpa wannà wettalumattà yà'làlà pùla yene, tùse usentupantok ipàk pùla we'nà kùyewan kon yau, atta ken, “Katù pùnùnmatok uya ike molo man uyewan yau,” te kùuya'nokon?

¹⁸Umunkà yamùk! Pùnùnmantok kùuya'nokon imaimuppù pe neken nà kùsettak molopai uselupantok pe neken nà; tùse i'napailon ailon uchi'nùnmantok pe iwechi, welaikantok yau tùusensen pe.

¹⁹Sàlà kasaichi màlà ailon ponaloppe we'nà'nokon ittu. Sàlà kasa màlà kùyewan kon wàlàkkassak wechi Katù yemloto po ittu.

²⁰Kùyewan kon uya kùyaimelunpa yau, ittu'nokon man Katù wechi eke pe kùyewan kon yentai, molopai tamù'nawolon ittunài mùkkàlà.

²¹Màlàpàk utonpa yamùk kùyewan kon uya kùyaimelunpa kon pùla iwechi yau, meluntà pe we'nà màlà Katù yemloto po usenalippan pen.

²²Yà'làlà yennasak lùppù yeponài nan kùmyamlo iwinàpai, masapùla suwa ekkà tetok ya yawàlà we'nà'nokon pàk molopai iche iwettok kupù'nokon pàk.

²³Sàlàichi màlà Katù uya suwa ekkà tetok: ailon tetoppe Tùmu Jesus Christ yesek pàk, molopai uchi'nùnmantoppe, Christ uya suwa ekkà tetok kasa.

²⁴Mùkyamlo Katù uya suwa ekkà tetok yawolon kon wemapù màlà Katù yau, molopai Katù wemapù nàlà tok yau. Sàlà kasaichi màlà Katù wemapù kùyau'nokon ittu'nokon: ittu màlà masapùla Takkwalù ke lepansak ya pàk.