Read Patamona 1 John 4 Bible Online

1 John 4 - Patamona bible

1 John 4

¹Utonpa yamùk, ailon kùkatàu tamù'nawolon kon, Katù yakkwalù yesappe tukaik tùusennakasan pàk, tùse yentàk kon sàlà akkwalù itesappe tok wettok wechi là Katù winàpaino pe. Masapùla tukke Katù Maimu yenpoikannan pe tukaik tùukaseitasan utàppù man mailàlà wolù yau.

²Sàlà kasaichi Katù Yakkwalù wechi ttu auya'nokon màlà. Tamù'nawolon kon Jesus Christ wenappù kappon pe yekamanài wechi màlà Akkwalù Katù winàpaino yesappe.

³Tùse ànù'là sàlà nulunpanài molopai Jesus wenappù kappon pe pàk ailon tawon pen wechi Akkwalù Katù winàpaino yesappe pen màlà. Sàlà akkwalù wechi màlà mùkkàlà Christ yeyaton winàpaino pe; yetasak auya'nokon man màlà uyàpù, molopai sàlà pe talà man sàlà wolù yau.

⁴Tùse Katù ponalok kon amyamlo, umunkà yamùk, molopai mùkyamlo ailon ton pen, yekamannan yentaikasak auya'nokon man; masapùla màlà Akkwalù ayau'nokon nai'nùk màlà meluntàiwa, màlà akkwalù wolù yawon yentaino.

⁵Tùuselupasan mùkyamlo wolù yawon kon yà'là yamùk là pàk molopai tok yeta wolù uya.

⁶Tùse Katù ponalok kon kùmyamlo. Ànù'là Katù ittunài uya kùyeta kon màlà; ànù'là Katù ponalok pen uya kùyeta kon pen màlà. Sàlà kasaichi màlà ailon Akkwalù molopai iwalai pen akkwalù wechi tùpatalà kulu ittu.

⁷Utonpa yamùk kulu, uchi'nùnmanpai'nokon uchi, masapùla uchi'nùnmantok màlà tùuyàssen Katù winàpai. Ànù'là, kappon pùnùnmanài wechi màlà Katù mule pe molopai Katù ittunài mùkkàlà.

⁸Ànù'là, kappon pùnùnmanài pen uya Katù ittu pùla iwechi màlà, masapùla Katù mùkkàlà pùnùmanài.

⁹Sàlà kasa Katù uya pùnùnmantok tùuya yenpoikappù kùponaloppe: tewinan Tùmu yeunokoppù ya sàlà non pona yai wema'nàtok yesappe we'nàtoppe.

¹⁰Sàlà walai uchi màlà pùnùnmantok: Katù pùnùnmappù kùuya'nokon pen màlà, tùse kù'nùnmappù kon ya molopai Tùmu yeunokoppù ya iwelittoppe kùmakuyi kon yepeppe.

¹¹Utonpa yamùk kulu, sàlà kasaichi Katù uya kù'nùnma kon yau, echi'nùn pe we'nàpai man.

¹²Ànù'là uya Katù yensak pùla iwechi màlà; tùse echi'nùn pe we'nà'nokon yau, Katù wechi màlà kùyau'nokon molopai tù'nùn tùsak ya màlà kùyakù'nokon tamù'nawàlà.

¹³Sàlà kasaichi màlà Katù yau wema'nà'nokon ittu molopai iwemapù kùyau'nokon: lepansak ya Takkwalù ke.

¹⁴Molopai yensak kùuya'nokon man molopai yekama man tùulon kon pàk Kùkàipùnù uya Tùmu yeunokoppù sàlà wolù yawon kon pùikattànài pe iwettoppe.

¹⁵Ànù'là Jesus wechi Katù Mumu pe yekamanài wechi yau, Katù wemapù màlà yau, molopai iwemapù màlà Katù yau.

¹⁶Molopai ittu'nokon man molopai ailon te'nokon Katù piyawon pùnùnmantok kùponalok pàk. Katù mùkkàlà pùnùnmanài, molopai ànù'là uchi'nùnmantok yau tùwemassen wemapù màlà Katù yau, molopai Katù wemapù yau.

¹⁷Sàlà kasaichi iwechi pàk màlà wakù uchi'nùnmantok wechi kùyau'nokon tamù'nawàlà: meluntà pe we'nàtoppe ittuntok Katù uya Weyu yattai, masapùla wema'nàtok nokon sàlà wolù yau wechi Christ wemattok kasa pàk.

¹⁸Nalippe pùla ku'nài màlà uchi'nùnmantok. Wakù kulu uchi'nùnmantok màlà tamù'nawàlà nalik pe we'nàtok yenpenài, masapùla nalik pe we'nàtok màlà wettalumattàntok pokon pan. Màlàpàk mùkkàlà nalik pe tùwessen usemokkasak pùla iwechi màlà wakù kulu uchi'nùnmantok yak.

¹⁹Uchi'nùnman nokon tùwessen masapùla Katù uya wapiya pùnùnmansakù'nokon pàk.

²⁰Ànù'là uya, “Katù tù'nùnmayaik,” te, tùse tùtonpa yeya'nomanài, mùkkàlà wechi màlà, kasei pe. Masapùla Katù tùneneppù pen pùnùnmatok ya pùla iwechi màlà tùtonpa tùnene pùnùnmai'ma pùla.

²¹Sàlàichi màlà Christ uya suwa ekkà tetok tùuya ke lepa'nàppà lùppù, mùkkàlà Katù pùnùnmanài uya nàlà tùtonpa pùnùnma màlà.