Read Patamona Jude 1 Bible Online

Jude 1 - Patamona bible

Jude 1

¹Sàlà màlà kaleta Jude, Jesus Christ yapyoto, molopai James tonpa nùmenukappù. Katù Kùkàipùnù kon nùkà'massan molopai Katù uya pùnùnmantok yau tùwemassan molopai Jesus Christ uya mainanpantok yau tùwemassan piyak inmenukappù sàlà:

²Tàwà usentupantok, echitonpa pe we'nàtok, molopai uchi'nùnmantok nenai eke pe àponalok kon pe.

³Utonpa yamùk, tùusenumenkaik kulu kaleta menuka pàk wekkupùppù apyakù'nokon wepùikattàntok Katù nùtùlùppù kùponalok kon pe nai'nàk pàk, tùse emenuka uya làkku sàlà eumeluntàta kon pa ewepanta'ma kon pàk ewechi kon pa ailon tetok ipàk pàkànsau tewin itekkwa neken molopai tamù'nawolon pe Katù uya tùponalok kon lepatok ike.

⁴Masapùla tùulon kon àliton kappon yamùk wewonsak man amak yai kùkklotta'nokon ittu kùuya'nokon pùla, pùsamlo lùppù uya wakù pe we'nàtok Katù winàpaino lattàsak man iche tùwettok kasa tùwechinma pàk tùwettok kon ipàkàlà pe, molopai Jesus Christ tewinan Kùyepulu kon molopai tamù'nwolon kon Yepoino nulunpa tok uya. Pena Katù Maimu uya yekamappù sàlà talumattàntok tok nepoloppù.

⁵Tamù'nawàlà lànen sàlà ittu auya'nokon tùse, eyenu kon anapontàpai wessaik Itepulu Katù uya Israel pon kon kappon yamùk mokkappù Egypt yapai, tùse màlà tùpo mùkyamlo ailon tawonnan pen talumattàppù ya pàk.

⁶Inchelù yamùk ittutàk kon wapiyalok tùpatassek kon yau iwessak kon pen, tùse tùpatassek kon nànnài nan nùssan. Katù uya tok kussak màlà ewalupà yau, tok taulonse tàwàlàlà Eke Wei ponalà, tok talumattà toppe.

⁷Sodom molopai Gomorrah ittutàk kon, molopai iwoinokon pata yamùk, sàlà pata yawon kon kappon yamùk wechippù màlà mùkyamlo inchelù yamùk tùpata kon nànnàinannùssan kasa molopai àli imakuyippù pe we'nàtok esak ke, iwettok kasa pùla: Tok talumattà màlà tàwàlàlà tùuyassen apok ke tamù'nawolon kon yenu yappolù pe.

⁸Màlà kasa làma pùsamlo kappon yamùk tùwe'neppàssan àli pe. Tok we'nepàtok tok ku'nài àli pe tok wetoppe tesak kon winàkàik, Katù yapàikketù nulunpannan mùkyamlo; molopai kawon kon akkwalù yamùk mottùnpannan.

⁹Inchelù yamùk yepulu, Michael uya sàlà kussak pùla iwechi màlà. Tepùlù pokonpe tùusàulàma kon pe tùuselupa kon Moses yàkàpù pàk yau, Michael usenalippappù màlà. Tepùlù mottùnpappù ya pen, tùse, “Itepulu uya àyàulàma màlà,” teppù ya.

¹⁰Tùse pùsamlo kappon yamùk mùkyamlo màlà yamùk tunùttu kon pen mottùnpanài nan tùusenumenkasan pe pùla tok wechi; molopai tok uya ittutok elannek kamo yamùk uya ittutok walai yekkwa ke, uya màlà tok mattanùpù.

¹¹Talumattàntok wechi màlà tok po! Masapùla tok utàsak Cain utàppù yawàlà lùppù yawà pàk; tok wettùsak man iwalai pen yak pùlayatta pàkànsau, Balaam wechippù kasa; molopai tok mattanùssak man mayin yawàlà pùla we'nàtok pàkàlà Korah wechippù kasa.

¹²Pùsamlo ku mùkyamlo echitonpa pe tamùkke tùwepiliche auta'letàtok kon yau, kuli'manài nan tùuta'letà kon yau. Tùpàkù'nokon neken tùusenumenkasan. Assetun uya katuppluk yalà konok pùla walainon mùkyamlo. Yei itepelu pùnon walainon mùkyamlo kùyali yemeikatok yattai; yei yamùk ikalakasak kon molopai iwaipùtakassak walai non.

¹³Palau pon àsà chipachipa walainon mùkyamlo, kuli'manàinan teselu kon pokonpe tùusenpoika kon ke yaklon kasa. Tùutamasan chilùkà walainon mùkyamlo, Katù uya tok pata woton kussak màlà ewalupàttau we'nàtok tàwàlàlà yau.

¹⁴Enoch, Adam pa 7 pe Adam ye'mappù pokon mùkkàlà pùsamlo pàk Katù Maimu yenpoikanàippù lùppù: “Yenkà! Itepulu uyàpù màlà tukkan kon kulu wakù ton inchelù yamùk pokonpe,

¹⁵tamù'nawolon kon kappon yamùk ittuse molopai tamù'nawolon kon Katù pùnon talumattàse, tamù'nawolon àli ton tok nùkupùppù pàkànsau, molopai tamù'nawolon àli pe tok uselupappù Katù winàkàik pàkànsau!” tukaik.

¹⁶Pùsamlo mùkyamlo kappon yamùk tùusàlàma pàk tùwessan tàwàlà, àli tùulon kon yeselu yeneiche kulu tùwessan; iche tùwettok kon yawàlà tùwessan àli yau; tùutapulàsan, molopai tùulon kon yapulà pe tukaik tùusennakasan yà'làlà iche tùwettok kon yepotoppe tùuya'nokon.

¹⁷Tùse utonpa yamùk, pena iwekkupù wapiya Kùyepulu Jesus Christ neunokossan nekamappù lùppù kan mùttutàik tà.

¹⁸Tok uya àpàkù'nokon, “Pata weyu wenukapù pe iwechi yau, kappon yamùk usenpoika màlà àmottùnpa kon woton kon, kappon yamùk Katù yeselu walai pen iteselu ton,” teppù.

¹⁹Pùsamloichi mùkyamlo wepantapà'nàtok ku'nàinan, kappon yeselu neken ànkuppai tùwessan, Wakù Akkwalù pùnon.

²⁰Tùse amyamlo, utonpa yamùk kulu, esemokkatàk kon wakù ailon tetok auya'nokon ipàk yau. Àpùlematàk kon Wakù Akkwalù meluntàlù yau,

²¹molopai Katù yau tùutauchinpaik ettàk kon, Kùyepulu Jesus Christ uya tùusentuppatok winà elepa kon tàwàlà wema'nàtok ke màmukui'ma.

²²Ailon te ya ma'le nai'nannàk pàk esentuppatàk

²³Tùulon kon ipùikattàtàk asse'ne apok yapai tok mokka auya'nokon ke. Molopai nàlà tùulon kon pàk esentuppatàk kon nalik pe echii'ma, tùse mei mettàik tok yeselu winàpai màlà tok wemattok yoi'manàippù, tok pon nà kusappàttàu eyewanma kon pe mùkuttàik.

²⁴Mùkkàlà ewekkawai'ma kon tukaik àku'nài'nokon molopai esuken yà'làlà àli pùla enessai'nàk nokon, molopai tùutauchinpaik àtùnài'nokon wakù takkwayi yemloto pona yapulà nechii.

²⁵Tewinan Katù Kùpùikattànài'nokon Jesus Christ Kùyepulu kon yai piyau apulàntok nechii. Inamatok nechii. Itepulu pe we'nàtok meluntàlù nechii. Molopai apàikkek nechii, sàlà pe molopai tàwàlàlà molopai tàwàlàlà! Emen.