Read Patamona Revelation 1 Bible Online

Revelation 1 - Patamona bible

Revelation 1

¹Sàlà màlà Jesus Christ nenpoikassan. Sàlà yamùk tùlùppù màlà Katù uya itemyak, tapyoto ton pàk tùwekkupù woton tachinpe kulu tùpo pùla yenpoikatoppe ya. Christ uya tùyinchelùyi yeunokoppù màlà tapyoto John piyak, sàlà yamùk yenpoikase ipàk.

²John uya tamù'nawolon tùneneppù yekamasak man. Sàlàichi màlà inekamappù itekale Katù winàpaino, yenpoikasak Jesus Christ winà.

³Tùutauchinpasen mùkkàlà sàlà kaleta yennài, molopai tùutauchinpasan nàlà mùkyamlo iwekkupù wapiya yekamasak itekale maimu yetannan. Molopai sàlà kaleta yau imenukasak maimu yawolon kon. Masapùla sàlà yamùk wekuttok yattai weyu mei pùla man.

⁴John winàpaino 7 pan sochi yamùk pata Asia yawolon kon piyak: Tàwà wakù Katù nùkupù molopai echitonpa pe we'nàtok Katù winàpaino apyau'nokon nechii. Mùkkàlà sàlà pe nai'nùk, iwechippù nai'nùk molopai tùuyàpù woton pe nai'nùk winàpaino apyau'nokon nechii, molopai 7 pan kon akkwalù yamùk Katù yapon yemloto po tùwessan winàpaino.

⁵Molopai màlà wechi màlà Jesus Christ winàpaino pe. Ailon pe tùuselupasen Katù pàk, mùkkàlà wapiya iwuluukasak lùppù weli'nàtok yapai. Non po kin pe tùwessan yepulu pe nàlà nai'nùk. Kù'nùnmanài'nokon mùkkàlà, molopai tùmùnù winà kùpùikattàsak kon ya màlà kùmakuyi kon yapai.

⁶Molopai kùkonekasak kon ya màlà pata yepulu pe tùkàipùnù ponaloppe, molopai tùkatùyi ponaloppe molopai paatele yamùk pe nàlà. Jesus Christ ponalok peichi namantok molopai apulàntok molopai meluntà nechii tàwàlàlà molopai tàwàlàlà. Emen.

⁷Yentàk, nùyàssan katuppluk yau! Tamù'nawolon kon uya yene màlà. Mùkyamlo ipukapà'nài nan nùssan uya là. Tamù'nawolon kon kappon yamùk sàlà non pon kon usewankono'ma màlà iwenai. Ewaik, màlà kasa iwettok woton! Emen.

⁸“Alpha Iulà molopai Omega iweppyattàtok molopai iwenukattok,” tawon mùkkàlà Itepulu Katù, sàlà pe nai'nùk, iwechippù nai'nùk, molopai tùuyàpù woton, Mùkkàlà neken Meluntà.

⁹Iulà mùkkàlà John, àtonpa kon, molopai Jesus ponalok Iulà àpokon pan kon, wettalumattàntok yau molopai pàlikantok yau itepulu pe iwettok yau. Pata lùkkwà tuna iwoino Patmos po wechippù màlà masapùla Katù Maimu molopai ailon Jesus nenpoikappù yekamasak uya pàk.

¹⁰Itepulu Weyu yattai Wakù Akkwalù wenappù uyesappe màlà molopai, eke mayin yetappù uya màlà ichelupa umpoi winà wai tàwù kasa.

¹¹“Enene imenukakà, molopai kaleta yeunokkà 7 pan pata yamùk yawon kon sochi yamùk piyak: Ephesus, Smyrna, Pergamum, Thyatira, Sardis, Philadelphia molopai Laodicea pon kon yemyak,” teppù ya.

¹²Welattàppù màlà ànù'là uya uyelupa yense. Molopai yeneppù uya 7 pan kolù yapai ikonekasak lanppu yapon yamùk.

¹³Sàlà yamùk kùlottau kàyik mumu walai wechippù satippe, iwepontàsak kusan pon yak tùtta tepoik, molopai kolù pùlopo mùk wechippù iplopo woi. {Dan 7.13}

¹⁴Ippai wechippù aimu'ne kàtàkkwak yentai molopai itenu ulenpansak wechippù apok kasa.

¹⁵Itta ulenpamùppù kalukuli uyatù waweitasak kasa, molopai ikalapaimasak kasa, molopai imaimu usetappù eke tuna melu kasa.

¹⁶7 pan chilùkà yamùk yachippù ya kamik pen temyatù yau, molopai yàkek asa'lon yà kasupala wepakkappù intapai. Itenpata wechippù màlà akkwa pe inakatapailà wei wechi yakkwayi kasa.

¹⁷Yensak uya yau, wekkawai'mappù itta piyau iwelichak kasa. Kamik pen temyatù tùlùppù ya upona molopai, “Kettalipai! Iweppyattàtok Iulà, molopai iwenukattok,” teppù ya.

¹⁸“Nulà nan Iulà! Welikùppù màlà, tùse yenkà, nulà wessaik tàwàlàlà molopai tàwàlàlà. Tapàikketù ke wechi nai'nùk weli'nàtok yepoi molopai iwelichak kon patassek yepoi.

¹⁹Enene yamùk uchi imenukakà, asakklàma sàlà pe nai'nùk molopai màlà yamùk tùwekkupù woton kon àkàmlàk,” teppù ya nàlà.

²⁰“7 pan chilùkà yamùk kamik pen uyemyatù yau menyai'nùk molopai 7 pan kolù yapai ikonekasak lanppu yapon nekama màlà sà tonantau nai'nùk. 7 pan kon chilùkà yamùk mùkyamlo inchelù yamùk 7 pan sochi yamùk inchelùyi yamùk, molopai 7 pan kolù yapai ikonekasak lanppu yapon yamùk màlà 7pan sochi yamùk,” teppù ya nàlà.