Read Patamona Revelation 17 Bible Online

Revelation 17 - Patamona bible

Revelation 17

¹Màlàyau 7 pan kon inchelù yamùk tonpa mùkkàlà 7 pan pùsau yamùk yesak uyàpùppù upyak, molopai, “Àikkà, molopai yà'là kasa là kàyik yamùk yemyak tùwechilanmasen nossan talumattàtok yekama uya màlà, mùkkàlà chichiu pe tùwessen tukkan tuna yamùk po.

²Non pon kon kin yamùk uya àli kupùppù tùwekumase mùkkàlà eke nossan kàyik yamùk yemyak tùwechilanmasen pokonpe, molopai non pon kon kappon yamùk wetùmùppù, màlà wain kàyik yamùk pokonpe iwettok yeuku tinchise,” teppù ya.

³Wakù Akkwalù uya uyachippù màlà, molopai inchelù uya uyalàppù wontaik yak. Molo nossan yeneppù uya chichiu pe, ichuweyu àsà ene po, molopai mùkkàlà wechippù 7 pe ippai molopai 10 pe iletù, àli ton esek yamùk menukasak Katù talumattà pe wechippù ipolo.

⁴Nossan wepontàsak wechippù tùtalilen molopai ichuweyu yak, ipolo kolù wechippù, wakù ton tàk yamùk, molopai pearl yamùk. Temyau kolù kok yachisak ya wechippù yanùkkasak àli ton Katù yewanma ton ke, kàyik yamùk pokonpe tùwesse àli pe inoi'mappù.

⁵Ipeyeppà pàk esek menukasak wechippù tùttusen pen, “Eke Babylon, tamù'nawolon kon kàyik yamùk yemyak tùwechilanmasan molopai àli ku'nàinan non pon kon yan,” tawon.

⁶Molopai yeneppù uya nossan wetùnsak Katù ponalok kon kappon yamùk mùnù ke. Molopai mùkyamlo iwàsak kon nùssan mùnù ke, masapùla ailon pe tok wessak Jesus pàk wenai. Yensak uya yau usenumenkasak kulu wechippù.

⁷“Yà'là peichi iwechi pàk eusenumenkasak màlà?” tukaik inchelù uya uyekamappoppù. “Tùttusen pen yekama uya màlà pùsàlà nossan molopai yapon àsà ene walai, 7 pan ippai molopai 10 pan iletù nekama.

⁸Àsà ene menpàssai'nùk wechippù màlà molo, tùse molo pùla nen uchi iwechi màlà. Iiyàpù i'nauwon iteuta yapai winàkàik man molopai iità màlà tùmattanùttoppe. Kappon yamùk non po tùwemassan itesek imenukasak kon pen wema'nàtok yapon kaleta yau, non wepyattà motapai, usenumenka kulu màlà tamù'nawàlà, àsà ene yene tùuya'nokon yau. Masapùla nulà iwechippù màlà, tùse nulà pùla nen uchi iwechi, molopai ichenpoika tu'ma màlà.

⁹“Sàlà màlà pukkek molopai ittutok iche tùwessen. 7 pan puppà yamùk màlà 7 pan wùk yamùk, wùk yamùk nossan wettok chichiu pe ipo, 7 pan kon nàlà kin yamùk.

¹⁰5 pe tok we'nonkasak man, tewinan tok tonpa kin pe lùppù man, molopai tùulon nùppù molo man iyàssak pùla, iyàssak yau tachin pe pùla iko'mamù màlà.

¹¹Molopai àsà ene nulà iwessak lùppù, tùse molo pùla nen uchi nai'nùk, mùkkàlà 8 pe iku'nài kin wapiyalok kon 7 pan kon tonpa, molopai tùutàsen woton tùmattanùttok yak.

¹²“10 pan kon letù yamùk meneinùk mùkyamlo 10 pan kon kin yamùk itepulu pe tùwettok kon piyattàsak ya pùla nai'nannùk, tùse tok lepa màlà apàikkek ke kin yamùk kasa tok wettoppe malalà one hour àsà ene pokonpe.

¹³Pùsamlo 10 pan kon wechi màlà tamù'nawàlà tewin ichenumenkatok, molopai tùmeluntàlù kon molopai tapàikketù kon tùlù màlà tok uya àsà ene yemyak.

¹⁴Tok wepanta'ma màlà Kalinilu Mule winàkàik, tùse Kalinilu Mule molopai inkà'massan, inanùmùssan molopai ailon pe iwessak kon ya'lon kon uya tok yentaika màlà, masapùla itepulu yamùk Yepulu mùkkàlà molopai kin yamùk Kinù,” teppù ya.

¹⁵Inchelù uya nàlà wateppù upàk, “Tuna yamùk meneinùk tùwechilanmasen wechi chichiu pe ipo, mùkyamlo kappon yamùk molopai ilinà ton molopai kappon yamùk pata yamùk non pon yawolon kon molopai tùpatalo'nan mayin yamùk.

¹⁶Àsà ene molopai 10 pan iletù yamùk meneinùk uya, nossan, kàyik yamùk yemyak tùwechilanmasen yeya'noma màlà, tok uya tamù'nawà itesak pe iwettok yalà màlà molopai tok uya inàmà ipon pùla, tok uya ipun yanù màlà molopai imattanùpù tok uya apok ke.

¹⁷Masapùla Katù uya tok yewan yak itùsak wechi màlà iche tùwettok kuttoppe tok uya, tewin ichenumenkatok tùwelaikatok kon yau, molopai àsà ene yemyak tùmeluntàlù kon tùlù tùuya'nokon itepulu pe iwettok pe yau, Katù uselupatok lùppù wekkupù ponalà.

¹⁸Nossan meneinùk màlà eke pata non pon kon kin yamùk yepoi tùwessen,” teppù.