Read Patamona Revelation 21 Bible Online

Revelation 21 - Patamona bible

Revelation 21

¹Màlàyau nen uchi emennak epùn molopai emennak non yeneppù uya. Wapiyalok epùn molopai non waliwomùppù molopai palau pùla iwechippù.

²Molopai yeneppù uya wakù esukenan eke Pata, emennak Jerusalem uttà epùn yapai Katù piyapai, ikonekasappe ema'non wepontàsak wakù pe tùtayappù yepose tùutàtoppe kasa.

³Eke mayin uselupa yetappù uya aponnok winàpai, “Katù patassek nen uchi kappon yamùk piyau man! Tok pokonpe iwemapù màlà, molopai iponaloppe tok wechi màlà. Katù wechi màlà tùmàlà pe tok piyau, molopai tok Katùyi pe iwechi màlà.

⁴Tamù'nawàlà tok yenu palu ya'munakka ya màlà tok yenu poi. Weli'nàtok pùla nen uchi iwechi màlà, usewankono'mantok pùla iwechi, kalannàtok wapùla i'ninàtok pùla. Masapùla penalok kon waliwomùppù man,” tukaik.

⁵Màlàyau mùkkàlà chichiu pe tùwessen aponnok po uya, “Molopai nen uchi sàlà pe tamù'nawolon koneka uya sàlà emennappe!” “Sàlà imenukakà, masapùla sàlà mayin màlà ailon molopai ailon tetok ipàk,” teppù ya nàlà.

⁶Molopai upàk, “Nenukappàssan! Iulà mùkkàlà Alpha molopai Omega iweppyattàtok molopai iwenukattok. Ànù'là iwe'nakklipasak nai'nùk lepa uya màlà epe'mùn tuna ke wema'nàtok palu yapai.

⁷Ànù'là entaikanàippù uya sàlà yamùk wakù ton yepolo màlà uwinàpai. Ikatùyi pe wechi màlà molopai umu pe iwechi màlà.

⁸Tùse tùusenalippasan molopai ailon tawonnan pen, mùkkyamlo àli pe tùwessan, wànnan, tesak ke àli ku'nàinan, mùkyamlo piyassan yeselu ku'nàinan molopai ikonekasak katù yapulànnan, molopai tamù'nawàlà kasei ton uya tùnepolo kon yepolo màlà eke kulu apok tùuyassen patassek molopai kulupala kasa tùkà'nùnsen yau, màlà yakon itekkwa pe weli'nàtok,” teppù ya nàlà.

⁹7 pan kon inchelù yamùk tonpa mùkkàlà 7 pan pùsau yamùk yanùkkasak 7 pan iwenukatok talumattàntok ke, yesak uyàpùppù upyak molopai, “Àikkà, molopai Ema'non Kalinilu Mule noppù woton yekama uya màlà àpàk,” teppù ya.

¹⁰Molopai inchelù uya uyalàppù eke, kawon kulu wùk nakatta pona Wakù Akkwalù yau. Jerusalem, Wakù esukenan eke pata, uttà epùn poi Katù piyapai yenpoikappù ya upàk.

¹¹Ilenpamùppù Katù yakkwayi ke. Pata ulenpamùppù wakù ton tàk jasper molopai akkwa crystal kasa.

¹²Eke pe molopai kau iwe'na wechippù, 12 pe imlatta wechippù, molopai 12 pan kon inchelù yamùk wechippù manatta yamùk yesappe. Manatta yamùk pàk, 12 pan kon Israel mumu yamùk yesek menukasak wechippù.

¹³Àsolùwau manatta wechippù wei wepakkatok winà, àsolùwau kamik pen wei wepakkatok winon winà, àsolùwau kamik wei wepakkatok winon winà, molopai àsolùwau wei wewontok winà.

¹⁴Pata we'na kassak wechippù 12 pan tàk yamùk po, ipàk màlà 12 pan kon Kalinilu Mule neunokossan yesek menukasak wechippù.

¹⁵Inchelù upokon pe ichelupasak lùppù piyau kolù, kusan pe yà'làlà wechi ittutok ike wechippù, pata ittutoppe, imlatta yamùk, molopai iwe'na.

¹⁶Ekkaichalà iwechippù, kusan pe iwettok wechippù itawenetù kaichalà. Inchelù uya pata ittuppù ittutok tùuya ike ke, kusan pe iwechippù 12,000 pe ikusano, itawenetù kasa, molopai kakàik, kusan pe iwechi kasa.

¹⁷Inchelù uya nàlà iwe'na ittuppù, molopai kau iwechippù 144 pe'ne lùkkwà, kappon ittusak ittutok ike ke yawàlà, màlà inapulà.

¹⁸Iwe'na konekasak wechippù wakù tàk jasper yapai, molopai pata konekasak wechippù esuken kolù pe, akkwa pe kulu.

¹⁹Pata we'na yapon tàk yamùk yùpùlùttàsak wechippù màlà tùpatalo'nan wakù ton tàk ke. Wapiyalok yamùtok ipo tàk wechippù màlà jasper, yakon wechippù sapphire, icholùwano wechippù agate, ichakùlà'no wechippù lola tàk emerald,

²⁰5 pe iku'nài wechippù onyx, 6 pe iku'nài wechippù carnelian, 7 pe iku'nài wechippù quartz, 8 pe iku'nài beryl, 9 pe iku'nài topaz, 10 pe iku'nài chalcedony, 11 pe iku'nài turquoise, 12 pe iku'nài amethyst.

²¹12 pan manatta yamùk màlà 12 pan pearl yamùk, tewinpàk manatta konekasak wechi màlà tewinan pearl yapai. Pata yawon asanta màlà esukenan kolù, akkwa kulu.

²²Katù yùwùk yeneppù uya pata yau pen màlà, masapùla Imàlà là Mùkkàlà Itùwùk, Itepulu Katù, Mùkkàlà neken Meluntà, molopai Kalinilu Mule.

²³Pata wechi wei wapùla kapùi iche pen màlà tùweyuttàtoppe ya, masapùla Katù yakkwayi là màlà iweyuttànài, molopai Kalinilu Mule Mùkkàlà ilanppuyi.

²⁴Kappon yamùk pata yamùk non pon yawolon kon usalà màlà iweyu yau, molopai kin yamùk uya tùnamatok kon nepù màlà yak.

²⁵Pata mùlatta yamùk wechi màlà takkokase tàwàlà weinai, màlà yamùk yakkolo pen màlà, masapùla ewalupà pùla iwechi màlà molo.

²⁶Eke pe we'nàtok molopai pata yamùk wettok tùnamasan pe nepù màlà, màlà patassek yak.

²⁷Tùse yà'làlà àli là wapùla ikopposak là wewomù pen màlà pata yak, wapùla ànù'là, kuli'manài pe nai'nùk Katù yewanma ton ku'nài molopai kasei pe tùwessen. Tùse mùkyamlo neken, itesek imenukasak kon Kalinilu Mule kaletayi wema'nàtok kaletayi yau wewomù màlà pata yak.