Read Patamona Revelation 22 Bible Online

Revelation 22 - Patamona bible

Revelation 22

¹Inchelù uya nàlà yenpoikappù upàk, tuna wema'nàtok palu crystal ulenpansak kasa tùusensen, Katù yapon molopai Kalinilu Mule winàpai tùuyàssen.

²Tùwu'masen pata yawon eke asanta yakletawàlà. Asakklàma tuna yena po'ne wema'nàtok yek wechippù tùwepetasen 12 pe itekkwa kilichimochi yau, tewin itekkwa kapùi pàk, molopai yale wechi màlà kappon yamùk pata yamùk yawon kon ipittànài pe.

³Yà'làlà Katù uya pa'nù'nàtok wessepotukka pen nen uchi màlà pata yau. Katù yapon molopai Kalinilu Mule yapon wechi màlà pata yau, molopai itapyoto yamùk uya yapulà màlà.

⁴Tok uya màlà itenpata yene, molopai itesek menuka màlà tok peyeppà pàk.

⁵Ewalupà pùla nen uchi iwechi màlà, molopai tok wechi lanppu wapùla wei yakkwayi iche pen màlà, masapùla Itepulu Katù wechi màlà tok weyu pe, molopai itepulu pe tok wechi màlà kin yamùk pe, tàwàlàlà molopai tàwàlàlà.

⁶Màlàyau inchelù uya upàk, “Sàlà mayin yamùk màlà ailon molopai ailon tetok ipàk. Molopai Itepulu Katù, mùkkàlà Takkwalù tùnài tùmaimu yenpoikannan piyak uya tùyinchelùyi yeunokoppù tapyoto yamùk pàk sàlà pe'ne là tùwekkupù woton yekamase,” teppù.

⁷“Yetatàk kon! Uyàpù màlà tachinpe kulu tùpo pùla! Tùutauchinpasan mùkyamlo Katù Maimu yenpoikannan nekamappù sàlà kaleta yawon kon maimu yawàlà tùwessan!” nùkayan Jesus.

⁸Iulà, John, uya màlà tamù'nawàlà sàlà yamùk yetappù molopai yeneppù. Molopai sàlà yamùk yetakassak uya molopai yenkassak uya yau, wepeimappù inchelù pùta piyau yapulàtoppe uya, mùkkàlà sàlà yamùk yekamanàippù upàk.

⁹Tùse upàk, “Kùkkupùi! Apyoto Iulà àtonpa molopai àtonpa yamùk Katù Maimu yenpoikannan tonpa, molopai tamù'nawàlà mùkyamlo sàlà kaleta yawon mayin yawàlà tùwessan tonpa. Katù làkku yapulàkà!” teppù ya.

¹⁰Molopai wateppù ya upàk, “Iwekkupù wapiya yenpoikasak mayin sàlà kaleta yawon kùkkupùi tekamaik pùla, masapùla tamù'nawàlà sàlà yamùk wekkuttok yattai mei pùla man.

¹¹Ànù'là ikasa pùla nai'nùk, tàwà là ikasa pùla lùppù nechii, molopai ànù'là àli pe nai'nùk tàwà àli pe lùppù nechii, ànù'là wakù pe nai'nùk tàwà wakù pe lùppù nechii, molopai ànù'là wakù pe esuken nai'nùk tàwà wakù pe esuken lùppù nechii,” teppù ya.

¹²“Yetatàk kon! Uyàpù màlà tachinpe kulu tùpo pùla. E'mantok uya nepù uya màlà uya'là, tamù'nawolon kon yemyak untùlù tok nùkupùppù yawàlà.

¹³Iulà mùkkàlà Alpha molopai Omega, wapiyalok molopai àkàmlà'no, iwepyattàtok molopai iwenukatok,” nùkayan Jesus.

¹⁴Tùutauchinpasan mùkyamlo tùpon kon kukannan wakù pe, wema'nàtok yek yepelu nattoppe tùuya'nokon, molopai tok wewomù màlà manatta yai pata yak.

¹⁵Tùse polopo màlà a'a yamùk wechi, mùkyamlo piyassan yeselu ku'nàinan, molopai àli ku'nàinan tesak kon ke, wànnan, Katù pen ikonekasak yemlotopo tùwepeimasan, molopai mùkyamlo tamù'nawàlà kasei ton asakklàma tùuselupatok kon yau molopai tùwelaikatok kon yau.

¹⁶“Iulà Jesus uya, uyinchelùyi yeunossak nai'nùk sàlà yamùk yekamase àpàkù'nokon sochi yamùk tau. David pa Iulà, akkwa Ko'làmalok Kaiwonok, Iulà,” teppù Jesus uya.

¹⁷Wakù Akkwalù molopai Ema'non, inoppù woton, “Àikkà!” nùkayan. Tamù'nawolon kon sàlà yetan nan nàlàichi tàwà, “Àikkà!” nùkai. Àikkà, ànù'là iwe'naklipasak nai'nùk, wema'nàtok palu tuna yanùnkà lepantok kasa, ànù'là iche tùwessen.

¹⁸Iulà, John, eyekamappoyatàu tùumayintaik tamù'nawolon kon Katù nenpoikappù sàlà kaleta yawon yetannan, ànù'là uya yà'làlà ke itonpattàsak yau, Katù uya italumattàtok tonpattà màlà, talumattàntok yekamasak lùppù sàlà kaleta yau ke.

¹⁹Molopai ànù'là uya yà'làlà mokkasak sàlà Katù Maimu yenpoikannan maimu sàlà kaleta yapai yau, Katù uya wema'nàtok yek yepelu pùkkù pe iwettok, molopai Wakù Pata pùkkù pe iwettok mokka màlà, yekamasak lùppù sàlà kaleta yau.

²⁰Mùkkàlà, sàlà yamùk yekamanài, “Ewaik! Uyàssaik tachin pe kulu tùpo pùla!” nùkayan. Emen. Tàwàichi sàlà kasa nechii. Àikkà, Itepulu Jesus!

²¹Tàwàichi wakù Itepulu Jesus winàpaino Katù ponalok kon piyau nechii! Emen