Read Patamona Revelation 3 Bible Online

Revelation 3 - Patamona bible

Revelation 3

¹“ Sardis pon Sochi inchelùyi piyak sàlà imenukakà: “Sàlàichi màlà itekale mùkkàlà 7 pan akkwalù yamùk Katù winàpaino molopai 7 pan chilùkà yamùk yesak winàpaino. Ànkupù tùttuyaik, nulà kappon yamùk uya eyittu tùse, ewelichak man.”

²“Màlàpàk uchi apakakà, molopai iwà'nànsak lùppù ayau imeluntàtanùkkà iwelikkapù wapiya. Masapùla yeposak uya man ànkupùppù wechi wakù pe kulu pùla Ukatùyi yenu yau.

³Ittukàichi eyenupappù lùppù molopai enetappù lùppù, imaimu yawàlà ekkà, amakuyi winàpai elattàkà. Aupaka pùla ewechi yau, amak kasa uyàpù màlà apyak, molopai yà'là yattai là uyàpù ittu auya pen.

⁴Tùse tukkan kon pen Sardis pon kon uya tùpon kon kussak man wakù pe. Upokon pe tok usalà màlà, tùwepontàse aimu'nan yak, masapùla ikasa tùwessan yek pe tok wechi màlà.

⁵Mùkyamlo entaikannan nùssan wepontà màlà tok kasa aimu'nan yak, molopai tok yesek yama uya pen màlà wema'nàtok kaletayi yapai. Ukàipùnù molopai itinchelùyi yamùk yemloto po uponalok kon mùkyamlo te uya màlà.”

⁶“Tàwà tùpana ke nai'nùk Wakù Akkwalù uya Sochi yamùk yelupatok yetai.”

⁷“ Philadelphia pon Sochi inchelùyi piyak sàlà imenukakà: “Sàlàichi màlà itekale mùkkàlà wakù esukenan molopai ailon winàpaino. Mùkkàlà David ponalok ki yachinài, yakkokanài mùkkàlà ànù'là uya inakkokappù yakkolo pen. Yakkonài mùkkàlà, ànù'là uya inakkoloppù yakkoka pen.

⁸Ànkupù tùttuyaik. Manatta yakkokasak uya man eyemloto po, ànù'là uya yakkolo yentai. Emeluntàlù wechi mala lùkkwà tùse enupantok uya kupùppù auya molopai ailon pe ewechippù upàk.

⁹Yetakà, mùkyamlo Settan ponalok kon mùkyamlo kasei ton, Ichu yamùk pe tukaik tùwekkussan Jew yamùk pe pùla echii'ma. Tok kupù uya màlà tok uyàttoppe eyemloto pona, tok wepeimatoppe ayapulà pe. Tamù'nawàlà à'nùnma kon uya ittutoppe tok uya.

¹⁰Umaimu yawàlà ewessak man pàlikanài pe. Màlàpàk wakù pe nàlà àkupù uya màlà talumattàntok yattai. Nùyàssai'nùk tamù'nawolon non pona tamù'nawà kappon yamùk sàlà non pon kon ittuse.

¹¹Uyàpù màlà asse'ne. Itesappe ewettok kon ikuttàk wakù pe, ànù'là uya wakù entaikantok auya yepeppù alok mokka tukaik.

¹²Mùkkàlà entaikanàippù kupù uya màlà wakapu pe Ukatùyi yùwùk tau, molopai inàntu'ma ya pen màlà. Ukatùyi yesek menuka uya màlà ipàk, molopai Ukatùyi patassek yesek emennak Jerusalem. Màlà nùyàssai'nùk epùn yapai Ukatùyi winàpai. Emennak uyesek menuka uya nàlà màlà ipàk.

¹³“Tàwà tùpana ke nai'nùk, Wakù Akkwalù uya Sochi yamùk yelupatok yetai.”

¹⁴“ Laodicea pon Sochi inchelùyi piyak sàlà imenukakà: “Sàlàichi màlà itekale mùkkàlà Emen winàpaino. Ailon molopai ailon yekamanài, tamù'nawolon Katù nùkonekasan wepyattàtok.”

¹⁵“Ànkupùppù tùttuyaik. A'neppe pùla molopai i'nàkken pùla ewechi. A'neppe wapùla i'nàkken eyiche wechi eppai tùse!

¹⁶Tùse masapùla tùkuile, a'neppe pùla wapùla i'nàkken pùla ewechi pàk, untapai eyikkwamù pàk wekkussaik.

¹⁷‘Tukkan, itemamin Iulà, molopai italumayippù pen, tamù'nawàlà iche wettok yesak,’ te là auya. Tùse entuppak sa'ne ewechi ittu auya pùla man! Yà'là pùla italumayippù pe messaik, ipon pùla molopai enpùla.

¹⁸Eyekamappoyan Iulà, Kolù ye'ma pa uwinàpai, apok ke tùpottàik ikonekasak kolù, temamin ke ewechi pa. Aimu'nan pon nàlà ye'makà ewepontà pa yak, molopai eyesak iwapu pùn kuli'manài iwaputtàkà. En yipik nàlà ye'makà eyenu yipippe, wakù pe pata yene pa.

¹⁹Tamù'nawolon kon u'nùn pe unkupù yekamapponài Iulà molopai tok talumattànài nàlà. Amayintakà molopai amakuyi winàpai elattàkà.

²⁰Yetakà! Satippe wessaik manatta po molopai tei'tei ukayaik. Ànù'là uya umaimu yeta molopai manatta yakkokasak yau, itùwùk tak wewomù màlà. Uta'lettà màlà ipokonpe molopai iita'lettà màlà upokon pe.

²¹Mùkyamlo àli yentaikannan nùssan kupù uya màlà upyau tok weleuta toppe uyapon po. Àli yentaikasak uya molopai sàlà pe weleutasak Ukàipùnù piyau yapon po kasa làma.

²²“Tàwà tùpana ke nai'nùk, Wakù Akkwalù uya sochi yamùk yelupatok yetai.”