Read Patamona Revelation 7 Bible Online

Revelation 7 - Patamona bible

Revelation 7

¹Sàlà ye'mappùtak asakùlà'nan kon inchelù yamùk yeneppù uya satippe asakùlà'nan non pana'mu yau. Tok uya asakùlà'nan assetun non pon yachippù, yà'là yekkwa là assetun utasse'ma non po, wapùla tuna po, wapùla yà'là yekwa là yei pàk tukaik.

²Molopai tùulon inchelù uyàpù yeneppù uya wei wepakka winàpai tàwàlà tùwemassen Katù winàpaino itapyoto ton pattàtok pokonpe. Iwentaimeppù eke pe asakùlà'nan kon inchelù yamùk yekamappo pe, mùkyamlo Katù nùlepassan meluntà ke non molopai tuna mattanùttoppe tok uya.

³Inchelù uya, “Non wapùla tuna, wapùla yei yamùk kù'mattanùttàu, kùkatùyi yapyoto ton pàk tok yentok ipàkàlà Katù winàpaino tùlù tok peyeppà pàk ponalà,” teppù.

⁴Yà'là kaichalà là mùkyamlo Katù winàpaino ke ipattàsak kon, wechi yekamappù màlà upàk, 144,000 pe, Israel payan yamùk yapai.

⁵Judah payan yamùk 12,000 pe, Reuben payan yamùk 12,000 pe. Gad payan yamùk 12,000 pe,

⁶Asher payan yamùk 12,000 pe, Naphtali payan yamùk 12,000 pe, Manasseh payan yamùk 12,000 pe,

⁷Simeon payan yamùk 12,000 pe. Levi payan yamùk 12,000 pe, Issachar payan yamùk 12,000 pe,

⁸Zebulun payan yamùk 12,000 pe, Joseph payan yamùk 12,000 pe, molopai Benjamin payan yamùk 12,000 pe.

⁹Sàlà tùpo uyenu tùlùppù uya molopai tukkan kon kulu kappon yamùk yeneppù uya. Ànù'là uya yà'là kaichalà là tok wechi ittu yentainokon. Pùsamlo wechippù màlà tamù'nawolon pata yawon kon pe, tùpatalonan kon ikkok yamùk, tùpatalo'nan kon kappon yamùk molopai tùpatalo'nan imaimu ton. Satippe aponnok yemloto po tok wechippù molopai Kalinilu Mule yemloto po. Tok wepontàsak wechippù aimu'nan pon yak, molopai kumya yale yachipppù tok uya temyau'nokon.

¹⁰Tok wentaimeppù eke pe. “Ina wepùikattàtok màlà tùuyàssen Ina Katùyi winàpai. Mùkkàlà aponnok po chichiu pe tùwessen, molopai Kalinilu Mule winàpai,” tukaik.

¹¹Tamù'nawà inchelù yamùk wechippù màlà aponnok woi, 24 pan kon eke ton tùnamasan woi, molopai asakùlà'nan kon nulànan kon ànùkyan nànan woi satippe. Tok wepeimappù tenpata kon po aponnok yemlotopona molopai Katù yapulàppù tok uya,

¹²“Emen! Apulàntok molopai eke pe we'nàtok, pukkeppe we'nàtok, tenki tetok, namantok, meluntà, molopai apàikkek wechi màlà kùkatùyi kon ponaloppe tàwàlàlà molopai tàwàlàlà! Emen!” tukaik.

¹³Eke ton tùnamasan tonpa uya uyekamappoppù, “Ànùkyan ken mùkyamlo kappon yamùk, iwepontàsak nai'nannùk aimu'nan pon yak, molopai i'nailà pai ken iyàssak kon mùkyamlo?” tukaik.

¹⁴“Ewai'nan, tùse mùttuyaik nen,” tukaik imaimu yeikuppù uya. Molopai umaimu yeikuppù ya. “Pùsamlo kappon yamùk mùkyamlo eke talumattàntok yawàlà iyàssak kon. Tùpon kon kukasak tok uya màlà nai'nùk, molopai aimu'ne tok uya imasak Kalinilu Mule mùnù ke.

¹⁵Màlàpàk Katù yapon yemlotopo satippe tok wechi màlà nai'nùk molopai iponaloppe tok we'wotokoma weinai molopai ewalupàttau tukaik itùwùk tau. Mùkkàlà chichiu pe nai'nùk tapon po wechi tok yelasu pe màlà molo tùwechi ke.

¹⁶Tok wapàkkapù là wapùla tok we'nakklipa tu'ma là pen nen uchi màlà, wei wapùla yà'làlà a'nek uya tok pottà pen.

¹⁷Masapùla Kalinilu Mule aponnok yakkletau nai'nùk, wechi nen uchi màlà yesappe, molopai tuna tàwàlàlà tùwemassen, tùwa'munasen pen motak tok yalà ya màlà. Molopai Katù uya tamù'nawàlà tok yenu palu ya'munakka màlà tok yenu poi,” tukaik.