Read Pennsylvania German 1. Mosi 11 Bible Online

1. Mosi 11 - Pennsylvania German bible

1. Mosi 11

¹An selli zeit voah yusht ay shprohch uf di eaht. Alli-ebbah hott di sayma vadda gyoost.

²Un's is zu kumma vi si noch di east ganga sinn, henn si ayva land kfunna im land funn Sinear un si sinn datt nei gezowwa.

³Un si henn unnich nannah kshvetzt un henn ksawt, “Kummet, vella bakka-shtay macha un si goot brenna.” No henn si bakka-shtay gyoost in blatz funn shtay, un pitch fa si zammah hayva.

⁴No henn si ksawt, “Kummet, vella en shtatt bauwa fa uns, un en hohch gebei es gans nuff an da himmel langd. Vella uns en grohsah nohma macha, no vadda miah nett ausnannah kshtroit ivvah di gans eaht.”

⁵Un da HAH is runnah kumma fa di shtatt un dess grohs gebei sayna vo di mensha-kinnah am bauwa voahra.

⁶No hott da HAH ksawt, “Gukk moll, si sinn ay leit un henn ay shprohch, un dess is vass si ohkfanga henn du. Nau nix es si denka fa du zayld ummeeklich sei fa si.

⁷Kummet, vella nunnah gay un si fashtatza in iahra shprohch so es si nannah nett fashtay kenna.”

⁸No hott da HAH si ausnannah kshtroit ivvah di gans eaht, un si henn ufkeaht di shtatt bauwa.

⁹Fa sell is di shtatt Babel kaysa vadda, veil da HAH di shprohch funn di gans veld fahuddeld hott datt. Un funn datt hott da HAH si ausnannah kshtroit ivvah di gans eaht.

¹⁰Dess is nau di nohch-kummashaft fumm Shem. Zvay yoah noch di sindfloot, vo da Shem en hunnaht yoah ald voah, is eah da faddah vadda fumm Arphachsad.

¹¹Un nochdem es eah da faddah vadda is fumm Arphachsad, hott da Shem fimf hunnaht yoah glaybt, un eah hott aw anri boova un mayt katt.

¹²Da Arphachsad voah fimf un dreisich yoah ald vo eah da faddah vadda is fumm Salah.

¹³Da Arphachsad hott fiah hunnaht un drei yoah glaybt nochdem es eah da faddah vadda is fumm Salah, un eah hott aw anri boova un mayt katt.

¹⁴Da Salah voah dreisich yoah ald un is da faddah vadda fumm Eber.

¹⁵Un da Salah hott fiah hunnaht un drei yoah glaybt nochdem es eah da faddah vadda is fumm Eber, un eah hott aw anri boova un mayt katt.

¹⁶Da Eber voah fiah un dreisich yoah ald un is da faddah vadda fumm Peleg.

¹⁷Un da Eber hott fiah hunnaht un dreisich yoah glaybt nochdem es eah da faddah vadda is fumm Peleg, un eah hott aw anri boova un mayt katt.

¹⁸Da Peleg voah dreisich yoah ald un is no da faddah vadda fumm Regu.

¹⁹Un da Peleg hott zvay hunnaht un nein yoah glaybt nochdem es eah da faddah vadda is fumm Regu, un eah hott aw anri boova un mayt katt.

²⁰Da Regu voah zvay un dreisich yoah ald un is da faddah vadda fumm Serug.

²¹Un da Regu hott zvay hunnaht un sivva yoah glaybt nochdem es eah da faddah vadda is fumm Serug. Un eah hott aw anri boova un mayt katt.

²²Da Serug voah dreisich yoah ald un eah is da faddah vadda fumm Nahor.

²³Un da Serug hott zvay hunnaht yoah glaybt nochdem es eah da faddah vadda is fumm Nahor, un eah hott aw anri boova un mayt katt.

²⁴Da Nahor voah nein un zvansich yoah ald un eah is da faddah vadda fumm Tharah.

²⁵Un da Nahor hott en hunnaht un neintzay yoah glaybt nochdem es eah da faddah vadda is fumm Tharah, un eah hott aw anri boova un mayt katt.

²⁶Da Tharah voah sivvatzich yoah ald un is da faddah vadda fumm Abram, Nahor un em Haran.

²⁷Nau dess is di freindshaft fumm Tharah. Da Tharah is da faddah vadda fumm Abram, Nahor un em Haran. Un da Haran is da faddah vadda fumm Lot.

²⁸Da Haran is kshtauva eb sei daett, da Tharah, in Ur in Chaldaya, es land vo eah geboahra voah.

²⁹Da Abram un da Nahor henn sich veivah gnumma. Em Abram sei fraw hott Sarai kaysa, un em Nahor sei fraw voah di Milka, em Haran sei maydel. Da Haran voah da faddah funn di zvay mayt, di Milka un di Yiska.

³⁰Di Sarai voah unfruchtboah un hott kenn kinnah katt.

³¹Da Tharah hott sei boo, da Abram, un sei kinds-kind, da Lot, em Haran sei boo, un sei shviah-dochtah, di Sarai, em Abram sei fraw, gnumma un zammah sinn si aus Ur in Chaldaya ganga fa in's land Kanaan gay. Si sinn so veit ganga es di shtatt funn Haran un henn datt gvoond.

³²Da Tharah hott zvay hunnaht un fimf yoah glaybt, un eah is kshtauva in Haran.