Read Pennsylvania German 1. Mosi 13 Bible Online

1. Mosi 13 - Pennsylvania German bible

1. Mosi 13

¹So is da Abram nuff aus Egypta ganga in's sauda-land mitt sei fraw un alles es eah katt hott. Un da Lot is mitt eem ganga.

²Da Abram voah oahrich reich mitt fee un silvah un gold.

³No is eah fumm sauda-land vekk gezowwa, un is funn blatz zu blatz ganga biss eah an Beth-El kumma is. Dess voah da blatz zvishich Beth-El un Ai es eah eahshtah gvoond katt hott,

⁴un da blatz fumm awldah es eah eahshtah gmacht katt hott. Datt hott eah da HAH gedeend un em HAH sei nohma ohgroofa.

⁵Nau da Lot, vo mitt em Abram ganga is, hott aw shohf un kee un tents katt.

⁶Un's land hott si nett awl halda kenna es datt zammah gvoond henn, fa si henn so feel sach katt es si nimmi zammah bleiva henn kenna.

⁷Un's voah shtreit zvishich di heedah fumm Abram sei fee un di heedah fumm Lot sei fee. Di Kanaaniddah un di Pheresiddah henn aw im land gvoond an selli zeit.

⁸No hott da Abram zumm Lot ksawt, “Loss doch kenn shtreit sei zvishich miah un diah, un zvishich dei heedah un mei heedah, fa miah sinn kshvishtaht.

⁹Is nett's gans land fannich diah? Vella funn-nannah gay. Vann du lings gay vitt, gayn ich rechts; adda vann du rechts gay vitt, gayn ich lings.”

¹⁰Da Lot hott rumm gegukt un hott di gans gaygend fumm Jordan Revvah ksenna. Eah hott ksenna es es goot gvessaht voah ivvahrawlich biss du an Zoar kumsht, so vi da goahra fumm HAH, adda's land funn Egypta. (Dess voah eb da HAH di shtett fumm Sodom un Gomorra fadauva hott.)

¹¹So hott da Lot di gans gaygend funn Jordan gnumma fa sei dayl un is noch di east ganga. Un sellah vayk sinn si no funn-nannah ganga.

¹²Da Abram hott im land funn Kanaan gvoond, un da Lot hott in di shtett funn di valley gvoond. Eah hott sei tents rumm heah ufkokt, so veit es nivvah an Sodom.

¹³Di mennah funn Sodom voahra ungettlichi leit un voahra am veeshtahlich sindicha geyyich da HAH.

¹⁴Noch demm es da Lot vekk ganga is fumm Abram, hott da HAH ksawt zumm Abram, “Mach dei awwa uf un gukk rumm funn vo es du bisht; gukk nadda, sauda, east un west.

¹⁵Awl dess land es du saynsht gevvich zu diah un dei nohch-kummashaft fa'immah.

¹⁶Un ich mach dei nohch-kummashaft es vi da shtawb funn di eaht, so es vann ebbah da shtawb funn di eaht zayla kend, dann kenda di leit funn dei nohch-kummashaft aw gezayld sei.

¹⁷Gay un lawf deich di leng un di brayding fumm land, fa ich zayl diah's gevva.”

¹⁸No hott da Abram sei tents runnah gnumma un is ganga voona an di baym vo zumm Mamre keaht henn. Dess voah in Hebron. Datt hott eah en awldah zumm HAH gebaut.