Read Pennsylvania German 1. Mosi 16 Bible Online

1. Mosi 16 - Pennsylvania German bible

1. Mosi 16

¹Nau di Sarai, em Abram sei fraw, hott kenn kinnah havva kenna fa een. Avvah see hott en Egyptah mawt katt es Hagar kaysa hott.

²No hott see ksawt zumm Abram, “Gukk moll, da HAH hott mich kalda funn kinnah havva. Nau gay un shlohf mitt mei mawt. Fleicht kann ich kinnah havva deich see.” Un da Abram hott abkeicht zu di Sarai.

³So hott di Sarai iahra Egyptah mawt zumm Abram gevva fa sei fraw sei noch demm es si zeyya yoah im land funn Kanaan gvoond henn.

⁴Da Abram hott no kshlohfa mitt di Hagar un see is uf em family vayk vadda. Vo di Hagar dess fanumma hott, hott see sich ovvich di Sarai gedinkt.

⁵No hott di Sarai ksawt zumm Abram, “'Sis dei shuld es ich dess ohnemma muss. Ich habb mei mawt in dei eahm gevva, un vo see ksenna hott es si uf em family vayk voah, hott see nunnah gegukt uf mich. Loss da HAH richta zvishich miah un diah.”

⁶Avvah da Abram hott ksawt zu di Sarai, “Dei mawt is unnich diah, du kansht du mitt iahra vass du vitt.” No hott di Sarai di Hagar veesht gyoost un see is fatt kshprunga funn iahra.

⁷Nau da engel fumm HAH hott di Hagar kfunna bei en vassah-shpring in di vildahnis; dess voah di shpring uf em vayk noch Sur.

⁸Un da engel hott ksawt, “Hagar, di Sarai iahra mawt, vo bisht du bei kumma, un vo bisht du am hee gay?” See hott ksawt, “Ich binn am fatt shpringa funn di Sarai es mich aykend.”

⁹No hott da engel ksawt zu iahra, “Gay zrikk zu selli es dich aykend un gebb dich unnich see, un du vass see sawkt.”

¹⁰Da engel hott no viddah ksawt zu iahra, “Ich zayl dei nohch-kummashaft feel macha, so feel es si nett gezayld sei kenna.”

¹¹Da engel hott no noch veidah ksawt, “Gukk moll, du bisht uf em family vayk, un du zaylsht en sohn havva. Sei nohma solsht du Ismael haysa, veil da HAH keaht hott funn dei aylend.

¹²Eah zayld en vildah mensh sei; sei hand zayld geyyich alli-ebbah sei, un alli-ebbah sei hand zayld geyyich een sei. Eah zayld nett in fridda layva mitt sei ivvahrichi breedah.”

¹³No hott see em HAH es kshvetzt hott zu iahra deah nohma gevva, “Du Gott, saynsht mich.” Fa see hott ksawt, “Ich habb deah ksenna vo mich saynd.”

¹⁴Fasell is da brunna Beer-Lahai-Roi kaysa vadda; deah is zvishich Kades un Bared.

¹⁵So hott di Hagar em Abram en sohn gevva un da Abram hott da nohma Ismael gevva zumm sohn es geboahra voah zu iahra.

¹⁶Da Abram voah sex un achtzich yoah ald vo da Ismael geboahra voah zu di Hagar.