Read Pennsylvania German 1. Mosi 38 Bible Online

1. Mosi 38 - Pennsylvania German bible

1. Mosi 38

¹An selli zeit hott da Juda sei breedah falossa, un is nunnah ganga fa bleiva bei ma mann funn Adullam es Hira kaysa hott.

²Datt hott da Juda en maydel ksenna fumma Kanaaniddishah mann. Sei nohma voah Sua. Eah hott see keiyaht un hott kshlohfa mitt iahra.

³See is uf em family vayk vadda, hott en boo katt un eah hott een Ger kaysa.

⁴No is see viddah uf da family vayk kumma, hott en boo grikt un hott een Onan kaysa.

⁵See hott no alsnoch en anra boo grikt un hott een Sela kaysa. 'S voah an Chesib vo see een katt hott.

⁶Da Juda hott no en fraw grikt fa sei eldshtah boo, da Ger. Iahra nohma voah Thamar.

⁷Avvah em Juda sei eldshtah boo voah evil im HAH sei awwa, un da HAH hott een doht gmacht.

⁸No hott da Juda ksawt zumm Onan, “Gay nei zu dei broodah sei fraw un heiyah see, un bring en sohn in di veld fa dei broodah.”

⁹Da Onan hott gvist es deah sohn nett sei veah. So vann eah kshlohfa hott mitt sei broodah sei vitt-fraw, hott eah da sohma uf da bodda gay glost, so es es kenn sohn gebt fa sei broodah.

¹⁰Avvah vass eah gedu hott, hott em HAH shlecht kfalla, so hott eah een aw doht gmacht.

¹¹No hott da Juda ksawt zu sei boo sei fraw, di Thamar, “Bleib en vitt-fraw in dei daett sei haymet biss mei boo, da Sela, uf vaxt.” Eah hott gedenkt eah mecht aw shtauva grawt vi sei breedah sinn. No is di Thamar ganga un hott in iahra daett sei haymet gvoond.

¹²Nochdem es en langi zeit fabei voah, is em Juda sei fraw kshtauva. See voah em Sua sei maydel. No vo da Juda moll ivvah dess voah is eah nuff an Thimnath ganga vo si am shohf sheahra voahra. Eah is ganga mitt seim freind, da Hira funn Adullam.

¹³No voah's ksawt zu di Thamar, “Gukk moll, dei mann sei daett is am nuff gay an Thimnath fa sei shohf sheahra.”

¹⁴See hott no iahra vitt-fraw glaydah ausgedu, hott en duch ivvah iahra kobb un hott sich ufgvikkeld. No hott see sich an's eigang funn Enaim kokt es uf em vayk noch Thimnath gayt. See hott dess gedu veil see ksenna hott es da Sela nau grohs voah, avvah see voah nett gevva zu eem fa sei fraw sei.

¹⁵Vo da Juda see ksenna hott, hott eah see fanumma fa en huah, veil see iahra ksicht zu gedekt katt hott.

¹⁶So is eah ab fumm vayk gedrayt un hott ksawt, “Kumm nau, loss mich shlohfa mitt diah,” fa eah hott nett gvist es see sei boo sei fraw is. No hott see ksawt, “Vass gebsht du miah fa shlohfa mitt miah?”

¹⁷Eah hott ksawt, “Ich shikk diah en gaysli funn mei drubb.” “Vass gebsht du miah biss du miah's shiksht?” hott see kfrohkt.

¹⁸Eah hott ksawt, “Vass soll ich diah gevva?” “Dei ring mitt deim nohma un da bendel, un da shtokk in dei hand,” hott see ksawt. So hott eah iahra selli sach gevva, is nei ganga zu iahra un see is uf em family vayk vadda bei eem.

¹⁹Noch sellem is see haym ganga, hott iahra duch fumm kobb gnumma un hott iahra vitt-fraw glaydah viddah oh.

²⁰Shpaydah hott da Juda's gaysli mitt seim freind funn Adullam kshikt so es eah di sacha zrikk grikt funn di fraw es eah nunnah betzawld katt hott. Avvah eah hott see nett kfunna.

²¹No hott eah samm funn di mennah an sellem blatz kfrohkt, “Vo is di huah es beim vayk an Enaim voah?” Avvah si henn ksawt, “'S voah kenn huah do.”

²²So is eah zrikk zumm Juda ganga un hott ksawt, “Ich habb see nett kfunna, un di mennah funn sellah blatz henn ksawt, ‘'S voah kenn huah do.’”

²³No hott da Juda ksawt, “Loss see di sacha halda, adda di leit lacha ivvah uns. Ich habb dess gaysli kshikt un du hosht see nett kfunna.”

²⁴Baut drei moonet shpaydah hott da Juda dess vatt grikt, “Dei boo sei fraw, di Thamar hott huahrahrei auskfiaht un is uf em family vayk deich huahrahrei.” No hott da Juda ksawt, “Bringet see raus un loss see fabrend sei.”

²⁵Un diveil es si am see raus bringa voahra hott see dess vatt kshikt zu iahra mann sei daett un hott ksawt, “Ich binn uf em family vayk bei em mann es dee sacha aykend.” No hott see ksawt, “Gukk si moll ivvah un sayn eb du deah ring un bendel, un deah shtokk kensht.”

²⁶Da Juda hott si gekend un hott ksawt, “See is may gerecht es ich binn, veil ich iahra mei boo da Sela nett gevva habb.” Un eah hott nee nimmi kshlohfa mitt iahra.

²⁷Endlich is di zeit kumma es see iahra kind havva hott missa, un fahaftich, es voahra zvilling in iahra.

²⁸Un diveil es si am geboahra vadda voahra, hott ayns sei hand raus, un di hilf-muddah hott en rohdi shnuah an sei hand gebunna un hott ksawt, “Deah do is seahsht raus kumma.”

²⁹Avvah no hott eah sei hand zrikk nei gezowwa, un yusht geviss, sei broodah is seahsht raus kumma. No hott di hilf-muddah ksawt, “Vee hosht du's gmacht es du seahsht raus gebrocha bisht?” Un eah voah Perez kaysa.

³⁰No shpaydah is sei broodah raus kumma es di roht shnuah an sei hand katt hott, un eah voah Serah kaysa.