Read Pennsylvania German 1. Mosi 46 Bible Online

1. Mosi 46 - Pennsylvania German bible

1. Mosi 46

¹So is da Israel naus kshteaht mitt alles es eah katt hott un is an Beer-Seba kumma. Datt hott eah opfah gopfaht zumm Gott funn sei faddah da Isaac.

²Selli nacht hott Gott zumm Israel kshvetzt in en vision un hott ksawt, “Jakob, Jakob.” Un eah hott ksawt, “Do binn ich.”

³No hott Gott ksawt, “Ich binn Gott, da Gott funn dei faddah. Feich dich nett nunnah in Egypta gay, fa ich zayl dich datt in en grohs folk macha.

⁴Ich gay mitt diah nunnah in Egypta, un zayl dich aw viddah zrikk raus bringa. Un da Joseph laykt sei hand uf dei awwa an deim doht.”

⁵No hott da Jakob Beer-Seba falossa. Em Israel sei boova henn iahra daett da Jakob, iahra kinnah un iahra veivah nunnah gnumma in di veyya es da Pharao kshikt katt hott fa si bringa.

⁶Si henn aw iahra fee un's annah sach gnumma es si sich fadeend katt henn im land funn Kanaan. Un so is da Jakob un awl sei nohch-kummashaft nunnah in Egypta kumma.

⁷Sei boova un iahra kinnah, sei mayt un iahra kinnah un awl sei freindshaft hott eah mitt sich gebrocht zu Egypta.

⁸Nau dess sinn di nayma funn di Kinnah-Israel, em Jakob sei boova, es noch Egypta ganga sinn: Da Ruben, em Jakob sei eldshtah.

⁹Un em Ruben sei boova voahra da Henoch, da Pallu, da Hezron un da Charmi.

¹⁰Em Simeon sei boova voahra da Jemuel, da Jamin, da Ohad, da Jachin, da Zohar un da Saul, 's kind funn en Kanaaniddishi fraw.

¹¹Em Levi sei boova voahra da Gerson, da Kahath un da Merari.

¹²Em Juda sei boova voahra da Ger, da Onan, da Sela, da Perez un da Serah. Avvah da Ger un da Onan sinn kshtauva im land funn Kanaan. Un em Perez sei boova voahra da Hezron un da Hamul.

¹³Di boova fumm Isachar voahra da Thola, da Phuva, da Job, un da Simron.

¹⁴Em Sebulon sei boova voahra da Sered, da Elon un da Jahleel.

¹⁵Sell sinn di boova funn di Lea es geboahra voahra zu iahra fumm Jakob, un aw sei maydel di Dina, in Mesopotamia. Alles zammah voahra's drei un dreisich funn dee boova un mayt.

¹⁶Em Gad sei boova voahra da Ziphion, da Haggi, da Suni, da Ezbon, da Eri, da Arodi, un da Areli.

¹⁷Di boova fumm Asser voahra da Imna, da Isva, da Isvi, da Beria un iahra shveshtah di Serah. Un em Beria sei boova voahra da Heber un da Malchiel.

¹⁸Sell sinn di kinnah funn di Silpa, di mawt es da Laban gevva katt hott zu sei maydel, di Lea. Di Silpa hott em Jakob sechtzay kinnah gevva.

¹⁹Di boova fumm Jakob sei fraw, di Rachel, voahra da Joseph un da Benjamin.

²⁰Em Joseph sei boova es geboahra voahra in Egypta bei di Asnath, em Potiphera, da preeshtah funn On, sei maydel, voahra da Manasse un da Ephraim.

²¹Un em Benjamin sei boova voahra da Bela, da Becher, da Asbel, da Gera, da Naaman, da Ehi, da Ros, da Muppim, da Huppim un da Ard.

²²Sell voahra di Rachel iahra kinnah es see katt hott beim Jakob. Di Rachel hott eem fatzay kinnah gevva alles zammah.

²³Em Dan sei boo voah da Husim.

²⁴Di boova fumm Naphthali voahra da Jahzeel, da Guni, da Jezer un da Sillem.

²⁵Sell sinn di kinnah funn di Bilha, di mawt es da Laban gevva hott zu sei maydel, di Rachel. See hott dee katt beim Jakob. Alles zammah voahra's sivva kinnah.

²⁶'S voahra sex un sechtzich leit fumm Jakob sei nohch-kummashaft es mitt eem noch Egypta ganga sinn—sell is vann ma sei boova iahra veivah nett zayld.

²⁷Da Joseph hott zvay boova katt es geboahra voahra zu eem in Egypta. So awl di leit im Jakob sei haus es noch Egypta kumma sinn voahra sivvatzich leit.

²⁸Da Jakob hott no da Juda fanna naus kshikt zumm Joseph fa da vayk finna noch Goshen. No sinn si in's land funn Goshen kumma.

²⁹Da Joseph hott no sei vauwa grisht un is nuff in Goshen ganga fa sei faddah da Israel ohdreffa. So kshvind es eah fannich een kumma is, hott eah sei eahm um sei hals rumm gedu un hott lang keild uf sei hals.

³⁰No hott da Israel ksawt zumm Joseph, “Ich kann nau geahn shtauva, siddah es ich dei ksicht ksenna habb un sayn es du noch laybsht.”

³¹Da Joseph hott no ksawt zu sei breedah un selli in sei daett sei haus-halding, “Ich gay nuff un shvetz zumm Pharao, un sawk eem, ‘Mei breedah un mei daett sei haus-halding es im land funn Kanaan voahra sinn zu miah kumma.

³²Di mansleit sinn fee-heedah un si halda fee. Si henn awl iahra glay un grohs fee un alles es si katt henn mitt sich gebrocht.’

³³Un vann da Pharao eich moll zu sich rooft un frohkt, ‘Vass is eiyah eahvet?’

³⁴sella diah sawwa, ‘Dei gnechta sinn leit es fee kalda henn funn yungem uf biss nau, miah un unsah foah-eldra eb miah.’ Dess is so es diah im land funn Goshen layva daufet, fa shohf-heedah sinn grausam zu di Egyptah.”