Read Pennsylvania German 1. Mosi 9 Bible Online

1. Mosi 9 - Pennsylvania German bible

1. Mosi 9

¹Gott hott no da Noah un sei boova ksaykend, un hott ksawt zu si, “Seind fruchtboah un fameahret eich un fillet di eaht.

²Da furcht un angsht funn eich soll uf alli diah funn di eaht sei, un uf alli fokkel funn di luft, uf alles es graddeld uf di eaht un uf awl di fish im say. Si sinn awl in eiyah hend gedu.

³Alles es sich faraykt un laybt soll ess-sach sei fa eich. Grawt vi ich eich greeni blansa gevva habb, gevvich eich nau alles.

⁴Avvah diah sellet kenn flaysh essa vo's layves-bloot noch drinn hott.

⁵Un veiklich, ich foddah shuldichkeit fa eiyah layves-bloot. Vann en diah en mensh doht macht, dann foddah ich demm diah sei layves-bloot. Un so aw mitt mensha, vann en mann en anra mann, deah vo sei broodah is, doht macht, dann foddah ich sei layves-bloot.

⁶Veah-evvah es mensha-bloot fageest, bei em mensh soll sei bloot fagossa sei. Fa Gott hott da mensh in sei aykni gleichnis gmacht.

⁷Un diah, ich vill havva es diah fruchtboah sind un feel kinnah hend. Fameahret eich uf di eaht so es diah feel vaddet drinn.”

⁸Gott hott no kshvetzt zumm Noah un sei boova bei eem, un hott ksawt:

⁹“Gukket moll, ich mach en bund mitt eich un mitt eiyah nohch-kummashaft,

¹⁰un mitt awl di levendichi diahra es bei eich sinn—di fekkel, es fee un awl di diahra uf di eaht mitt eich es aus di oahrich kumma sinn, un mitt alli diah uf di eaht.

¹¹Ich mach mei bund mitt eich, es funn nau on soll nee nimmi alles levendiches abkshnidda sei bei sindfloot vassah, un's soll kenn sindfloot di eaht may fadauva.”

¹²Un Gott hott ksawt, “Dess is da zaycha funn demm bund es ich mach zvishich miah un eich un alli levendich diah mitt eich funn nau on fa'immah.

¹³Ich habb mei reyyah-bohwa in di volka ksetzt un dess soll en zaycha sei funn demm bund zvishich miah un di eaht.

¹⁴Es soll zu kumma, vann ich volka ivvah di eaht shikk, un deah reyyah-bohwa vatt ksenna in di volka,

¹⁵no denk ich an mei bund vass zvishich miah un eich is, un zvishich alli levendich diah es flaysh hott; un's vassah soll nee nimmi en sindfloot vadda un alles levendiches es flaysh hott doht macha.

¹⁶Vann da reyyah-bohwa in di volka is, dann gukk ich uffen, un denk an mei ayvich bund zvishich miah un alles levendiches mitt flaysh uf di eaht.”

¹⁷Un Gott hott ksawt zumm Noah, “Dess is da zaycha fumm bund es ich gmacht habb zvishich miah un alles es flaysh hott uf di eaht.”

¹⁸Em Noah sei boova vo aus di oahrich kumma sinn, voahra da Shem, da Ham un da Japheth. Da Ham is da faddah fumm Kanaan.

¹⁹Dee drei boova voahra em Noah sei boova un funn eena sinn awl di leit kumma ivvah di gans eaht.

²⁰Da Noah voah en bavvah, un eah hott en vei-goahra geblanst.

²¹Eah hott fumm vei gedrunka, un is ksoffa vadda un voah nett zu gedekt in seim tent.

²²Da Ham, da faddah fumm Kanaan, hott sei daett ksenna unni glaydah oh, un hott sei zvay breedah's ksawt vo draus voahra.

²³Da Shem un da Japheth henn no en shtikk glaydah gnumma, henn's uf iahra shuldahra gedu un sinn hinnahsich nei ganga un henn iahra daett zu gedekt. Si henn iahra ksichtah vekk gedrayt so es si iahra daett nett nakkich sayna.

²⁴Vo da Noah vakkah vadda is un hott gvist vass sei yingshtah boo gedu hott zu eem,

²⁵hott eah ksawt, “Faflucht is da Kanaan; en gnecht funn gnechta soll eah sei zu sei breedah.”

²⁶Eah hott aw veidah ksawt, “Glohbt sei da HAH, da Gott fumm Shem, un da Kanaan soll sei gnecht sei.

²⁷Gott zayld em Japheth sei land grohs macha; eah soll im Shem sei tents voona, un da Kanaan soll sei gnecht sei.”

²⁸Da Noah hott no noch drei hunnaht un fuftzich yoah glaybt noch di sindfloot.

²⁹Alles zammah hott da Noah nein hunnaht un fuftzich yoah glaybt, un no is eah kshtauva.