Read Pennsylvania German 2. Samuel 22 Bible Online

2. Samuel 22 - Pennsylvania German bible

2. Samuel 22

¹Da Dawfit hott di vadda funn demm leet zumm HAH ksawt vo da HAH eem di ivvah-hand gevva hott ivvah awl sei feinda, un een frei gmacht hott fumm Saul.

²Eah hott ksawt, “Da HAH is mei Felsa, mei sayfah Roo-Blatz, un eah macht mich frei.

³Mei Gott is mei Felsa, vo ich mich fashtekla kann, mei Shield, un's Hann funn mei Saylichkeit. Eah is mei shteikah Roo-Blatz, un mei Fashtekkel-Blatz, mei Heiland es mich vekk hald funn fechtichi mennah.

⁴Ich roof zumm HAH, eah is hohch globt, un heet mich funn mei feinda.

⁵Di vassah-vella fumm doht voahra um mich rumm, un's vassah funn fadauves hott mich shiah zu gedekt.

⁶Di shtrikk fumm grawb voahra um mich rumm, di shtrikk-nets fumm doht voahra fannich miah.

⁷In meim angsht havvich da HAH ohgroofa; ich habb naus groofa zu meim Gott. Funn sei tempel hott eah mei shtimm keaht, un mei roof is zu sei oahra kumma.

⁸Di eaht hott kshiddeld un gvakkeld, di mavvahra unnich di himla henn kshiddeld, si henn kshiddeld veil eah bays voah.

⁹Shmohk is aus sei naws kumma, feiyah es ufbrend is aus sei maul kumma, kohla am brenna, sinn raus kumma.

¹⁰Eah hott di himla funn-nannah fadayld un is runnah kumma, di dunkla volka voahra unnich sei fees.

¹¹Eah is kflowwa uf en cherub, un is ganga uf di flikkel fumm vind.

¹²Eah hott's dunkla sei dach gmacht um sich rumm, in di dunkla reyyah volka fumm himmel.

¹³Funn di helling fannich eem is es gviddah raus kumma.

¹⁴Da HAH hott gedimmeld fumm himmel, di shtimm fumm Alli-Haychshta is raus kumma.

¹⁵Eah hott arrows kshossa, un sei feinda ausnannah gedrivva, gviddah hott si shpringa gmacht.

¹⁶Da bodda fumm say voah abgedekt, di foundations funn di eaht voahra ksenna deich da zank fumm HAH, un bei em haysa ohften funn sei naws.

¹⁷Funn ovva-heah hott eah runnah glangd un mich ohgraykt, eah hott mich aus em deef vassah gezowwa.

¹⁸Eah hott mich frei gmacht funn mei shteiki feinda, funn selli es mich kast henn un zu shteik voahra fa mich.

¹⁹Si sinn uf mich kumma im dawk funn meim druvvel, avvah da HAH hott mich ufkohva.

²⁰Eah hott mich raus in en grohsah blatz gebrocht; eah hott mich frei gmacht veil eah mich leeb hott.

²¹Grawt vi gerecht es ich voah, so oahrich hott da HAH kshaft mitt miah, vi sauvah es mei hand voah, so oahrich hott eah mich zrikk betzawld.

²²Ich habb em HAH sei vayk kalda. Ich habb mich nett ungettlich ohkshikt geyyich mei Gott.

²³Awl sei ksetza voahra fannich miah, ich habb mich nett vekk gedrayt funn sei gebodda.

²⁴Ich voah unshuldich fannich eem, un habb mich kalda funn sindicha.

²⁵Da HAH hott mich betzawld fa vi gerecht es ich voah, fa vi sauvah es ich voah fannich eem.

²⁶Zu di shtandhafticha, veisht du dich shtandhaftich, zu di unshuldicha, veisht du dich unshuldich.

²⁷Zu selli es rein sinn, veisht du dich rein, zu selli es falsh sinn, veisht du dich unni falshheit.

²⁸Du helfsht selli es aylendich sinn, avvah dei awwa sinn uf di shtolsa fa si niddah bringa.

²⁹Du bisht mei licht, oh HAH; da HAH drayt mei dunkelheit zu helling.

³⁰Mitt dei hilf kann ich fassich gay geyyich greeks-leit, un mitt mei Gott kann ich ivvah en vand tshumba.

³¹Un veyyich Gott, sei vayya sinn gans folkumma; 's vatt fumm HAH is gans voah. Eah is en shield zu selli es sich falossa uf een.

³²Fa veah is Gott, unni yusht da HAH? Veah is da Felsa, unni yusht unsah Gott?

³³Gott macht mich shteik mitt graft, un veist miah da recht vayk.

³⁴Eah macht mei fees vi di fees funn en hash, eah setzt mich uf hohchi bletz.

³⁵Eah land mei hend fa fechta im greek, un mei eahm fa en eisichah bow zeeya.

³⁶Du gebsht miah da shield funn dei saylichkeit, dei hilf macht mich grohs ohksenna sei.

³⁷Du hosht en braydi pawt gmacht unnich miah; mei fees henn nee nett kshlibt.

³⁸Ich binn mei feinda nohch ganga un binn si ivvah-kumma; ich binn nett zrikk gedrayt biss si umgebrocht voahra.

³⁹Ich habb si nunnah kshlauwa, un si henn nett uf shtay kenna; si sinn unnich mei fees kfalla.

⁴⁰Du hosht miah graft gevva fa fechta im greek; du hosht selli es geyyich mich sinn, unnich mei fees gedu.

⁴¹Du hosht mei feinda gmacht iahra bikkel drayya zu miah, un ich habb selli umgebrocht es mich kast henn.

⁴²Si henn gegrisha fa hilf, avvah's voah nimmand fa helfa; si henn zumm HAH groofa, avvah eah hott kenn andvat gevva.

⁴³Ich habb si famawla vi feinah shtawb uf di eaht; ich habb si fashtambt vi drekk in di shtrohs.

⁴⁴Du hosht mich fumm shtreit funn mei leit kalda, un hosht mich kalda fa ivvah di heida sei; unbekandi leit sinn mei gnechta vadda.

⁴⁵Fremdi leit bikka sich nunnah zu miah, so kshvind es si mich heahra, doon si vass ich sawk.

⁴⁶Si faliahra moot, un kumma am ziddahra aus iahra greeks-heisah.

⁴⁷Da HAH laybt! Ksaykend is mei Felsa! Gott is hohch ufkohva, da Felsa funn mei saylichkeit.

⁴⁸Eah is da Gott es zrikk betzawld fa mich; eah dutt di heida unnich mich;

⁴⁹un eah setzt mich frei funn mei feinda. Du haybsht mich ovvich selli es ufshtayn geyyich mich, un helfsht miah vekk funn fechtichi mennah.

⁵⁰Fasell vill ich dich danka, oh HAH, unnich di heida; un dei nohma lohva mitt singes.

⁵¹Du gebsht dei kaynich grohsi ivvah-hand, un veisht shtandhaftichi-leevi zu deim ksalbda, zumm Dawfit un sei nohch-kummashaft fa'immah.”