Read Pennsylvania German 2. Samuel 24 Bible Online

2. Samuel 24 - Pennsylvania German bible

2. Samuel 24

¹Em HAH sei zann hott viddah gebrend geyyich Israel un eah hott da Dawfit geyyich si gedrayt un hott ksawt, “Gay un zayl di leit funn Israel un Juda.”

²No hott da kaynich ksawt zumm Joab un sei greeks-hauptmennah es bei eem voahra, “Gaynd deich awl di shtamma funn Israel funn Dan zu Beer-Seba un zaylet di leit, so es ich vays vi feel leit es es sinn.”

³Avvah da Joab hott ksawt zumm kaynich, “Loss da HAH dei Gott di leit fameahra so es si en hunnaht mohl so feel sinn, un loss di awwa funn mei hah da kaynich dess sayna. Avvah favass vill mei hah da kaynich so en ding du?”

⁴Avvah em kaynich sei vatt hott fesht kshtanna ivvah sell fumm Joab un sei greeks-hauptmennah. So henn si da kaynich falossa un sinn ganga di leit zayla.

⁵Si sinn ivvah da Jordan ganga un henn kshlohfa nayksht an Aroer, sauda funn di shtatt im deich. No sinn si on noch Gad un Jaser ganga.

⁶Si sinn an Gilead un's land funn Tahtim-Hodsi ganga, un sinn no an Dan-Jaan geyyich Sidon kumma.

⁷No sinn si an di fashteikt shtatt funn Tyrus un awl di shtett funn di Heffiddah un Kanaaniddah ganga. Endlich sinn si in di saut funn Juda an Beer-Seba ganga.

⁸Noch demm es si deich's gans land ganga voahra, sinn si zrikk an Jerusalem kumma am end funn nein moonet un zvansich dawk.

⁹Da Joab hott no da nambah funn di leit gevva zumm kaynich. In Israel voahra acht hunnaht dausend goodi mennah es es shvatt yoosa henn kenna, un in Juda fimf hunnaht dausend.

¹⁰Avvah da Dawfit voah gebaddaht im hatz noch demm es eah di leit gezayld katt hott, un eah hott ksawt zumm HAH, “Ich habb veesht ksindicht mitt vass ich gedu habb. Nau, oh HAH, nemm di shuld funn deim gnecht vekk. Ich habb en oahrich dumm ding gedu.”

¹¹Vo da Dawfit ufkshtanna is da neksht meiya, is dess vatt fumm HAH zumm brofayt Gad, em Dawfit sei roht-gevvah, kumma:

¹²“Gay un sawk em Dawfit, ‘Dess is vass da HAH sawkt: Ich gebb diah ay ding aus drei fa nemma; es is uf zu diah vels es du havva vitt es ich du zu diah.’”

¹³So is da Gad zumm Dawfit ganga un hott ksawt, “Soll sivva yoah hungahs-noht uf dei land kumma? Adda solsht du drei moonet shpringa funn dei feinda diveil es si diah nohch kumma? Adda vitt du drei dawk peshtelens in deim land havva? Nau denk dess ivvah un sawk miah vi ich andvat gevva soll zu sellah es mich kshikt hott.”

¹⁴Da Dawfit hott ksawt zumm Gad, “Ich habb grohsah angsht. Loss uns im HAH sei hend falla, veil sei bamhatzichkeit grohs is. Avvah loss mich nett in di hend funn mennah falla.”

¹⁵So hott da HAH peshtelens uf Israel kshikt funn sellah meiya on biss an di ksetzt zeit, un sivvatzich dausend leit sinn kshtauva funn Dan zu Beer-Seba.

¹⁶Vo da engel sei hand naus kshtrekt hott fa Jerusalem shlauwa, hott's da HAH kshpeit fa awl dess evil, un eah hott ksawt zumm engel es am di leit fafolka voah, “Sell is genunk! Nemm dei hand ab.” Da engel fumm HAH voah am dresha-floah fumm Araunah, da Jebusiddah.

¹⁷Da Dawfit hott da engel ksenna es am di leit nunnah shlauwa voah un eah hott ksawt zumm HAH, “Gukk moll, ich binn da vann es ksindicht un letz gedu hott. Dess sinn yusht shohf. Vass henn si gedu? Loss dei hand uf mich un mei family falla.”

¹⁸Sellah dawk is da Gad zumm Dawfit ganga un hott ksawt zu eem, “Gay nuff un bau en awldah zumm HAH uf em dresha-floah fumm Araunah da Jebusiddah.”

¹⁹So is da Dawfit nuff ganga vi da HAH een gebodda hott deich da Gad.

²⁰Vo da Araunah nunnah gegukt hott un ksenna hott es da kaynich un sei mennah am geyyich een kumma sinn, is eah naus ganga un hott sich gebikt fannich da kaynich mitt seim ksicht uf em bodda.

²¹Da Araunah hott ksawt, “Favass is da kaynich zu seim gnecht kumma?” Da kaynich hott ksawt, “Ich binn kumma dei dresha-floah kawfa fa en awldah zumm HAH bauwa druff, so es dess peshtelens uf di leit kshtobt vatt.”

²²Da Araunah hott ksawt zumm Dawfit, “Loss mei hah da kaynich nemma vass-evvah es eah vill un's uf opfahra. Do sinn oxa fa en brand-opfah, un do sinn di dresha shlidda un di ox-yocha fa's hols.

²³Ich, da Araunah, oh kaynich, gebb alles zumm kaynich.” Da Araunah hott aw ksawt, “Loss da HAH dei Gott dei opfah ohnemma.”

²⁴Avvah da kaynich hott ksawt zumm Araunah, “Nay, ich vill betzawla difoah. Ich zayl nett en brand-opfah opfahra zumm HAH, mei Gott, es mich nix gekosht hott.” So hott da Dawfit da dresha-floah un di oxa gekawft fa fuftzich shtikkah silvah.

²⁵Da Dawfit hott no en awldah zumm HAH gebaut datt un hott brand-opfahra un dank-opfahra gopfaht. No hott da HAH em Dawfit sei gebayt fa's land keaht, un di peshtelens ivvah Israel voah kshtobt.