Read Pennsylvania German 2. Samuel 3 Bible Online

2. Samuel 3 - Pennsylvania German bible

2. Samuel 3

¹Da greek zvishich em Saul sei family un em Dawfit sei family hott lang ohkalda. Da Dawfit is shteikah un shteikah vadda avvah em Saul sei family is shvachah un shvachah vadda.

²Samm kinnah voahra geboahra zumm Dawfit an Hebron: sei eahsht-geboahranah voah da Amnon, di Ahinoam funn Jesreel iahra boo.

³Sei zvett-geboahranah voah da Kileab, da boo funn di Abigail, em Nabal funn Karmel sei vitt-fraw; da dritt voah da Absalom, da boo funn di Maacha es em Kaynich Thalmai funn Gessur sei maydel voah;

⁴da fiaht voah da Adonijah, di Haggith iahra boo; da fimft voah da Shephatiah, di Abital iahra boo;

⁵un da sext voah da Ithream, da boo fumm Dawfit sei fraw, di Eglah. Dee voahra awl geboahra zumm Dawfit an Hebron.

⁶Deich da greek zvishich em Saul sei family un em Dawfit sei family, hott da Abner sich shteikah un shteikah gmacht im Saul sei family.

⁷Da Saul hott en nayva-fraw katt es Rizpah kaysa hott. See voah em Aiah sei maydel. Da Ish-Bosheth hott ay dawk ksawt zumm Abner, “Favass hosht du kshlohfa mitt mei daett sei nayva-fraw?”

⁸Da Abner voah gleedich bays veil da Ish-Bosheth dess ksawt hott, un eah hott ksawt, “Binn ich en hunds-kobb aus Juda? Allaveil binn ich freindlich zu dei daett em Saul sei family, zu sei breedah un zu sei freind. Ich habb dich nett ivvah-gedrayt zumm Dawfit. Doch pshuldichsht du mich fa shlohfa mitt sellem veibsmensh.

⁹Gott soll mich hatt shtrohfa, vann ich nett du fa da Dawfit vass Gott eem kshvoahra hott zu du.

¹⁰Sell is fa's kaynich-reich fumm Saul sei family vekk nemma un em Dawfit sei kaynich-shtool ufhokka ivvah Israel un Juda funn Dan zu Beer-Seba.”

¹¹Da Ish-Bosheth hott nett gedraut noch en vatt sawwa zumm Abner veil eah sich kfeicht hott veyyich eem.

¹²No hott da Abner vatt kshikt zumm Dawfit un hott kfrohkt, “Vemm sei land is es? Mach en bund mitt miah un ich helf diah fa gans Israel nivvah bringa zu diah.”

¹³“Goot,” hott da Dawfit ksawt, “Ich mach en bund mitt diah. Avvah ay ding foddah ich funn diah. Kumm nett fannich mich unni es du em Saul sei maydel, di Michal, bringsht vann du kumsht mich sayna.”

¹⁴No hott da Dawfit vatt kshikt zumm Saul sei boo da Ish-Bosheth, un hott ksawt, “Gebb miah mei fraw, di Michal, dee es miah fashprocha voah fa en hunnaht Philishtah foah-heit.”

¹⁵So hott da Ish-Bosheth leit kshikt un hott see funn iahra mann, da Paltiel, em Lais sei boo, gnumma.

¹⁶Iahra mann is mitt iahra ganga un voah am heila. Eah is hinnich iahra nohch ganga so veit es Bahurim. No hott da Abner ksawt zu eem, “Gay zrikk haym!” So is eah zrikk ganga.

¹⁷Da Abner hott no kshvetzt mitt di eldishti funn Israel un hott ksawt, “Fa samm zeit nau hend diah vella da Dawfit eiyah kaynich macha.

¹⁸Nau doond's! Fa da HAH hott kshvetzt veyyich em Dawfit un hott ksawt, ‘Deich di hand funn mei gnecht da Dawfit zayl ich mei leit Israel aus di hand funn di Philishtah nemma un aus di hand funn awl iahra feinda.’”

¹⁹Da Abner hott aw kshvetzt zu di leit funn Benjamin. No is eah an Hebron ganga fa em Dawfit sawwa vass Israel un's gans haus fumm Benjamin du vella.

²⁰No is da Abner zumm Dawfit an Hebron kumma mitt zvansich mennah. Un da Dawfit hott en grohs essa gmacht fa da Abner un sei mennah.

²¹Da Abner hott ksawt zumm Dawfit, “Loss mich gay un gans Israel zammah roofa fa mei hah da kaynich, so es si en bund macha mitt diah, un es du kaynich vasht ivvah alles es deim hatz kfellich is.” Da Dawfit hott no da Abner fatt kshikt, un eah is ganga in fridda.

²²Yusht no sinn em Dawfit sei mennah un da Joab zrikk kumma funn greek macha un mitt feel sach es si gnumma henn, avvah da Abner voah nimmi bei em Dawfit in Hebron, veil da Dawfit een fatt kshikt hott un eah ganga is in fridda.

²³Vo da Joab, un awl di greeks-gnechta mitt eem, zrikk kumma sinn, voah's em Joab ksawt es em Ner sei boo, da Abner, zumm kaynich kumma voah, un es da kaynich een fatt kshikt katt hott in fridda.

²⁴No is da Joab nei zumm kaynich ganga un hott ksawt, “Vass hosht du gedu? Gukk moll, da Abner is zu diah kumma. Favass hosht du een gay glost? Nau is eah shund fatt!

²⁵Du kensht em Ner sei boo da Abner; eah is kumma dich fafiahra un fa lanna vo du anna gaysht un alles es du du zaylsht.”

²⁶Da Joab hott no da Dawfit falossa un hott leit kshikt mitt vatt zumm Abner, un si henn een zrikk gebrocht fumm brunna es Sirah hayst. Avvah da Dawfit hott nix gvist veyyich demm.

²⁷Vo da Abner zrikk an Hebron kumma is, hott da Joab een nayva anna gnumma an's doah. Eah hott ohglost es vann eah laynich shvetza vett zu eem. Un datt, fa's bloot auseeva funn sei broodah da Asahel, hott da Joab een in da bauch kshtocha es eah kshtauva is.

²⁸Shpaydah vo da Dawfit dess keaht hott, hott eah ksawt, “Ich un mei kaynich-reich sinn ayvichlich unshuldich fannich em HAH fa's bloot fumm Ner sei boo da Abner.

²⁹Loss sei bloot uf em Joab sei kobb falla un uf awl seim daett sei nohch-kummashaft! Loss em Joab sei family nee nett sei unni es ebbah es en vayyah blakka hott es auslawft, adda es auszeahring hott, adda es ebbah lohmes hott mitt en grikk, adda es doht gmacht vatt mitt em shvatt adda es hungahs-noht hott.”

³⁰Da Joab un sei broodah da Abisai henn da Abner doht gmacht veil eah iahra broodah da Asahel doht gmacht katt hott im greek an Gibeon.

³¹No hott da Dawfit ksawt zumm Joab un awl di leit mitt eem, “Fareiset eiyah glaydah, doond sekk-glaydah oh un veinet fa da Abner.” Da Kaynich Dawfit is selvaht hinnich di lawt nohch gloffa.

³²Si henn da Abner fagrawva in Hebron un da kaynich hott laut keild am Abner sei grawb. Awl di leit henn aw keild.

³³Da kaynich hott en leicht-leet ksunga fa da Abner: “Hett da Abner shtauva sedda vi ebbah unksheides shtaubt?

³⁴Dei hend voahra nett gebunna, dei fees voahra nett gekett. Du bisht kfalla vi ebbah fald fannich gottlohsi mennah.” Un awl di leit henn viddah keild ivvah een.

³⁵No sinn si awl kumma un henn da Dawfit famohnd fa ebbes essa diveil es es noch dawk voah; avvah da Dawfit hott kshvoahra un ksawt, “Loss Gott miah shawda du un aw may, vann ich broht adda ennich ebbes ess eb di sunn unnah gayt!”

³⁶Awl di leit henn dess ksenna un voahra froh, grawt vi di leit sich kfroit henn mitt alles es da kaynich gedu hott.

³⁷So henn awl di leit un gans Israel fashtanna sellah dawk es da kaynich nix zu du katt hott mitt em doht fumm Ner sei boo da Abner.

³⁸No hott da kaynich ksawt zu sei gnechta, “Visset diah nett es en feddahshtah un en grohsah mann kfalla is in Israel heit?

³⁹Avvah heit, even vann ich ksalbt binn fa kaynich sei, doch binn ich shvach im hatz. Dee boova funn di Zeruia sinn zu hatt-hatzich fa mich. Loss da HAH selli evil-shaffah zrikk betzawla fa's evil es si gedu henn.”