Read Pennsylvania German 2. Samuel 6 Bible Online

2. Samuel 6 - Pennsylvania German bible

2. Samuel 6

¹Da Dawfit hott no viddah di beshta yungi mennah zammah groofa, dreisich dausend alles zammah.

²Eah un awl sei mennah sinn no noch Baala in Juda ganga fa di Bundes-Lawt funn Gott ruff bringa. Di Bundes-Lawt iahra nohma is da nohma fumm Awlmechticha HAH, deah es uf em kaynich-shtool hokt zvishich di cherubim uf di lawt.

³Si henn di Bundes-Lawt funn Gott uf en neiyah vauwa gedu fa see fumm Abinadab sei haus bringa es uf em hivvel voah. Em Abinadab sei boova, da Uzzah un da Ahio, voahra am da nei vauwa shtiahra.

⁴So henn si di Bundes-Lawt funn Gott fumm Abinadab sei haus uf em hivvel gebrocht, un da Ahio voah am fanna heah lawfa.

⁵Da Dawfit un gans Israel voahra am dansa un singa fannich em HAH un henn kshpeeld mitt peifa gmacht funn tannen-hols un mitt harfa, tambourines, drumma un cymbals.

⁶Vo si an da dresha-floah fumm Nachon kumma sinn, hott da Uzzah naus glangd un hott hohld gnumma funn di Bundes-Lawt funn Gott veil di oxa kshtolbaht sinn.

⁷Em HAH sei zann hott hays gebrend geyyich da Uzzah veil eah dess gedu hott, un Gott hott een nunnah kshlauwa. Grawt datt is eah kshtauva nayvich di Bundes-Lawt funn Gott.

⁸No voah da Dawfit bays veil da HAH da Uzzah kshtrohft hott in sei zann. Un sellah blatz is heit noch Perez-Uzzah kaysa.

⁹Sellah dawk hott da Dawfit sich kfeicht veyyich em HAH un eah hott ksawt, “Vee kann di Bundes-Lawt fumm HAH selayva zu miah kumma?”

¹⁰Da Dawfit voah no nett villing fa di Bundes-Lawt fumm HAH nei in di shtatt fumm Dawfit bringa mitt eem. No hott eah si nayva anna in's haus fumm Obed-Edom, da Gathiddah, gedu.

¹¹Di Bundes-Lawt fumm HAH voah im Obed-Edom, da Gathiddah, sei haus fa drei moonet, un da HAH hott een un sei gansi family ksaykend.

¹²Es voah no em Dawfit ksawt gvest es da HAH em Obed-Edom sei family ksaykend hott un alles es eah katt hott, deich di Bundes-Lawt funn Gott. No is da Dawfit nunnah ganga un hott di Bundes-Lawt funn Gott ruff gebrocht fumm Obed-Edom sei haus zu di shtatt fumm Dawfit mitt grohsi frayt.

¹³Vo selli sex shritt gnumma katt henn es am di Bundes-Lawt fumm HAH drawwa voahra, hott da Dawfit si kshtobt un hott en bull un en fett hamli ufgopfaht.

¹⁴Da Dawfit hott en preeshtah-shatz oh katt un hott gedanst fannich em HAH mitt awl sei macht.

¹⁵Da Dawfit un gans Israel voahra am di Bundes-Lawt fumm HAH ruff bringa un voahra am greisha un blohs-hanna blohsa.

¹⁶Vi di Bundes-Lawt fumm HAH am nei in di shtatt fumm Dawfit kumma voah hott em Saul sei maydel, di Michal gvatsht funn en fenshtah. Vo see da Kaynich Dawfit ksenna hott am tshumba un dansa fannich em HAH, is iahra hatz geyyich een gedrayt.

¹⁷Si henn di Bundes-Lawt fumm HAH rei gebrocht un henn see in iahra blatz ksetzt im tent es da Dawfit grisht katt hott fa see. Da Dawfit hott no brand-opfahra un dank-opfahra gopfaht fannich em HAH.

¹⁸Vo eah faddich voah brand-opfah un dank-opfah opfahra, hott eah di leit ksaykend im Awlmechticha HAH sei nohma.

¹⁹No hott eah en layb broht, en shtikk grohsht flaysh un en boddel vei ausgedayld zu yaydah vann unnich awl di leit funn Israel, mansleit un veibsleit. No sinn awl di leit haym ganga.

²⁰Vo da Dawfit haym kumma is fa sei family saykna, is em Saul sei maydel, di Michal, kumma een ohdreffa. See hott ksawt, “Vee hallich voah da kaynich funn Israel heit! Eah hott sich ausgedu fannich sei gnechta iahra mawda vi di lohsa leit doon es kenn shohm henn.”

²¹Da Dawfit hott ksawt zu di Michal, “Dess voah fannich em HAH, deah es mich groofa hott ovvich dei daett un sei gansi family, un hott mich roolah gmacht ivvah em HAH sei leit, di leit funn Israel. Fasell dans ich fannich em HAH.

²²Ich zayl mich noch niddahrah es dess, un mach mich niddah in mei aykni awwa, avvah veyyich di mawda es du kshvetzt hosht diveyya, ich zayl ufkohva sei fannich eena.”

²³Un em Saul sei maydel, di Michal, hott kenn kinnah katt biss si kshtauva is.