Read Pennsylvania German 2. Kaynicha 20 Bible Online

2. Kaynicha 20 - Pennsylvania German bible

2. Kaynicha 20

¹In selli dawwa is da Hiskia doht-grank vadda. Da brofayt Jesoiya, em Amoz sei boo, is zu eem ganga un hott ksawt, “Dess is vass da HAH sawkt: Mach dei haus zvayk veil du shtauva zaylsht; du vasht nimmi ksund.”

²Da Hiskia hott sei ksicht an di vand gedrayt un hott zumm HAH gebayda,

³“Meindsht du, oh HAH, vi ich shtandhaftich gloffa binn fannich diah mitt en folkumma hatz un habb gedu vass diah kfellich voah?” Un da Hiskia hott biddahlich keild.

⁴No eb da Jesoiya aus em middel foah-court-hohf voah, is es vatt fumm HAH zu eem kumma:

⁵“Gay un sawk em Hiskia, da foah-gengah funn mei leit, ‘Dess is vass da HAH, da Gott funn deim faddah da Dawfit sawkt: Ich habb dei gebayt keaht un habb dei awwa-vassah ksenna; ich zayl dich hayla. Uf em dridda dawk funn nau zaylsht du nuff an da tempel fumm HAH gay.

⁶Ich gebb diah nochamohl fuftzay yoah fa layva. Un ich mach dee shtatt frei funn di hand fumm kaynich funn Assyria. Ich zayl dee shtatt heeda fa mei sayk un fa di sayk funn mei gnecht da Dawfit.’”

⁷No hott da Jesoiya ksawt, “Machet en feiya-blashtah.” Si henn sell gedu, henn's uf da kshveah gedu un eah is ksund vadda.

⁸Da Hiskia hott da Jesoiya kfrohkt katt, “Vass zayld da zaycha sei es da HAH mich hayla zayld un es ich nuff an da tempel gay zayl in drei dawk funn nau?”

⁹Da Jesoiya hott eem ksawt, “Dess is em HAH sei zaycha zu diah es da HAH dutt vass eah fashprocha hott: Soll da shadda zeyya drebba fassich gay adda soll eah zeyya drebba hinnahsich gay?”

¹⁰Da Hiskia hott ksawt, “Es is nett hatt fa da shadda fassich gay macha; loss een zeyya drebba hinnahsich gay.”

¹¹No hott da Jesoiya da HAH ohgebayda, un da HAH hott da shadda gmacht zeyya drebba zrikk nuff gay am Ahas sei shtayk.

¹²An selli zeit hott em Baladan sei boo, da Merodach-Baladan, da kaynich funn Babylon, breefa un en kshenk kshikt zumm Hiskia. Eah hott dess gedu veil eah keaht katt hott es da Hiskia viddah ksund vadda is funn sei granket.

¹³Da Hiskia voah froh un hott di leit geahn eignumma. Eah hott eena awl's keshtlich sach gvissa es eah in sei shtoah-haus kalda hott—silvah, gold, shpeises, deiyah ayl, awl sei greeks-ksha un alles keshtliches es eah katt hott. 'S voah nix in sei kaynich-haus adda sei kaynich-reich es da Hiskia eena nett gvissa hott.

¹⁴No is da Jesoiya da brofayt zumm Kaynich Hiskia ganga un hott kfrohkt, “Vass henn selli mennah ksawt, un vo sinn si bei kumma?” “Funn en land veit ab,” hott da Hiskia ksawt, “si sinn zu miah kumma funn Babylon.”

¹⁵Da brofayt hott no kfrohkt, “Vass henn si ksenna in dei kaynich-haus?” “Si henn alles ksenna in mei kaynich-haus,” hott da Hiskia ksawt, “'sis nix unnich mei keshtlich sach es ich eena nett gvissa habb.”

¹⁶No hott da Jesoiya ksawt zumm Hiskia, “Heich's vatt ab fumm HAH:

¹⁷Di zeit zayld kumma vann alles in dei haus, un alles es dei foah-feddah ksammeld henn biss nau, fatt gedrawwa vatt zu Babylon. Nix zayld ivvahrich sei, sawkt da HAH.

¹⁸Un samm funn dei nohch-kummashaft, dei ayya flaysh un bloot es zu diah geboahra vatt, zayld aw vekk gnumma vadda. Si zayla kemmahrah-gnechta vadda im kaynich-haus fumm kaynich funn Babylon.”

¹⁹No hott da Hiskia ksawt zumm Jesoiya, “Em HAH sei vatt es du ksawt hosht is goot.” Dess voah veil eah gedenkt hott, “Es zayld fridda un kenn greek sei diveil es ich layb.”

²⁰Veyyich di ivvahricha sacha fumm Hiskia, sei macht un alles es eah gedu hott—vi eah vassah in di shtatt gebrocht hott bei en kakt loch unnich di shtatt macha, un's vassah in en damm lawfa lossa—dee sacha sinn ufkshrivva im buch fumm shreives veyyich di kaynicha funn Juda.

²¹Da Hiskia hott no kshlohfa mitt sei foah-feddah, un sei boo da Manasse voah kaynich in seim blatz.