Read Pennsylvania German 1. Chronik 11 Bible Online

1. Chronik 11 - Pennsylvania German bible

1. Chronik 11

¹Gans Israel is zammah kumma zumm Dawfit an Hebron un si henn ksawt zu eem, “Miah sinn dei flaysh un bloot.

²Difoah, even vo da Saul noch glaybt hott, hosht du Israel raus un nei kfiaht. Un da HAH dei Gott hott ksawt zu diah, ‘Du zaylsht mei leit funn Israel heeda, un zaylsht iahra roolah vadda.’”

³Vo awl di eldishti funn Israel zumm Kaynich Dawfit kumma sinn an Hebron, hott eah en bund gmacht mitt eena an Hebron fannich em HAH. No henn si da Dawfit ksalbt fa kaynich sei ivvah Israel, so vi da HAH fashprocha katt hott deich da Samuel.

⁴Da Dawfit un gans Israel sinn zu Jerusalem ganga (sell is Jebus). Di Jebusiddah es datt gvoond henn,

⁵henn ksawt zumm Dawfit, “Du kumsht selayva nett do rei.” Avvah da Dawfit hott di shteik shtatt funn Zion ivvah-gnumma, sell is di shtatt fumm Dawfit.

⁶Da Dawfit hott ksawt katt, “Veah-evvah es foah-gayt geyyich di Jebusiddah, vatt mei evvahshtah hauptmann.” So is di Zeruia iahra boo da Joab seahsht nuff ganga, un eah is hauptmann vadda.

⁷Da Dawfit is no in di shtatt nei gezowwa, un di shtatt voah di shtatt funn Dawfit kaysa.

⁸Un da Dawfit hott di shtatt ufgebaut, funn Millo un rumm heah, un da Joab hott's ivvahrich funn di shtatt gebaut.

⁹Da Dawfit is may un may greftich vadda veil da Awlmechtich HAH bei eem voah.

¹⁰Dess sinn di evvahshti fumm Dawfit sei mechtichi greeks-gnechta. Si, un gans Israel, henn em Dawfit shteiki hilf gevva fa sei kaynich-reich ivvah's gans land shtrekka, so vi da HAH fashprocha katt hott.

¹¹Do sinn di nayma fumm Dawfit sei mechtichi mennah: da Jasobeam, ayns funn di Hachmoniddah, da evvahsht unnich di dreisich. Eah hott kfochta mitt sei shpiah geyyich drei hunnaht mennah un hott si awl doht gmacht an aynra zeit.

¹²Neksht zu eem voah em Dodo sei boo, da Eleasar, en Ahohiddah. Eah voah ayns funn di drei mechtichi mennah.

¹³Eah voah beim Dawfit an Pas-Dammim vo di Philishtah sich fasammeld henn fa fechta. Es voah en shtikk grund datt es en geahsht feld voah, un di leit sinn kshprunga fannich di Philishtah.

¹⁴No henn si sich kshteld in di mitt funn sellem feld. Datt henn si di Philishtah nunnah kakt, un da HAH hott eena kolfa di Philishtah ivvah-kumma.

¹⁵Aymol sinn drei funn di dreisich evvahshti mennah runnah zumm Dawfit an da felsa kumma, an's loch funn Adullam. Un di Philishtah henn sich ufketzt katt in di Rephaim Valley.

¹⁶An selli zeit voah da Dawfit an sei fashteiktah greeks-blatz, un di Philishtah henn sich fasammeld katt an Bethlehem.

¹⁷Da Dawfit hott gvott fa vassah, un hott ksawt, “Oh, ich vott ebbah dayt miah en drink vassah gevva fumm brunna nayksht am doah funn Bethlehem!”

¹⁸So sinn di drei deich di Philishtah iahra lein gebrocha, henn vassah aus em brunna gnumma nayksht am doah funn Bethlehem, un henn's zrikk gedrawwa zumm Dawfit. Avvah da Dawfit hott's nett gedu fa's drinka. In blatz funn sellem, hott eah's raus gleaht fannich em HAH.

¹⁹Eah hott ksawt, “Gott fabitt es ich dess du sett! Sett ich's bloot drinka funn dee drei mennah es iahra layva in di kfoah gedu henn? In di kfoah funn iahra layva henn si's do heah gebrocht.” So hott da Dawfit's nett gedrunka. Sell voahra di satt sacha es di drei mechtichi mennah gedu henn.

²⁰Em Joab sei broodah da Abisai voah da evvahsht funn di dreisich. Eah hott kfochta mitt sei shpiah geyyich drei hunnaht mennah un hott si doht gmacht. Deich dess hott eah sich en nohma gmacht unnich di dreisich.

²¹Eah hott da graysht nohma katt unnich di dreisich un voah iahra foah-gengah, avvah sei nohma voah nett so grohs es sellah funn di drei.

²²Da Benaia, em Joiada sei boo, voah en mechtichah fechtah funn Kabzeel. Eah hott mechtichi sacha gedu. Eah hott zvay funn di beshta mennah funn Moab doht gmacht. Eah is aw moll uf en shnayyichah dawk nunnah ganga in en pitt nei un hott en layb doht gmacht.

²³Eah hott aw en Egyptah nunnah kshlauwa es sivva unna halb foos hohch voah. Da Egyptah hott en shpiah in di hand katt es so grohs voah es en beam funn en duch-loom. Da Benaia is geyyich een ganga mitt en shtikk hols. Eah hott's shpiah aus em Egyptah sei hand grissa, un hott een doht gmacht mitt sei aykni shpiah.

²⁴Dess sinn di sacha es da Benaia, em Joiada sei boo, gedu hott. Eah voah aw hohch ohksenna nayvich di drei.

²⁵Eah voah haychah ohksenna es di dreisich, avvah eah is nett so hohch ufkohva gvest es di drei mechtichi mennah. Da Dawfit hott een ivvah sei aykni mennah gedu es een geguard henn.

²⁶Di mechticha mennah voahra: Da Asahel, em Joab sei broodah; da Elhanan, em Dodo sei boo funn Bethlehem;

²⁷da Sammoth, da Haroriddah; da Helez, da Peloniddah;

²⁸da Ira, em Ikkes sei boo funn Thekoa; da Abieser, funn Anathoth;

²⁹da Sibbechai, da Husathiddah; da Ilai, da Ahohiddah;

³⁰da Maherai, funn Netophath; da Heled, em Baana sei boo funn Netophath;

³¹da Ithai, em Ribai sei boo funn Gibea in Benjamin; da Benaia, da Pirathoniddah;

³²da Hurai, funn Nahale-Gaas; da Abiel, da Arbathiddah;

³³da Asmaveth, da Baherumiddah; da Eliahba, da Saalboniddah;

³⁴em Hasem sei boova funn Gison; da Jonathan, em Sage sei boo funn Harar;

³⁵da Ahiam, em Sachar sei boo funn Harar; da Eliphal, em Ur sei boo;

³⁶da Hepher, funn Macherath; da Ahia, funn Pelon;

³⁷da Hezro, funn Karmel; da Naerai, em Asbai sei boo;

³⁸da Joel, em Nathan sei broodah; da Mibehar, em Hagri sei boo;

³⁹da Zelek, da Ammoniddah; da Naherai, funn Beroth es em Joab, di Zeruia iahra boo, sei greeks-ksha-drawwah voah;

⁴⁰da Ira, da Jethriddah; da Gareb, da Jethriddah;

⁴¹da Uriah, da Hethiddah; da Sabad, em Ahelai sei boo;

⁴²da Adina, em Sisa sei boo es en Rubeniddah voah. Eah voah da evvahsht funn di Rubeniddah un di dreisich es bei eem voahra;

⁴³no voah's da Hanan, em Maacha sei boo; da Josaphat, da Mithniddah;

⁴⁴da Asia, da Asthrathiddah; da Sama un da Jaiel, em Hotham sei boova funn Aroer;

⁴⁵da Jediael, em Simri sei boo; da Joha, em Jediael sei broodah funn Thiz;

⁴⁶da Eliel, da Maheviddah; da Jeribai un da Josavia, em Elnaam sei boova; da Jethma, da Moabiddah;

⁴⁷da Eliel, da Obed un da Jaesiel funn Mezobaia.