Read Pennsylvania German 1. Chronik 14 Bible Online

1. Chronik 14 - Pennsylvania German bible

1. Chronik 14

¹Da Hiram, da kaynich funn Tyrus, hott leit kshikt mitt vatt zumm Dawfit, un aw cedar blekk, shtay-shmitt un zimmah fa en kaynich-haus bauwa fa een.

²Da Dawfit hott gvist es da HAH een kaynich gmacht hott ivvah Israel, un es eah sei kaynich-reich oahrich grohs gmacht hott fa di sayk funn di Kinnah-Israel.

³Da Dawfit hott no noch may veivah gnumma in Jerusalem un eah is da daett vadda funn noch may boova un mayt.

⁴Di nayma funn kinnah es geboahra voahra zu eem in Jerusalem voahra: Sammua, Sobab, Nathan, Solomon,

⁵Tibhar, Elisua, Elpelet,

⁶Nogah, Nepheg, Japhia,

⁷Elisama, Baeliada un Eliphelet.

⁸Vo di Philishtah keaht henn es da Dawfit ksalbt voah fa kaynich sei ivvah gans Israel, henn si awl iahra greeks-leit nuff kshikt fa een ivvah-nemma. Avvah da Dawfit hott keaht difunn un is naus ganga fa si ohdreffa.

⁹Nau di Philishtah voahra in di Valley funn Rephaim ganga un henn di leit datt grawbt.

¹⁰No hott da Dawfit Gott kfrohkt, “Soll ich gay un di Philishtah fechta? Gebsht du si ivvah in mei hand?” Da HAH hott eem andvat gevva, “Gay nuff, ich gebb si in dei hend.”

¹¹So sinn si noch Baal-Perazim ganga, un datt henn si di Philishtah ivvah-kumma. No hott da Dawfit ksawt, “Bei mei hand hott Gott mei feinda deich gebrocha vi hohch vassah deich en vand brecht.” So henn si sellah blatz Baal-Perazim kaysa.

¹²Di Philishtah henn iahra gettah datt glost, un da Dawfit hott gmacht es si fabrend vadda sinn mitt feiyah.

¹³Di Philishtah sinn viddah ruff in di valley kumma un henn di leit grawbt.

¹⁴So hott da Dawfit Gott viddah kfrohkt, un Gott hott ksawt zu eem, “Gay nett grawt nei, avvah kumm hinna rumm so es du an si kumsht fannich di balsam baym.

¹⁵Vann du di yacht heahsht funn greeks-gnechta am lawfa ovva in di balsam baym, no gay fassich fa fechta. Sell maynd es Gott is fannich diah heah ganga fa di Philishtah nunnah shlauwa.”

¹⁶So hott da Dawfit gedu vi Gott eem ksawt hott, un si henn di Philishtah army nunnah kshlauwa gans funn Gibeon zu Geser.

¹⁷So is em Dawfit sei nohma keaht vadda in alli land, un da HAH hott gmacht es awl di heida sich kfeicht henn veyyich eem.